An der Emissioun am Gespréich um Freideg iwwer Sport tëscht 12 an 13 Auer war d'Presidentin vun der Lasep d'Invitée beim Franky Hippert.

RTL - Am Gespréich

Nicole Kuhn-Di Centa: Wichtegkeet vun der Beweegung a vum Sport bei de Kanner, 13/03/2020 12:10

D’Nicole Kuhn-Di Centa war Invitee beim Franky Hippert an der Emissioun am Gespréich um Freideg iwwer Sport. Mat der neier Presidentin vun der Lasep, hu mer tëscht 12h an 13h iwwert d’Wichtegkeet vun der Beweegung a vum Sport bei de Kanner geschwat. Wat sinn d’Erausfuerderungen vun der Ligue des Associations Sportives de l’Enseignement Primaire, an wat muss sech an Zukunft am Beräich vun der Beweegung bei de Kanner onbedéngt hei zu Lëtzebuerg veränneren respektiv verbesseren? Dat waren just e puer vun den Sujeten tëscht 12h an 13h op RTL Radio Lëtzebuerg!

Am Gespréich: Nicole Kuhn-Di Centa, 13/03/2020 12:10

Léierin war se an engem éischte Beruffsliewen, mä dobäi huet se och de Gesank entdeckt, haut ass d’Mariette Lentz a béide Funktiounen aktiv: als Sopranistin op de Musekbünen an als Gesanksproff am Conservatoire zu Ettelbréck. Ëmmer erëm begeeschtert se sech awer och fir besonnesch Projeten. Een esou e Projet heescht „Radio Days“ a beschäftegt sech mat dem Radio a senger Musek an de Joren tëscht 1930 an 1955. Ausserdeem trëtt se mam Ensembel Kammerata Luxembourg op.

Am Gespréich: Mariette Lentz, 12/03/2020 12:10

Mam President vun de Privatwënzer schwätze mer iwwert d'Aarbecht an de Lëtzebuerger Wéngerten. Viru 40 Joer huet den Här Schumacher als Wënzer ugefaangen a vun deemools bis haut huet sech nawell vill geännert. Vum Schneide vun de Riewen, iwwer d'Sprëtzen bis hin zum Ëmgank mat den Drauwen. Wéi vill Zäit muss een am Joer investéieren, wat sinn d'Suergen vun de Privatwënzer a wéi gi si mam Klimawandel ëm? Den Expert verréit eis ausserdeem wourunner mer e gudde Wäin erkennen. 

Am Gespréich: Erny Schumacher, 11/03/2020 12:10

D'Finaliste si fonnt an der Success Story op RTL Tëlee Lëtzebuerg an elo stinn d'Challengen an d'Haus. Haut schwätze mir vun der Success Story, an där Emissioun an där nees dee Kandidat gesicht gëtt mat der beschter Geschäftsiddi. Wat heescht iwwerhaapt ''bescht'' a wat alles derhannert stécht, erzielen eis d'Carole Muller CEO vum Fischer an de Serge Nickels vun der Fuse.

Am Gespréich: Carole Muller a Serge Nickels, 10/03/2020 12:10

20 Joer laang an der Regierung; lo benevol fir d'Caritas sozial engagéiert: d'Marie-Josée Jacobs ass och no hirem Depart als Ministesch virun 7 Joer nach ëmmer aktiv - a steet mat Häerzblutt fir "causen" an, déi Hir wichteg sinn.D'CSV-Politikerin ass Invitée vum Roy Grotz an der Mëttesstonn, wou mer op eng Panoplie vu SUjeten aginn, nieft der Aarbecht fir d'Caritas natirlech eng vue op d'aktuell Politik an d'Racinen vun der Mme Jacobs am Eisléck.D'Invitée am Gespréich um Méindeg op RTL Radio Lëtzebuerg ass d'Marie-Josée Jacobs, live an Toun a Bild natierlech och op rtl.lu

Am Gespréich: Marie-Josée Jacobs, 09/03/2020 12:10

Wéi all éischte Freideg am Mount, hu mer och dës Woch nees eng Table-ronde an eiser Emissioun am Gespréich iwwer Sport tëscht 12h an 13h! Sujet dës Kéