རྒྱ་གར་བྱང་ཕྱོགས་དོན་གྲུབ་གླིང་གཞིས་ཆགས་ནས་ཡིན་པའི་ཚེ་རིང་ཡེ་ཤེས་ལགས་ཀྱིས་བོད་དོན་ཆེད་ཕྱི་ལོ་ ༢༠༢༡ ནས་དབུ་འཛུགས་གནང་བའི་སྦག་སྦག་སྐོར་སྐྱོད་ཀྱི་ལས་འགུལ་དེ་ཁ་སང་རྒྱ་གར་གྱི་རྒྱལ་ས་ལྡི་ལིའི་རོ་ཧི་ནི་བོད་ཁྱིམ་སྡོད་ཁང་མཇུག་སྒྲིལ་གནང་ཡོད་པ་རེད།ཚེ་རིང་ཡེ་ཤེས་ལགས་ཀྱི་སྦག་སྦག་སྐྱོད་ཀྱི་ལས་འགུལ་གྱི་དམིགས་ཡུལ་ནི། བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་སྐྱབས་མགོན་རིན་པོ་ཆེ་མཆོག་ལ་རྒྱ་གར་གྱི་སྤྱི་དམངས་གཟེགས་རྟགས་མཐོ་ཤོས། Bharat Ratna  ཞེས་པ་དེ་འབུལ་ལམ་ཞུ་རྒྱུར་མཚན་རྟགས་བསྡུ་རུབ་ཀྱི་ཞུ་སྐུལ་གནང་ཕྱིར་ཡིན་པ་དང་། ཁོང་གིས་ཁ་སང་བར་རྒྱ་གར་གྱི་མངའ་སྡེ་ཁག་ ༢༥ ནང་སྦག་སྦག་སྐོར་སྐྱོད་་གནང་ཡོད་པ་རེད།ཁ་སང་བོད་ཁྱིམ་སྡོད་ཁང་དུ་ཚོགས་པའི་མཇུག་སྡོམ་མཛད་སྒོའི་ཐོག་ཁོང་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་༸སྐུ་སྒེར་ལ་མཚན་གནས་ཆེ་བའི་གཟེངས་རྟགས་དེ་ལྟ་བུ་ཞིག་ཉེ་མཁོ་མ་མཆིས་ཀྱང་། གཟེངས་རྟགས་དེའི་བརྒྱུད་ནས་མགོན་པོ་༸གང་ཉིད་མཆོག་ལ་བཀྲིན་རྗེས་དྲན་དང་ལྷག་དོན་རྒྱལ་སྤྱི་དང་རྒྱ་གར་གཞུང་མང་གི་བོད་དོན་ཐོག་འཛིན་པའི་སྲིད་བྱུས་ལ་འགྱུར་བ་ཞིག་འགྲོ་ངེས་ཡིན་པར་ཡིད་ཆེས་ཞུ་བཞིན་ཡོད་ཅེས་གསུངས་འདུག ཚེ་རིང་ཡེ་ཤེས་ལགས་ཀྱིས་ཐེངས་འདིའི་སྦག་སྦག་སྐོར་སྐྱོད་ཀྱི་ཐོག་མའི་དམིགས་ཡུལ་ནི་བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་སྐྱབས་མགོན་རིན་པོ་ཆེ་མཆོག་ལ་རྒྱ་གར་གྱི་སྤྱི་དམངས་གཟེགས་རྟགས་མཐོ་ཤོས། Bharat Ratna  ཞེས་པ་དེ་འབུལ་ལམ་ཞུ་རྒྱུར་མཚན་རྟགས་བསྡུ་རུབ་ཀྱི་ཞུ་སྐུལ་གནང་འཆར་ཡོད་ཀྱང་། ཕྱི་ལོ་ ༢༠༢༡ ཕྱི་ཟླ་ ༣ ཚེས་ ༢༢ ཉིན་བཞུགས་སྒར་དྷརྨ་ཤཱ་ལཱ་ནས་རྒྱ་གར་རྒྱལ་ཡོངས་སུ་བོད་དོན་ཆེད་སྦག་སྦག་སྐོར་སྐྱོད་ཀྱི་ལས་འགུལ་དབུ་འཛུགས་གནང་ནས་ཉིན་གྲངས་ཁ་ཤས་རྗེས་སུ་༸དཔལ་ལྡན་དགའ་སྡན་ཕོ་བྲང་ཡིག་ཚང་ནས་དེ་ལྟར་གནང་ཐལ་མི་གནང་བའི་བཀའ་དགོངས་ཕེབས་ཡོད་པ་ལྟར་ ལས་འགུལ་གྱི་འབོད་སྒྲར་བསྒྱུར་བཅོས་གནང་དགོས་བྱུང་སྟེ་ Ride For Pride ཞེས་པའི་འབོད་ཚིག་འོག་ད་བར་རྒྱ་གར་རྒྱལ་ཡོངས་ཀྱི་མངའ་སྡེ་ཁག་ ༢༥ ནང་མུ་མཐུད་ནས་སྐོར་སྐྱོད་གནང་ཡོད་པ་དང་། ཁོང་གི་ངོས་ནས་མང་ཚོགས་ཁྲོད་དངོས་སུ་མཚན་རྟགས་བསྡུ་རུབ་གནང་མི་འདུག་ཀྱང་།   ས་གནས་ཀྱི་མང་ཚོགས་ལ་ཐོག་མའི་དམིགས་ཡུལ་ལྟར་གཟེངས་རྟགས་འབུལ་བཞེས་ཐོག་རྒྱབ་སྐྱོར་གནང་དགོས་པའི་ཞུ་སྐུལ་དང་ལྷག་པར་དུ་ཁ་སང་སླར་བོད་ཁྱིམ་གྱི་སློབ་ཕྲུག་ཚོར་དེ་ལྟར་སྐུལ་མ་གནང་ཡོད། མཇུག་སྡོམ་གྱི་མཛད་སྒོ་ཐོག་ལྡི་ལི་མཐོ་སློབ་ཁག་ཏུ་སློབ་གཉེར་གནང་བཞིན་པའི་བོད་ཁྱིམ་སྡོད་ཁང་གི་སློབ་མ་གྲངས་ ༥༠ ལྷག་ཙམ་ཞིག་འདུ་འཛོམས་བྱུང་བ་བཞིན་སྐབས་དེར་ཚེ་རིང་ཡེ་ཤེས་ལགས་ཀྱིས་བོད་རིགས་ན་གཞོན་ཚོར་སོ་སོའི་རྒྱལ་ཁབ་དང་མི་རིགས། ལེགས་བྱང་། ཆོས་རིག་བཅས་པ་རྩ་མེད་བཟོ་མཁན་རྒྱ་གཞུང་ངེས་པར་དུ་མ་བརྗེད་པ་གནང་དགོས་པ་མ་ཟད་ཁྱད་པར་དུ་སོ་སོའི་རྒྱལ་ཁབ་དང་མི་རིགས་ཀྱི་ཆེད་དུ་དུས་ཚོད་རྒྱས་བཅད་ཀྱིས་འགན་བཞེས་དགོས་པའི་གཞེན་སྐུལ་གནང་ཡོད།སྦག་སྦག་སྐོར་སྐྱོད་ཀྱི་མཇུག་སྡོམ་མཛད་སྒོ་དེ་ལྡི་ལིར་རྟེན་གཞི་བྱས་པའི་འཕགས་བོད་འབྲེལ་མཐུད་ལས་ཁུངས་ཀྱི་ངོས་ནས་གོ་སྒྲིག་ཞུས་ཡོད་པ་དང་མཛད་སྒོའི་སྐུ་མགྲོན་གཙོ་བོར་ BTSM རྒྱ་གར་བོད་དོན་རྒྱབ་སྐྱོར་ཚོགས་པའི་རྒྱལ་ཡོངས་དྲུང་ཆེ་སྐུ་ཞབས་ Pankaj Goyal མཆོག་གིས་དབུས་པའི་འབྲེལ་ཡོད་ཁག་ཅིག་ཕེབས་འདུགསྐབས་དེར་སྐུ་ཞབས་ Pankaj Goyal མཆོག་གིས་རྒྱ་ནག་གཞུང་ནས་བོད་ཀྱི་ཆོས་དང་རིག་གཞུང་། མི་རིགས་བཅས་པ་རྩ་མེད་བཟོ་ཐབས་ཀྱི་སྲིད་བྱུས་ལ་ངོ་རྒོལ་དང་ཚེ་རིང་ཡེ་ཤེས་ལགས་ཀྱི་ལས་འགུལ་ལ་བསྔགས་བརྗོད་གནང་སྟེ། བོད་རིགས་ན་གཞོན་ཚོས་སོ་སོའི་མི་རིགས་ཀྱི་ཆོས་རིག་དང་། ལེགས་བྱང་། སྐད་ཡིག་བཅས་པ་མི་ཉམས་རྒྱུན་འཛིན་གནང་གལ་ཡིན་པ་མ་ཟད། བོད་རྒྱལ་ཁབ་ཀྱི་རང་དབང་སླར་གསོ་གནང་བའི་སེམས་ཤུགས་དགོས་པར་སྐུལ་མ་སོགས་གནང་ཡོད། The post བོད་དོན་ཆེད་ལེ་དབར་ཆིག་ཁྲི་དགུ་སྟོང་ལྷག་སྦག་སྦག་སྐོར་སྐྱོད་གནང་སྟེ་ལས་འགུལ་མཇུག་སྒྲིལ། first appeared on vot. The post བོད་དོན་ཆེད་ལེ་དབར་ཆིག་ཁྲི་དགུ་སྟོང་ལྷག་སྦག་སྦག་སྐོར་སྐྱོད་གནང་སྟེ་ལས་འགུལ་མཇུག་སྒྲིལ། appeared first on vot.

Voice of Tibet

བོད་དོན་ཆེད་ལེ་དབར་ཆིག་ཁྲི་དགུ་སྟོང་ལྷག་སྦག་སྦག་སྐོར་སྐྱོད་གནང་སྟེ་ལས་འགུལ་མཇུག་སྒྲིལ།

དེ་རིང་སྔ་དྲོ་ཕྱག་ཚོད་བཅུ་དང་ཕྱེད་ཀའི་སྟེང་། ས་རཱ་བོད་ཀྱི་མཐོ་རིམ་སློབ་གཉེར་ཁང་གི་ཞིབ་འཇུག་སློབ་མའི་ཆེད་རྩོམ་གནང་བའི་བོད་རིག་པའི་དཔྱད་དེབ་ཅིག་དབུ་འབྱེད་གནང་སྟེ། འབྲེལ་ཡོད་ཀྱི་ཆེད་མཁས་བའི་བོད་རིག་པའི་དཔྱད་དེབ་དང་རིག་གཅིག་རྐང་འཛིན་སོགས་ཀྱིི་བརྗོད་གཞིའི་ཐོག་གཏམ་བཤད་གནང་སོང་། བོད་རིག་པའི་དཔྱད་དེབ་དབུ་འབྱེད་ཀྱི་མཛད་སྒོའི་ཐོག སྐུ་མགྲོན་གཙོ་བོར་ཨ་མྱེས་རྨ་ཆེན་རིག་གཞུང་ཞིབ་འཇུག་ཁང་གི་འགན་འཛིན་ཇོ་སྲས་བཀྲ་ཤིས་ཚེ་རིང་ལགས་དང་། དམིགས་བསལ་སྐུ་མགྲོན་བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་ཟླ་བ་ཚེ་རིང་ལགས་ཀྱི་གཙོ་བྱས་པའི་ས་རཱ་བོད་ཀྱི་མཐོ་རིམ་སློབ་གཉེར་ཁང་གི་དགེ་ལས་ཡོངས་དང་། སྲིད་བྱུས་ཉམས་ཞིབ་ཁང་གི་ལས་བྱེད་ཡོངས་ཀྱིས་མཉམ་ཞུགས་གནང་སོང་། སྐབས་དེར་བོད་རིག་པའི་དཔྱད་དེབ་ཀྱི་རྩོམ་སྒྲིག་པ། ས་རཱ་མཐོ་སློབ་ཀྱི་ལོ་རྒྱུས་ཀྱི་སློབ་དཔོན་བགྲས་བ་གཙང་ཕྲུག་སྟོབས་ལགས་ཀྱིས་དཔྱད་དེབ་རྩོམ་སྒྲིག་གི་དགོས་དམིགས་དང་འབྲེལ་ནས་གཏམ་བཤད་གནང་སྟེ། རིག་གཞུང་དཔྱད་དེབ་ཁག་ནི་མཐོ་སློབ་ཁག་གི་ཚབ་མཚོན་ལྟ་བུ་ཆགས་ཡོད་པ་དང་། དཔྱད་དེབ་དེ་དག་ནི་མཐོ་རིམ་མི་སྣས་རིག་པའི་གཞུང་ལུགས་ལ་དཔྱད་ཞིབ་བྱས་པའི་གྲུབ་དོན་སྤུང་ས་ཞིག་ཡིན་པར་བརྟེན། ཚིག་ཉུང་དོན་བསྡུས་ཀྱིས་རིག་ཚན་བྱེ་བྲག་པར་ཞིབ་འཇུག་བྱས་ཏེ་དཔྱད་དེབ་འདོན་སྤེལ་བྱེད་རྒྱུ་དེ་གལ་ཆེན་པོ་ཡིན་ནའང་། རང་རེའི་བཙན་བྱོལ་སྤྱི་ཚོགས་ཀྱི་ནང་དུ་རིག་གཞུང་དཔྱད་དེབ་མང་པོ་མེད་པའི་ཁྲོད་ནས་གཅིག་ཐེངས་འདིར་ས་རཱ་མཐོ་སློབ་ཀྱི་བོད་རིག་པའི་དཔྱད་དེབ་དེ་ཆགས་ཡོད་པར་གསུངས་སོང་། དེ་བཞིན་སྐབས་དེར། ས་རཱ་མཐོ་སློབ་ཀྱི་སྐད་བརྡ་རིག་པའི་གཙུག་ལག་སློབ་དཔོན། སྤྱི་ཟུར་བསོད་ནམས་རྒྱལ་མཚན་ལགས་ཀྱིས་རིགས་གཅིག་རྐང་འཛིན་གྱི་བརྗོད་གཞིའི་ཐོག་གཏམ་བཤད་གནང་སྟེ། ཁོང་གིས་རིགས་གཅིག་རྐང་འཛིན་ཟེར་བ་དེར་བོད་པའི་སྤྱི་ཚོགས་ནང་དུ་དབྱིན་ཡིག་གི་ཚིག་འགྲེལ་དང་འབྲེལ་ནས་འགྲེལ་བཤད་གནང་མཁན་མང་པོ་ཞིག་ཡོང་གི་ཡོད་ཀྱང་། དོན་དུ་རིག་ཚན་བྱེ་བྲག་པ་ཞིག་གི་སྒང་ལ་མཐའ་དཔྱོད་རིག་པ་དང་སྦྱར་ནས་སློབ་སྦྱོང་གཏིང་ཟབ་བྱས་ཏེ་ཕྱི་ནང་གི་གནས་ཚུལ་ཇི་བཞིན་རྟོགས་པའི་སློབ་སྦྱོང་གི་རིམ་པ་དེ་ལ་རིགས་གཅིག་རྐང་འཛིན་ཞུ་བཞིན་ཡོད་པར་ངོ་སྤྲོད་ཀྱིས། ད་ཆ་རྒྱ་ནག་གིས་བོད་ནང་གི་སློབ་སྦྱོང་གི་ཁོར་ཡུག་ལ་གཏོར་བཅོམ་བཏང་སྟེ་བོད་ཀྱི་རིག་གཞུང་རྩ་གཏོར་གཏོང་བཞིན་པའི་གནས་སྐབས་འདིར། བཙན་བྱོལ་ནང་གི་ཤེས་ཡོན་གྱི་སྡེ་ཚན་ཁག་གིས་བོད་ཀྱི་ཆོས་རིག་རྒྱུན་འཛིན་གནང་སྟེ་བོད་ཕྱི་རབས་པ་རྣམས་ལ་རྩིས་སྤྲོད་བྱེད་རྒྱུ་དེ་གལ་ཆེན་པོ་ཡིན་པར་གསུངས་སོང་། དེ་བཞིན་སྲིད་བྱུས་ཉམས་ཞིབ་ཁང་གི་འགན་འཛིན་ཟླ་བ་ཚེ་རིང་ལགས་ཀྱིས་བོད་ཀྱི་ལོ་རྒྱུས་ཐོག་རྒྱ་ནག་གི་ལྟ་སྟངས་ཞེས་པའི་སྐོར་ལ་གཏམ་བཤད་གནང་བའི་ནང་དུ། རྒྱ་ནག་གིས་བོད་ཙམ་མིན་པར། ཤར་ཨེ་ཤ་ཡའི་ཁུལ་གྱི་རིག་གཞུང་གི་ལྟེ་བ་དེ་རྒྱ་ནག་ཡིན་པར་འགྲེལ་བརྗོད་བྱེད་བཞིན་པ་ཞིག་ཡིན་པར་མ་ཟད། བོད་མི་རིགས་ཀྱི་ཆོས་དང་རིག་གཞུང་ཚང་མ་རྒྱ་ནག་གི་རིག་གཞུང་གི་སྒྲོམ་གཞི་ལས་དར་ཁྱབ་བྱུང་བ་ཞིག་ཡིན་པའི་འགྲེལ་ལོག་བྱེད་བཞིན་ཡོད་པ་དང་འབྲེལ་ནས། རྒྱ་སྐད་རྒྱ་ཡིག་གཅིག་པོའི་ཐོག་ནས་ལོ་རྒྱུས་ལ་ཞིབ་འཇུག་བྱེད་མཁན་ཞིག་ཡིན་ན། རྒྱ་ནག་གི་ལོག་འགྲེལ་གྱི་ཁྲོད་ནས་བོད་ཀྱི་ཆོས་རིག་ཀྱང་རྒྱ་ནག་གི་རིག་གཞུང་གི་ཁོངས་སུ་གཏོགས་པ་ཞིག་ཡིན་པར་ངོས་འཛིན་བྱེད་རྒྱུ་ཉག་གཅིག་ཡིན་པར་གསུངས་སོང་། གཞི་རྩའི་ཐེངས་འདིའི་ས་རཱ་བོད་ཀྱི་མཐོ་རིམ་སློབ་གཉེར་ཁང་གི་བོད་རིག་པའི་དཔྱད་དེབ་དེ་ནི་མཐོ་རིམ་སློབ་གཉེར་ཁང་གི་བོད་རིག་པའི་དཔྱད་དེབ་ཐེངས་དང་པོ་དེ་ཆགས་ཡོད་པ་དང་། དཔྱད་དེར་ཞིབ་འཇུག་གི་རྩོམ་ཡིག་བཅུ་གཉིས་ཀྱིས་གྲུབ་ཡོད་པ་དང་། བརྗོད་བྱའི་ཆ་ནས་ཀྱང་མང་ཆེ་བ་བོད་ཀྱི་ལོ་རྒྱུས་དང་འབྲེལ་བའི་དཔྱད་རྩོམ་རྐྱང་ཆགས་ཡོད་འདུག The post ས་རཱ་བོད་ཀྱི་མཐོ་རིམ་སློབ་གཉེར་ཁང་གིས་བོད་རིག་པའི་དཔྱད་དེབ་དབུ་འབྱེད། first appeared on vot. The post ས་རཱ་བོད་ཀྱི་མཐོ་རིམ་སློབ་གཉེར་ཁང་གིས་བོད་རིག་པའི་དཔྱད་དེབ་དབུ་འབྱེད། appeared first on vot.

ས་རཱ་བོད་ཀྱི་མཐོ་རིམ་སློབ་གཉེར་ཁང་གིས་བོད་རིག་པའི་དཔྱད་དེབ་དབུ་འབྱེད།

བལ་ཡུལ་གྱི་རྒྱལ་ས་ Kathmandu ནང་དུ་བོད་མི་གཙོས་ས་གནས་ཡུལ་མི་ཉམ་ཐག་དང་དགོས་ངེས་ཅན་ཚོར་རོགས་སྐྱོར་དང་སྨྱོ་རྫས་དང་ཆང་རག་སོགས་ངན་གོམས་ཐེབས་པའི་གཞོན་སྐྱེས་ལ་སློབ་གསོ་དང་མདུན་ལམ་གྱི་ལམ་སྟོན་གནང་མཁན་གྱི་གཞུང་འབྲེལ་མ་ཡིན་པའི་ཚོགས་པ་ Hope and Challenge རེ་བ་དང་གདོང་ལེན་ཚོགས་པས་བོད་ཕྲུག་སློབ་མ་ཚོར་ཆེད་དམིགས་ཀྱིས་རིགས་གཅིག་རྐང་འཛིན་གྱི་སློབ་ཡོན་གསལ་བསྒྲགས་གནང་འདུགརིགས་གཅིག་རྐང་འཛིན་གྱི་སློབ་ཡོན་གསལ་བསྒྲགས་དེ་དང་འབྲེལ་རེ་བ་དང་གདོང་ལེན་ཚོགས་པ་གསར་འཛུགས་གནང་མཁན་དང་དེའི་འགན་འཛིན་དགེ་བཤེས་བསོད་ནམས་དབང་ཆེན་ལགས་སུ་ཞལ་པར་བརྒྱུད་བཀའ་འདྲི་ཁག་ཅིག་ཞུས་པར་ཁོང་གིས་དེ་སྔ་༸གོང་ས་༸སྐྱབས་མགོན་ཆེན་པོ་མཆོག་གིས་བོད་པའི་སློབ་ཕྲུག་ཚོས་རིགས་གཅིག་རྐང་འཛིན་གྱི་སློབ་གཉེར་ལ་ཤུགས་བརྒྱབ་གལ་ཡིན་པའི་ལམ་སྟོན་བཀའ་སློབ་ཟབ་མོ་ཕེབས་དོན་ལྟར་འདས་པའི་ལོ་ཤས་ནས་བཟུང་སྟེ་རིགས་གཅིག་རྐང་འཛིན་ཐོག་སློབ་སྦྱོང་གནང་མཁན་གྱི་བོད་ཕྲུག་སློབ་མ་ཚོར་་སློབ་ཡོན་གནང་གི་ཡོད་སྐོར་གསུངས་ཡོད།ཐེངས་འདིའི་སློབ་ཡོན་ནི་འབུམ་རམས་པ་གཙོས་བཟོ་རིག་དང་གློག་ཀླད། ཁོར་ཡུག་དང་གྲངས་ཚིག དེ་བཞིན་འཕྲུལ་རིགས་སོགས་སློབ་ཚན་མི་འདྲ་བ་བཅུ་ལྷག་གི་ཐོག་རིགས་གཅིག་རྐང་འཛིན་སློབ་སྦྱོང་གནང་འདོད་ཡོད་མཁན་ཚོར་གནང་གཏན་འཁེལ་ཡོད་པ་དང་། སློབ་ཡོན་ནང་མཉམ་ཞུགས་གནང་བློ་ཡོད་མཁན་ཚོས་སྙན་ཞུ་འདི་ལོའི་ཕྱི་ཟླ་ ༨ ཚེས་ ༣༡ ཉིན་ཚོགས་པའི་གློག་འཕྲིན་ཐོག་ཕུལ་ཟིན་དགོས་ཀྱི་འདུགརྩ་བའི་དགེ་བཤེས་བསོད་ནམས་དབང་ཆེན་ལགས་ཀྱིས་འགན་བཞེས་བཞིན་པའི་རེ་བ་དང་གདོང་ལེན་ཚོགས་པའི་ངོས་ནས་སློན་ཡོན་གྱི་ལས་གཞི་ཙམ་མ་ཟད་ས་གནས་སུ་༸རྒྱལ་ཡུམ་ཆེན་མོའི་མཚན་ཐོག་ལ་བདེ་སྐྱིད་ཚེ་རིང་ཁྱིམ་ཚང་ཞེས་པ་ཞིག་གསར་འཛུགས་གནང་སྟེ་ཕྲུ་གུ་ཉམ་ཐག་ལ་གཟིགས་རྟོག་དང་། བུ་ཕྲུག་མེད་པའི་ཕ་མ་རྒན་འཁོགས་བཞུགས་སའི་རྒས་གསོ་ཁང་གསར་བསྐྲུན་གནང་བ་སོགས་སྤྱི་ཚོགས་ལ་སྨན་པའི་ཞབས་ཞུའི་ལས་དོན་མང་དག་ཅིག་གཉེར་བཞིན་ཡོད་པ་དང་། ལྷག་པར་དུ་ཏོག་དབྱིབས་རིམས་ནད་ཁྱབ་གདལ་གྱི་ཛ་དྲག་གནས་སྟངས་དང་འབྲེལ་ཏེ་ཕྱག་ལས་ཁག་ཅིག་གནང་མུས་ཡིན་པ་རེད། The post རེ་བ་དང་གདོང་ལེན་ཚོགས་པས་རིགས་གཅིག་རྐང་འཛིན་གྱི་སློབ་ཡོན་གསལ་བསྒྲགས་གནང་བ། first appeared on vot. The post རེ་བ་དང་གདོང་ལེན་ཚོགས་པས་རིགས་གཅིག་རྐང་འཛིན་གྱི་སློབ་ཡོན་གསལ་བསྒྲགས་གནང་བ། appeared first on vot.

རེ་བ་དང་གདོང་ལེན་ཚོགས་པས་རིགས་གཅིག་རྐང་འཛིན་གྱི་སློབ་ཡོན་གསལ་བསྒྲགས་གནང་བ།

དེ་རིང་སྔ་དྲོ་ཕྱག་ཚོད་བཅུ་དང་ཕྱེད་ཀའི་སྟེང་། བཞུགས་སྒར་བོད་ཀྱི་གསོལ་མགྲོན་ཁང་གི་ནང་དུ། རྒྱལ་དབང་སྐུ་ཕྲེང་བཅུ་གསུམ་པ་ཆེན་པོ་མཆོག་གིས་ཆུ་གླང་རྩ་ཚིག་གསལ་བསྒྲགས་བསྐྱངས་ནས་ལོ་བརྒྱ་དང་དགུ་འཁོར་བའི་ཉིན་མོ་དང་འབྲེལ་ནས། བོད་རང་བཙན་སླར་གསོའི་ཡོངས་ཁྱབ་གསལ་བསྒྲགས་དང་དེའི་ལོ་རྒྱུས་ཞེས་པའི་བརྗོད་གཞིའི་སྟེང་གཏམ་བཤད་ཀྱི་ལས་རིམ་ཞིག་གོ་སྒྲིག་གནང་འདུགབོད་རང་བཙན་སློབ་ཕྲུག་ཚོགས་པས་གོ་སྒྲིག་ཞུས་པའི་དེ་རིང་གི་གཏམ་བཤད་ཀྱི་ལས་རིམ་དེའི་ཐོག བོད་ཀྱི་དཔེ་མཛོད་ཁང་གི་རིག་གཞུང་ཉམས་ཞིབ་ཁང་དང་པར་སྐྲུན་སྡེ་ཚན་གྱི་འགན་འཛིན་ན་ག་སངས་རྒྱས་བསྟན་དར་ལགས་ཀྱིི་གཙོ་བྱས་པའི་བཞུགས་སྒར་ཁུལ་གྱི་གཞུང་འབྲེལ་མིན་པའི་ཚོགས་སྐྱིད་ཁག་གི་སྐུ་ཚབ་དང་དང་བླང་དོན་གཉེར་བ་ཁག་ཅིག་གིས་མཉམ་ཞུགས་གནང་སོང་། སྐབས་དེར་རྒན་ན་ག་སངས་རྒྱས་བསྟར་དར་ལགས་ཀྱིས་ལོ་ངོ་བརྒྱ་དང་དགུ་ཡི་ཡར་སྔོན་གྱི་དེ་རིང་གི་ཉིན་མོ་འདིར། ༧གོང་ས་སྐྱབས་མགོན་སྐུ་ཕྲེང་བཅུ་གསུམ་པ་ཆེན་པོ་མཆོག་གིས་ཆུ་གླང་རྩ་ཚིག་ཆེན་མོ་དེ་ཡོངས་གྲགས་གནང་བའི་ཉིན་མོ་དེ་ཡིན་པར་ངོ་སྤྲོད་གནང་ཡོད་པར་གསུངས་སྟེ། བོད་ཕྱི་རབས་པ་རྣམས་ཀྱིས་ཆུ་གླང་རྩ་ཚིག་དེར་སློབ་སྦྱོང་བྱས་ནས་འགྲེལ་བརྗོད་བྱས་པའི་སྐབས་སུ། རྩ་ཚིག་དེར་བོད་རྒྱལ་ཁབ་དེ་རྒྱལ་ཁབ་སུ་ཞིག་གི་འོག་ཏུ་ཡང་མེད་པ་གསལ་བོར་བཀའ་གནང་ཡོད་པ་མ་ཟད། ནང་དོན་མདོར་བསྡུས་ནས་བརྗོད་ན། བོད་དེ་རང་བཙན་གཙང་མའི་རྒྱལ་ཁབ་ཅིག་ཡིན་པར་ངོས་འཛིན་ཞུ་བཞིན་པར་གསུངས་སོང་། གཞན་ཡང་ཁོང་གིས་དེ་རིང་གི་ལས་རིམ་དེ་ཆབ་སྲིད་ཀྱི་ལས་འགུལ་ཞིག་ལ་དགོངས་སྲིད་ནའང་། དེ་རིང་གི་ཉིན་མོ་དེ་ནི་ཆབ་སྲིད་ལས་འགུལ་ཙམ་ཞིག་མིན་པར་བོད་ཀྱི་ལོ་རྒྱུས་ལ་དྲན་གསོའི་ཉིན་མོ་ཞིག་ཆགས་ཡོད་པར་ངོ་སྤྲོད་གནང་བ་མ་ཟད། བོད་ཀྱི་ལོ་རྒྱུས་སྨྲ་བ། རྩིས་དགོན་ཞ་སྒབ་པའི་ངོས་ནས་ཀྱང་དེ་རིང་གི་ཉིན་མོ་འདི་བོད་ཀྱི་རང་བཙན་གྱི་ཉིན་མོ་ཞིག་ཡིན་པར་འགྲེལ་བརྗོད་གནང་ཡོད་པར་ལུང་འདྲེན་གྱིས། བོད་མི་རྣམས་ཀྱིས་དགའ་སྤྲོའི་ངང་ནས་ཉིན་མོ་འདི་སྲུང་བརྩི་ཞུ་དགོས་པར་གསུངས་སོང་། དེ་བཞིན་ཁོང་གིས། ཆུ་གླང་རྩ་ཚིག་ཙམ་མིན་པར། དེང་སང་ཕྱི་ནང་གི་མཁས་བའི་ཁྲོད་ན་ཡང་རྒྱ་ནག་གི་གནའ་བོའི་ཡིག་ཚགས་ཁག་ལ་ཞིབ་འཇུག་མཐུལ་ཕྱིན་པ་གནང་སྟེ། བོད་འདི་རྒྱ་ནག་གི་རྒྱལ་ཁོངས་མིན་པའི་ཉམས་ཞིབ་རང་བཞིན་གྱི་ལོ་རྒྱུས་ཀྱི་དཔེ་དེབ་གསར་ཏུ་ཐོན་ཡོད་པ་མཇལ་རྒྱུ་ཡོད་པར་བསྒྲགས་ཏེ། རྒྱ་ནག་གིས་རྒྱུན་དུས་ནས་རྫུན་གཏམ་ཞིག་ཐེངས་བརྒྱར་བཤད་པ་ཡིན་ན་དེ་བདེན་པ་རུ་སྒྱུར་ཐུབ་པར་ངོས་འཛིན་བྱེད་ཀྱི་ཡོད་ཀྱང་། གནད་དོན་དེ་ནི་དབང་ཆ་དང་དཔལ་འབྱོར་གྱི་དབང་ཤུགས་སུ་སོང་བ་ཡིན་ན། བདེན་པ་ལ་རྒྱལ་ཁ་ཐོབ་ཐབས་མེད་པ་ཞིག་ཡིན་པར་ལུང་འདྲེན་གྱིས། སངྒཱ་པུར་དུ་གནས་སྡོད་ཀྱི་རྒྱ་རིགས་ལོ་རྒྱུས་སྨྲ་བ་ལིག་ཧན་ཁྲིན་ཟེར་བས་རྒྱ་ནག་གི་མིང་རྒྱལ་རབས་དང་ཆིངས་རྒྱལ་རབས་སོགས་ཀྱི་ལོ་རྒྱུས་ལ་ཉམས་ཞིབ་གནང་སྟེ། བོད་དེ་གནའ་སྔ་མོ་ནས་རྒྱལ་ཁོངས་མིན་པ་མངོན་གསལ་ཡོད་པར་ཡང་བསྒྲགས་སོང་།རྩ་བའི་བོད་ཀྱི་ཆུ་གླང་རྩ་ཚིག་ཅེས་པ་དེ་ནི་ཕྱི་ལོ་ ༡༩༡༣ ལོར་༸གོང་ས་སྐུ་ཕྲེང་བཅུ་གསུམ་པ་ཆེན་པོ་མཆོག་གིས་གསལ་བསྒྲགས་བསྐྱངས་བ་ཞིག་ཡིན་ཞིང་། དེ་ནི་དོན་ཚན་ལྔ་ཡི་བདག་ཉིད་ཅན་ཞིག་ཡིན་པ་དང་། ནང་དོན་གཙོ་བོ་བོད་ནང་གི་དགོན་པ་གྲྭ་ཚང་གི་ལམ་སྲོལ་རྒྱུན་འཛིན་དང་འཛིན་སྐྱོང་གི་བྱེད་ལས། དེ་བཞིན་བོད་དེ་རང་དབང་ལྡན་པའི་རྒྱལ་ཁབ་ཅིག་ཡིན་པ་མ་ཟད། བོད་འབངས་རྣམས་ཀྱིས་རང་ས་རང་སྲུང་བྱེད་རྒྱུ་གལ་ཆེན་པོ་ཡིན་པ་སོགས་འཁོད་ཡོད་པ་རེད། བོད་རང་བཙན་སློབ་ཕྲུག་ཚོགས་པའི་ངོས་ནས་ཕྱི་ལོ་ ༢༠༡༣ ནས་བཟུང་ཉིན་མོ་ལོ་ལྟར་འདི་བོད་རང་བཙན་གྱི་ཉིན་མོར་ངོས་འཛིན་གྱིས་བྱེད་སྒོ་སྣ་མང་གི་ཐོག་ནས་སྲུང་བརྩི་བྱེད་བཞིན་ཡོད་པ་རེད། གཞན་ཡང་ཉིན་མོ་འདི་དང་བསྟུན་ཁ་སང་ཕྱི་དྲོ་བོད་ཀྱི་གཞོན་ནུ་ལྷན་ཚོགས་ནས་ཀྱང་རྒྱ་ནག་དང་བོད་རིག་པ་བ་སྐུ་ཞབས་ Claude Arpi ལགས་དང་བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་ཟུར་པ་དང་རྩོམ་པ་པོ་ཐུབ་བསྟན་བསམ་འཕེལ་ལགས་བཅས་གདན་ཞུས་ཀྱིས་དྲ་ལམ་བརྒྱུད་གསུང་བཤད་ཀྱི་ལས་རིམ་ཞིག་གོ་སྒྲིག་ཞུས་པའི་ཐོག་ནས་བོད་རང་བཙན་ཉིན་མོ་སྲུང་བརྩི་ཞུས་འདུག The post བཞུགས་སྒར་དུ་བོད་རང་བཙན་གྱི་ཉིན་མོ་སྲུང་བརྩི། first appeared on vot. The post བཞུགས་སྒར་དུ་བོད་རང་བཙན་གྱི་ཉིན་མོ་སྲུང་བརྩི། appeared first on vot.

བཞུགས་སྒར་དུ་བོད་རང་བཙན་གྱི་ཉིན་མོ་སྲུང་བརྩི།

རྒྱ་ནག་གི་རྒྱལ་ས་པེ་ཅིང་ནང་དུ་རྒྱལ་སྤྱིའི་དགུན་དུས་ཨོ་རྩལ་རྩེད་འགྲན་དངོས་སུ་འགོ་བཙུགས་ཏེ་དེ་རིང་རྩེད་འགྲན་ཉིན་བདུན་པ་ཆགས་ཀྱི་ཡོད་པ་རེད།  བརྒྱུད་རིམ་དེའི་ཁྲོད་རྒྱ་ནག་ཕྱོགས་ནས་རྒྱ་ནག་སྤྱི་དང་། ལྷག་པར་དུ་དེའི་བཙན་གནོན་དབང་སྒྱུར་འོག་ཡོད་པའི་བོད་དང་ཤིང་ཅང་སོགས་གྲངས་ཉུང་མི་རིགས་ཀྱི་ས་ཁུལ་ཁག་གི་འགྲོ་བ་མིའི་ཐོབ་གི་གནས་བབ་སོགས་ཀྱི་ཐོག་ལ་གསལ་བཤད་གང་ཡང་མ་བྱས་པའི་ཁར། ཨོ་ལོམ་པིག་རྩེད་འགྲན་དང་ཆབ་སྲིད་གཉིས་ཐ་དད་ཡིན་པས། དེ་གཉིས་མཉམ་བསྲེས་བྱེད་རྒྱུ་ཡོད་མ་རེད་ཅེས་བཤད་ཡོད་ལ། ནུབ་ཕྱོགས་རྒྱལ་ཁབ་ཁག་ཅིག་ནས་རྩེད་འགྲན་དངོས་ཀྱི་ཐོག་ལ་སྐུ་ཚབ་མ་བཏང་པ་དེ་ནི་ཆབ་སྲིད་ཀྱི་ཐབས་བྱུས་ཤིག་ཡིན་པ་སོགས་བཤད་ཡོད། གནས་ཚུལ་དེ་དག་དང་འབྲེལ་བོད་རང་བཙན་ལས་འགུལ་བ་དང་རྩོམ་པ་པོ་བསྟན་འཛིན་བརྩོན་འགྲུས་ལགས་སུ་རྒྱ་ནག་གཞུང་ནས་ཨོ་ལོམ་པིག་རྩེད་འགྲན་དང་ཆབ་སྲིད་གཉིས་མཉམ་བསྲེས་གཏོང་གི་འདུག་གམ་ཞེས་པའི་བརྗོད་གཞིའི་ཐོག་བཀའ་འདྲི་ཁག་ཅིག་ཞུས་ཡོད། The post རྒྱ་ནག་གཞུང་ནས་ཨོ་རྩལ་དང་ཆབ་སྲིད་གཉིས་མཉམ་བསྲེས་གཏོང་བཞིན་འདུག་གམ། first appeared on vot. The post རྒྱ་ནག་གཞུང་ནས་ཨོ་རྩལ་དང་ཆབ་སྲིད་གཉིས་མཉམ་བསྲེས་གཏོང་བཞིན་འདུག་གམ། appeared first on vot.

རྒྱ་ནག་གཞུང་ནས་ཨོ་རྩལ་དང་ཆབ་སྲིད་གཉིས་མཉམ་བསྲེས་གཏོང་བཞིན་འདུག་གམ།

བོད་དང་ཐེ་ཝན་གྱི་འགྲོ་བ་མིའི་ཐོབ་ཐང་འབྲེལ་མཐུད་ཁང་གི་འགན་འཛིན་བཀྲ་ཤིས་ཚེ་རིང་ལགས་ཀྱི་གོ་སྒྲིག་གི་འོག   ཐེ་ཝན་ཁུལ་དུ་ཁ་སང་ནས་དབུ་འཛུགས་ཀྱིས་ཟླ་བ་རྗེས་མའི་གསུམ་བཅུའི་དུས་དྲན་བར་བར་དུ་རེས་གཟའ་ལྷག་པ་འཆར་ཅན་གྱི་བོད་དོན་དྲིལ་བསྒྲགས་ཀྱི་རྐང་འཁོར་སྐོར་སྐྱོད་ཀྱི་ལས་འགུལ་ཞིག་དབུ་འཛུགས་གནང་འདུགཁ་སང་གི་རྐང་འཁོར་སྐོར་སྐྱོད་ཀྱི་ལས་འགུལ་གྱི་ཉིན་དང་པོའི་ཐོག ཐེ་ཝན་ནང་ཡོད་པའི་བོད་མི་དང་ཐེ་ཝན་གྲོས་ཚོགས་ཀྱི་འཐུས་མི། ཐེ་ཝན་དང་ཧོང་ཀོང་གི་བོད་དོན་རྒྱབ་སྐྱོར་བ་སོགས་མི་སྣ་ཁག་ཅིག་མཉམ་ཞུགས་ཐོག་གསར་འགོད་ལྷན་ཚོགས་ཤིག་སྐོང་ཚོགས་ཀྱིས་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཀྱི་ཐད་ནས་གཏམ་བཤད་སྤེལ་རྗེས་ལས་འགུལ་དངོས་སུ་དབུ་འཛུགས་གནང་འདུགའདི་ག་རླུང་འཕྲིན་ཁང་གིས་ལས་འགུལ་འདི་གོ་སྒྲིག་ཞུ་མཁན་བོད་དང་ཐེ་ཝན་གྱི་འགྲོ་བ་མིའི་ཐོབ་ཐང་འབྲེལ་མཐུད་ཁང་གི་འགན་འཛིན་བཀྲིས་ཚེ་རིང་ལགས་སུ་ཁ་པར་གྱི་ལམ་ནས་བཀའ་འདྲི་ཞུས་པར་ཁོང་གིས་རྩ་བའི་ལས་འགུལ་དེ་ཕྱི་ལོ་ ༢༠༡༡ ལོར་ཁོང་མི་སྒེར་གྱིས་དབུ་འཛུགས་གནང་བ་ཞིག་ཡིན་ཞིང་། དམིགས་ཡུལ་གཙོ་བོ་ཐེ་ཝན་དུ་ཡོད་པའི་རྒྱ་རིགས་ཀྱི་ཡུལ་སྐོར་སྤྲོ་འཆམ་པ་དང་སློབ་མ་རྣམས་ལ་བོད་མིའི་སྒྲིག་འཛུགས་ཀྱི་སྲིད་བྱུས་དང་འབྲེལ་བའི་བོད་དོན་ངོ་སྤྲོད་དང་དྲིལ་བསྒྲགས་ཀྱི་ལས་འགུལ་ཞིག་ཆགས་ཡོད་ཀྱང་། ད་ཆ་ཁོང་སྒེར་ཙམ་མིན་པར་ལས་འགུལ་དེར་བོད་མི་དང་ཐེ་ཝན་གྱི་གཞུང་འབྲེལ་མི་སྣ་སོགས་ཀྱིས་དོ་སྣང་ཆེན་པོས་འཛུལ་ཞུགས་ཀྱིས་བོད་དོན་དྲིལ་བསྒྲགས་ལ་ཤུགས་སྣོན་བྱེད་བཞིན་པ་ཞིག་ཡིན་པར་ངོ་སྤྲོད་གནང་སོང་། དེ་བཞིན་ཁོང་གིས་ཁ་སང་གི་ལས་འགུལ་དབུ་འཛུགས་སྐབས་ཀྱི་གསར་འགོད་བསྒྲགས་གཏམ་གྱི་བརྗོད་བྱ་གཙོ་བོ་དེ་ནི་རྒྱ་ནག་གིས་བོད་ས་ཞི་བའི་བཅིངས་གྲོལ་ཞེས་པ་བཏང་ནས་ལོ་ངོ་བདུན་ཅུ་འགྲོ་མུས་ཡིན་ཡང་། རྒྱ་ནག་དམར་ཤོག་སྲིད་གཞུང་གི་དྲག་གནོན་གྱི་སྲིད་བྱུས་ཀྱི་འོག་ཏུ། བོད་ནང་གི་ཆོས་དང་རིག་གཞུང་རྩ་གཏོར་ཐེབས་པ་མ་ཟད། འགྲོ་བ་མིའི་ཐོབ་ཐང་ལ་རྡོག་རོལ་ཚབས་ཆེན་གཏོང་གི་ཡོད་པ་དང་འབྲེལ་ནས། བོད་ཙམ་མིན་པར་རྒྱ་ནག་གི་དབང་སྒྱུར་འོག་གི་གྲངས་ཉུང་མི་རིགས་སྤྱི་ཡོངས་ཀྱི་གནས་བབ་ཉམས་དམས་སུ་འགྲོ་བཞིན་པ་ཞིག་ཡིན་སྟབས་ཐེ་ཝན་ཁུལ་གྱི་མང་ཚོགས་ཀྱིས་གནད་དོན་དེ་མཁྱེན་པའི་ཐོག་ནས་བོད་དང་གྲངས་ཉུང་མི་རིགས་གཞན་ཁག་གི་གནས་བབ་ལ་རྒྱབ་སྐྱོར་དགོས་བ་སོགས་ཡིན་པར་གསུངས་སོང་། གཞན་ཡང་ཁོང་གིས་འདི་ལོར་ཏོག་དབྱིབས་རིམས་ནད་ཀྱི་རྐྱེན་གྱིས་རྒྱ་ནག་སྐམ་ས་ཆེན་པོའི་ཡུལ་སྐོར་སྤྲོ་འཆམ་དེ་འདྲ་མང་པོ་མེད་ཀྱང་། ཐེ་ཝན་ནི་སྤྱི་ཡོངས་ཀྱི་ཆ་ནས་རྒྱ་ཡིག་རྒྱ་སྐད་ཤུགས་ཆེར་སྤྱོད་སའི་རང་དབང་དང་མང་གཙོའི་ས་ཁུལ་ཞིག་ཆགས་ཡོད་སྟབས། ལས་འགུལ་གྱི་ཆེ་ཆུང་ལ་མ་ལྟོས་བར་གནས་ཚུལ་གང་ཞིག་ཕྱིར་ཐོན་ཡང་གཙོ་བོ་རྒྱ་ཡིག་རྒྱ་སྐད་ཀྱི་ལམ་ནས་ཕྱིར་བསྒྲགས་བྱེད་ཀྱི་ཡོད་དུས། རྒྱ་ནག་གི་སྐམ་ས་ཆེན་པོའི་མི་མང་དཀྱུས་མ་རྣམས་ཀྱི་ཁྲོད་དུ་བོད་དོན་དང་འབྲེལ་བའི་གནས་ཚུལ་ཁྱབ་སྤེལ་བྱེད་ཐུབ་པ་ཞིག་ཡིན་ཙང་།  ལོ་རྟག་པར་སུམ་བཅུའི་དུས་དྲན་མ་བསླེབ་བར་དུ་ཟླ་གཅིག་གི་རིང་ལ་རྐང་འཁོར་སྐོར་སྐྱོད་ཀྱི་ལས་འགུལ་དེ་སྤེལ་མུས་ཡིན་པར་གསུངས་སོང་། གཞི་རྩའི་ཐེངས་འདིའི་རྐང་འཁོར་སྐོར་སྐྱོད་ཀྱི་ལས་འགུལ་དེ་ཟླ་གཅིག་གི་རིང་ལ་རེས་གཟའ་ལྷག་པ་འཆར་ཅན་ལ་སྤེལ་རྒྱུ་ཡིན་པ་དང་། གཙོ་བོ་རྒྱ་ནག་སྐམ་ས་ཆེན་པོའི་མི་མང་འདས་སྡོད་ཀྱི་ས་ཁུལ་དང་། རྒྱ་ནག་གི་དངུལ་ཁང་གི་ས་ཚིགས། དེ་བཞིན་ཁུལ་དེའི་གྲོང་ཁྱེར་ཆེ་ཁག་ལ་ཆེད་ཕེབས་ཀྱིས་བོད་དོན་དྲིལ་བསྒྲགས་ཀྱི་སྐོར་སྐྱོད་གནང་རྒྱུ་རེད་འདུག The post ཐེ་ཝན་ནང་དུ་བོད་དོན་དྲིལ་བསྒྲགས་ཀྱི་རྐང་འཁོར་སྐོར་སྐྱོད་ལས་འགུལ་དབུ་འཛུགས། first appeared on vot. The post ཐེ་ཝན་ནང་དུ་བོད་དོན་དྲིལ་བསྒྲགས་ཀྱི་རྐང་འཁོར་སྐོར་སྐྱོད་ལས་འགུལ་དབུ་འཛུགས། appeared first on vot.

ཐེ་ཝན་ནང་དུ་བོད་དོན་དྲིལ་བསྒྲགས་ཀྱི་རྐང་འཁོར་སྐོར་སྐྱོད་ལས་འགུལ་དབུ་འཛུགས།

ཉེ་ལམ་ཟླ་ ༡ ཚེས་ ༢༡ ཉིན་རྒྱ་གར་མངའ་སྡེ་ཧར་ཡ་ནའི་གྲོང་ཁྱེར་ཨམ་བྷ་ལ་ནང་ Potala Tibetan Refugee Market ཞེས་བོད་མིའི་སུད་ཚོང་གཉེར་སའི་ཁྲོམ་རར་མེ་སྐྱོན་ཕོག་པ་དང་སྦྲགས། སུད་ཚོང་གཉེར་མཁན་ཚོར་གདུང་སེམས་མཉམ་བསྐྱེད་དང་འབྲེལ་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོའི་ངལ་སེལ་ཐེབས་རྩ་དང་ཕྱི་རྒྱལ་གནས་བཞུགས་བོད་མི་སྤུན་མཆེད་ཁག་ཅིག་གིས་ཞལ་འདེབས་གནང་བའི་ཐོག་ནས་རོགས་རམ་གནང་འདུག ཨམ་བྷ་ལའི་བོད་མི་སུད་ཚོང་གཉེར་མཁན་གྱི་ཁྲོམ་ས་བཅུ་ཡོད་པ་དེར་མེ་སྐྱོན་ཚབས་ཆེན་ཕོག་ཏེ་ཚོང་པ་ཚོས་ཚོང་ཟོག་དང་དངུལ་རྣམས་མེར་འཚིག་ནས་གྱོང་གུད་ཕོག་པར་བོད་མི་མང་སྤྱི་འཐུས་ལྷན་ཚོགས་ཀྱི་ངོས་ནས་ཐུགས་གསོ་དང་གདུང་སེམས་མཉམ་བསྐྱེད་མཚོན་ཕྱིར་ཚོགས་གཙོའི་ངལ་སེལ་ཐེབས་རྩ་ནས་ཞལ་འདེབས་ཧིན་སྒོར་ཁྲི་ལྔ་གསོ་སྩལ་གནང་འདུགདེ་བཞིན་ཡུ་ཊུབ་བརྙན་འཕྲིན་བཟོ་མཁན་དཀོན་མཆོག་ལགས་བརྒྱུད་ཨ་རི་ཀོ་ལོ་ར་ཌོ་གནས་བཞུགས་བོད་མི་སྤུན་མཆེད་ཁག་ཅིག་གིས་ཁོང་རྣམ་པའི་ཨ་མ་ལགས་དམ་པའི་ཆེད་དུ་ཁྱོན་འབུམ་བཅུའི་ཞལ་འདེབས་གནང་ཡོད།གཞི་རྩའི་ཨམ་བྷ་ལའི་མེ་སྐྱོན་དོན་རྐྱེན་ཁྲོད་ཧིན་སྒོར་འབུམ་ ༩༨ ལྷག་གི་གྱོང་གུད་ཕོག་ཡོད་པ་མ་ཟད་ད་བར་བོད་མི་ཚོགས་སྒེར་ཁག་ཅིག་ནས་གདུང་སེམས་མཉམ་བསྐྱེད་སླད་ཚོང་པ་རྣམས་ལ་ཞལ་འདེབས་གནང་བ་བྱུང་འདུག  ཨམ་བྷ་ལའི་བོད་མིའི་སུད་ཚོང་གི་ཚོགས་གཙོ་བསོད་ནམས་ལགས་ཀྱིས་བོད་མི་སུད་ཚོང་བ་རྣམས་ནས་རང་ཉིད་ཀྱི་བདེ་སྡུག་ཞུ་ཕྱིར་བོད་མིའི་སྒྲིག་འཛུགས་ནང་སྲིད་ལས་ཁུངས་སུ་ཆེད་བཅར་ཞུ་གྱི་ཡོད་སྐོར་གསུངས་སོང་། The post ཨམ་བྷ་ལའི་མེ་སྐྱོན་དོན་རྐྱེན་ཁྲོད་སྤྱི་འཐུས་ལྷན་ཚོགས་གཙོས་ཕྱི་རྒྱལ་གནས་བཞུགས་བོད་མིས་ཞལ་འདེབས་གནང་བ།   first appeared on vot. The post ཨམ་བྷ་ལའི་མེ་སྐྱོན་དོན་རྐྱེན་ཁྲོད་སྤྱི་འཐུས་ལྷན་ཚོགས་གཙོས་ཕྱི་རྒྱལ་གནས་བཞུགས་བོད་མིས་ཞལ་འདེབས་གནང་བ།   appeared first on vot.

ཨམ་བྷ་ལའི་མེ་སྐྱོན་དོན་རྐྱེན་ཁྲོད་སྤྱི་འཐུས་ལྷན་ཚོགས་གཙོས་ཕྱི་རྒྱལ་གནས་བཞུགས་བོད་མིས་ཞལ་འདེབས་གནང་བ།  

ཕྱི་ཟླ་ ༢ ཚེས་ ༤ ཉིན་རྒྱལ་སྤྱིའི་འབྲས་ནད་ཉིན་མོ་ཡིན་པ་དང་བསྟུན་ཁ་ཉིན་སྔ་དྲོ་ནས་ཉིན་འཁྱོངས་རིང་བོད་ཀྱི་འབྲས་ནད་ཚོགས་པས་མེག་ལོར་ཁྲོམ་གཞུང་དུ་ Close The Care Gap ཞེས་འབྲས་ནད་པ་རྣམས་ལ་སྨན་བཅོས་མཐུན་རྐྱེན་གྱི་ཐོབ་ཐང་གཅིག་མཚུངས་དགོས་པའི་མཚན་རྟགས་བསྡུ་རུབ་དང་རིན་མེད་ཐོག་ H-pylori  ཞེས་ཕོ་བར་ནད་འབུ་ཡོད་མེད་ཀྱི་བརྟག་དཔྱད་གནང་སྟེ། ནད་ཀྱི་སྔོན་འགོག་དང་སྨན་བཅོས་ཀྱི་གོ་རྟོགས་ལས་འགུལ་སྤེལ་བ་མ་ཟད། བོད་མིའི་སྒྲིག་འཛུགས་བདེ་སྲུང་བཀའ་བློན་རྒྱ་རི་སྒྲོལ་མ་མཆོག་གིས་ལས་འགུལ་དབུ་འབྱེད་གནང་སོང་།བོད་ཀྱི་འབྲས་ནད་ཚོགས་པའི་འགན་འཛིན་ཚུལ་ཁྲིམས་རྡོ་རྗེ་ལགས་ཀྱིས་གསར་འགོད་པ་རྣམས་ལ་སྤྱིར་རྒྱལ་སྤྱིའི་འབྲས་ནད་ཉིན་མོ་དེ་ཕྱི་ཟླ་ ༢ ཚེས་ ༤ ཉིན་ཁེལ་གྱི་ཡོད་ཀྱང་། ཉིན་དེར་རྒྱ་ནག་གི་རྒྱལ་ས་པེ་ཅིང་དུ་དགུན་དུས་ཨོ་རྩལ་འགྲན་ཚོགས་ཚོགས་ཀྱི་ཡོད་སྟབས་བོད་མིའི་འཐབ་རྩོད་དེ་གནད་ཆེར་ངོས་འཛིན་ནས་ཉིན་གཅིག་འཕར་འགྱང་གནང་ཡོད་སྐོར་ངོ་སྤྲོད་གནང་བ་དང་སྦྲགས།འཛམ་གླིང་ཁྲོད་དུ་ལོ་འཁོར་གཅིག་ནང་འབྲས་ནད་ཕོག་མཁན་མི་ས་ཡ་བཅུ་ཙམ་བྱུང་གི་ཡོད་པ་དང་དེ་དག་ལས་བརྒྱ་ཆ་བདུན་ཅུ་ཙམ་ལོ་ ༦༥ ལྷག་འབའ་ཞིག་ཆགས་ཀྱི་ཡོད་པ་ནི་སྨན་བཅོས་ཀྱི་མཐུན་རྐྱེན་མ་འཛོམ་པའི་དབང་གིས་ཡིན་སྟབས། ད་ལན་རྒྱལ་སྤྱིའི་འབྲས་ནད་ལྷན་ཚོགས་ཀྱིས་ཉིན་མོ་དེར་ Close The Care Gap ཞེས་འབྲས་ནད་པ་རྣམས་ལ་སྨན་བཅོས་མཐུན་རྐྱེན་གྱི་ཐོབ་ཐང་གཅིག་མཚུངས་དགོས་པའི་གོ་རྟོགས་ཀྱི་ལས་འགུལ་སྤེལ་བ་བཞིན་བཙན་བྱོལ་བོད་མིའི་སྤྱི་ཚོགས་ཁྲོད་ས་ཁུག་ལུང་ཁུག་ཁག་ཏུ་ལ་ཡོད་པའི་ནད་པ་རྣམས་ལ་སྨན་བཅོས་ཀྱི་ཐུན་རྐྱེན་དེ་ཙམ་རག་གི་མེད་སྟབས། དབུས་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱིས་གཙོས་པའི་བོད་མི་མང་སྤྱི་འཐུས་ལྷན་ཚོགས་སུ་སྨན་བཅོས་མཐུན་རྐྱེན་སྦྱོར་སྤྲོད་ཐོག་ལ་གྲོས་ཆོད་གཏན་འབེབས་གནང་ཐུབ་གལ་ཡིན་པའི་དགོངས་ཚུལ་གསུངས་ཡོད། དེ་བཞིན་བོད་མིའི་སྤྱི་ཚོགས་ནས་མཆིན་པའི་གཉན་ཚད་དང་ཕོ་བར་འབྲས་ནད་ཕོག་མཁན་མང་ཤོས་དང་། གཞན་ཡང་ནུ་མ་དང་པགས་པ་སོགས་ཀྱི་འབྲས་ནད་ཕོག་མཁན་ཡང་མང་པོ་ཡོད་སྟབས། རྒྱལ་སྤྱིའི་འབྲས་ནད་ཀྱི་ཉིན་མོ་དང་བསྟུན་རིན་མེད་ཐོག་ H-pylori  ཞེས་ཕོ་བར་ནད་འབུ་ཡོད་མེད་ཀྱི་བརྟག་དཔྱད་གནང་བ་མ་ཚད་པར་འབྲས་ནད་རིགས་ལ་སྨན་བཅོས་དུས་ཐོག་ཏུ་གནང་ཚེ་འཆི་ཡི་མ་རེད་ཅེས་པའི་མཚན་རྟགས་བསྡུ་རུབ་གནང་ཡོད།བོད་མིའི་སྒྲིག་འཛུགས་བདེ་སྲུང་བཀའ་བློན་རྒྱ་རི་སྒྲོལ་མ་མཆོག་གིས་བོད་ཀྱི་འབྲས་ནད་ཚོགས་པས་རྣམ་ཀུན་དང་ལྷག་དོན་ཏོག་དབྱིབས་ནད་དུག་ཁྱབ་གདལ་ཁྲོད་སྤོབས་པ་གནང་འོས་པའི་ཕྱག་ལས་གནང་བར་བསྔགས་བརྗོད་དང་། ཕྱི་ཟླ་ ༢ ཚེས་ ༠༤ ཉིན་མོ་དེ་བོད་ཀྱི་འཐབ་རྩོད་དང་ཆབ་སྲིད་ལ་ཉིན་མོ་གལ་ཆེ་ཞིག་ལ་གཟིགས་ཏེ་འཕར་འགྱང་གནང་བར་ཐུགས་རྗེ་ཆེ་ཞེས་གསུངས་པ་དང་ཆབས་ཅིག ཁོང་སྐུ་སྒེར་གྱི་ཁྱིམ་དུ་ཆ་མཚོན་ན་ཡབ་དམ་པ་དང་གཅེན་པོ་བཀའ་ཟུར་རྒྱ་རི་བློ་གྲོས་རྒྱལ་མཚན་མཆོག་རྣམ་གཉིས་ཀྱང་ནད་གཞི་དེའི་རྐྱེན་གྱིས་འདས་གྲོངས་སུ་གྱུར་ཡོད་སྟབས། བོད་མི་ཚོས་ངེས་པར་དུ་སྔོན་འགོག་གི་ཐབས་ལམ་དང་སྨན་བཅོས་སོགས་གནང་དགོས་པའི་གཞེན་སྐུལ་གནང་ཡོད། The post འབྲས་ནད་ཕོག་མཁན་ཡོངས་ལ་སྨན་བཅོས་མཐུན་རྐྱེན་གྱི་ཐོབ་ཐང་གཅིག་མཚུངས་དགོས་པའི་ཞུ་སྐུལ། first appeared on vot. The post འབྲས་ནད་ཕོག་མཁན་ཡོངས་ལ་སྨན་བཅོས་མཐུན་རྐྱེན་གྱི་ཐོབ་ཐང་གཅིག་མཚུངས་དགོས་པའི་ཞུ་སྐུལ། appeared first on vot.

འབྲས་ནད་ཕོག་མཁན་ཡོངས་ལ་སྨན་བཅོས་མཐུན་རྐྱེན་གྱི་ཐོབ་ཐང་གཅིག་མཚུངས་དགོས་པའི་ཞུ་སྐུལ།

དེ་རིང་ཕྱི་ཟླ་ ༢ ཚེས་ ༤ རེས་གཟའ་པ་སངས་ཉིན་མོར་རྒྱ་ནག་གི་རྒྱལ་ས་པེ་ཅིང་དུ་རྒྱལ་སྤྱིའི་དགུན་དུས་ཨོ་རྩལ་དངོས་སུ་འགོ་འཛུགས་བྱེད་ཀྱི་ཡོད་པ་ལྟར་བཞུགས་སྒར་དུ་རྟེན་གཞི་བྱས་པའི་བོད་མིའི་གཞུང་འབྲེལ་མིན་པའི་ཚོགས་པ་ཆེ་ཁག་ལྔ་ཟུང་འབྲེལ་ཐོག་དགུན་དུས་ཨོ་རྩལ་འགྲན་ཚོགས་ལ་སྐྱོན་བརྗོད་ཀྱི་གསར་འགོད་གསལ་བསྒྲགས་དང་དེ་བཞིན་ཉིན་རངས་ཟས་བཅད་ངོ་རྒོལ་གྱི་ལས་འགུལ་སྤེལ་སོང་།ཚོགས་པ་ལྔ་པོའི་གསར་འགོད་གསལ་བསྒྲགས་ཐོག་རྒྱ་གཞུང་གིས་བཙན་གནོན་འོག་བོད་ནང་གི་བོད་མི་ཚོར་གཞི་རྩའི་འགྲོ་བ་མིའི་ཐོབ་ཐང་མེད་སྐོར་ལུང་འདྲེན་དང་འབྲེལ། འཛམ་གླིང་ས་ཕྱོགས་གང་སར་ཡོད་པའི་ཕྱི་རྒྱལ་ཡུལ་མི་དང་གནད་ཡོད་མི་སྣ་རྣམས་ནས་བོད་མི་རིགས་ཀྱི་འཐབ་རྩོད་ལ་མུ་མཐུད་ནས་རྒྱབ་སྐྱོར་གནང་སྐྱོང་ཡོང་བའི་འབོད་སྐུལ་ཞུས་པ་དང་། པེ་ཅིང་དགུན་དུས་ཨོ་རྩལ་འགྲན་ཚོགས་འཚོགས་བཞིན་པ་འདི་ནི་རྒྱལ་སྤྱིའི་སྤྱི་ཚོགས་ཀྱི་ངོས་ནས་རྒྱ་ནག་ལ་གདོང་ལེན་ཚད་ལྡན་ཞིག་གནང་མ་ཐུབ་པའི་རྟགས་མཚན་གསལ་པོ་ཞིག་ཕྱིར་མངོན་པར་ངོས་འཛིན་ཞུ་བཞིན་ཡོད་པ་དང་ཆབས་ཅིག  རྒྱ་གཞུང་གིས་བོད་མི་ཙམ་མ་ཟད་མི་རིགས་གཞན་ལའང་དྲག་གནོན་གྱི་སྲིད་བྱུས་གཅིག་མཚུངས་ལག་བསྟར་དང་རྒྱ་མི་རིགས་ནང་ཁུལ་ལའང་རང་དབང་དང་འདྲ་མཉམ་ཀྱི་ཐོབ་ཐང་མེད་པའི་གནས་སྟངས་ཁྲོད་པེ་ཅིང་དུ་དགུན་དུས་ཨོ་རྩལ་འགྲན་ཚོགས་བསྐོང་ཚོགས་བྱས་པ་ནི་འོས་འཚམས་ཤིག་གཏན་ནས་མ་རེད་ཅེས་མཐའ་གཅིག་ཏུ་ངོ་རྒོལ་ཡོད་པ་གསུངས་ཡོད།   དེ་བཞིན་རྒྱ་ནག་དང་ལྷན་མང་གཙོའི་རྒྱལ་ཁབ་ཚོས་ཚོང་འབྲེལ་གསར་འཛུགས་བྱས་ཡོད་པས་ད་ཆ་མང་གཙོའི་རྒྱལ་ཁབ་ཁག་གི་དབུ་ཁྲིད་ཚོས་འདས་པའི་ལོ་རྒྱུས་དང་སྲིད་བྱུས་ལ་བསྐྱར་ཞིབ་གནང་སྟེ་མང་གཙོ་སྲུང་སྐྱོབ་དང་དར་སྤེལ་ཆེད་རྒྱ་ནག་ལ་འཛེམ་ཟོན་དང་བཅས་པའི་སྲིད་བྱུས་ཡོད་པ་དེ་དག་འཕྲལ་མར་མཚམས་འཇོག་དགོས་པ་མ་ཟད། རྒྱ་ནག་ནས་༸ཀུན་གཟིགས་པཎ་ཆེན་དགེ་འདུན་ཆོས་ཀྱི་ཉི་མ་མཆོག་གིས་གཙོས་བོད་ཀྱི་ཆབ་སྲིད་བཙོན་པ་རྣམས་ཆ་རྐྱེན་གང་ཡང་མེད་པར་གློད་བཀྲོལ་དགོས་པའི་གནོན་ཤུགས་སྤྲོད་དགོས་ཞེས་འབོད་སྐུལ་བསྐྱར་ནན་གནང་སོང་། གསར་འགོད་པས་རྒྱ་གར་བོད་རང་བཙན་སློབ་ཕྲུག་ཚོགས་པའི་ཚོགས་གཙོ་རིག་འཛིན་ཆོས་སྒྲོན་ལགས་སུ་དེ་རིང་གི་ཉིན་མོ་དང་འབྲེལ་བཅར་འདྲི་ཞུས་པར་ཁོང་གིས་ཐེངས་འདིའི་ཨོ་རྩལ་དང་འབྲེལ་གཞུང་འབྲེལ་མིན་པའི་ཚོགས་པ་ཚོས་ད་བར་ལས་འགུལ་རབ་དང་རིམ་པ་སྤེལ་ཡོད་པ་དང་། ལྷག་པར་རྒྱལ་སྤྱིའི་ཁྲོད་རྒྱ་ནག་གི་ཨོ་རྩལ་ལ་ངོ་རྒོལ་ཤུགས་ཆེ་གནང་རྐྱེན་ད་ཆ་རྒྱལ་ཁབ་ཁག་ཅིག་ནས་ཨོ་རྩལ་འགྲན་ཚོགས་ལ་གཞུང་འབྲེལ་སྐུ་ཚབ་ཕེབས་རྒྱུ་མིན་པའི་ཐག་གཅོད་གནང་སྐོར་གསུངས་པ་དང་ཆབས་ཅིག   ཁས་ས་རྒྱ་གར་ནས་ཀྱང་དེ་གའི་སྐུ་ཚབ་ཆེད་གཏོང་མ་གཏང་རྒྱུའི་ཐག་གཅོད་གནང་ཡོད་པས་དེར་བསྔགས་བརྗོད་དང་ཐུགས་རྗེ་ཆེ་ཞེས་ཞུས་སོང་།  ལྷག་པར་ཁོང་གིས་རྒྱལ་སྤྱིའི་དབུ་ཁྲིད་ཚོས་རྒྱ་ནག་ནས་རང་ཉིད་ཀྱི་ནོར་འཁྲུལ་ཅན་གྱི་སྲིད་བྱུས་ལག་བསྟར་མཚམས་འཇོག་དགོས་པའི་གནོན་ཤུགས་སྤྲོད་པའི་དུས་ལ་བབ་ཡོད་ཅེས་གསུངས་ཡོད།གཞི་རྩའི་དེ་རིང་རྒྱ་ནག་གི་དགུན་དུས་ཨོ་རྩལ་འགོ་འཛུགས་དང་བསྟུན་ནིའུ་ཡོག་དང་ཁེལ་ཕོར་ནི་ཡ། དེ་བཞིན་མེཀ་སི་ཀོ་བཅས་ཀྱི་ནང་དུ་ཡོད་པའི་བོད་མི་དང་བོད་དོན་རྒྱབ་སྐྱོར་བ་རྣམས་ཀྱིས་སོ་སོའི་ས་གནས་སུ་རྟེན་གཞི་བྱས་པའི་རྒྱ་ནག་གཞུང་ཚབ་མདུན་དུ་ངོ་རྒོལ་གྱི་ལས་འགུལ་སྤེལ་ཡོད་པ་དང་། ཨོ་སི་ཊོ་ལི་ཡ་ལྟ་བུར་མཚོན་ན་བོད་མི་ལས་འགུལ་བ་རྣམས་ནས་ཚེས་ ༣༡ ཉིན་དབུ་འཛུགས་ཞུས་པའི་བོད་དོན་གོམ་བགྲོད་ཀྱི་ལས་འགུལ་དེ་བཞིན་སིཌ་ནི་གྲོང་ཁྱེར་ Martin Place ནང་མཇུག་སྒྲིལ་གྱིས་གཞི་རྒྱ་ཆེ་བའི་ལས་འགུལ་སྤེལ་བ་མ་ཟད། ནིའུ་ཛ་ལན་ཌི་ནང་དུའང་རྒྱ་ནག་གི་གཞུང་ཚབ་མདུན་དུ་བོད་མི་ཚོས་ངོ་རྒོལ་གྱི་ལས་འགུལ་སྤེལ་འདུག་ལ། ཁེ་ན་ཌ་ནང་ལའང་དེ་མཚུངས་ཀྱི་ལས་འགུལ་སྤེལ་རྒྱུ་ཡིན་པ་རེད། The post  པེ་ཅིང་དུ་དགུན་དུས་ཨོ་རྩལ་འགྲན་ཚོགས་ཚོགས་པ་དེ་ནི་འོས་འཚམས་ཤིག་མ་རེད། first appeared on vot. The post  པེ་ཅིང་དུ་དགུན་དུས་ཨོ་རྩལ་འགྲན་ཚོགས་ཚོགས་པ་དེ་ནི་འོས་འཚམས་ཤིག་མ་རེད། appeared first on vot.

 པེ་ཅིང་དུ་དགུན་དུས་ཨོ་རྩལ་འགྲན་ཚོགས་ཚོགས་པ་དེ་ནི་འོས་འཚམས་ཤིག་མ་རེད།

Voice of Tibet’s main objectives are to provide a channel for unbiased information and news to the Tibetans living under Chinese oppression in Tibet, to help preserve the threatened Tibetan culture, to educate the Tibetans in internationally acknowledged human rights, to inform about democracy and the democratic institutions of the Tibetan exile community, and to help prevent conflicts and discrimination. Another main objective is to improve communications within as well as between the Tibetan exile communities.

hubhopper

Voice of Tibet

hubhopper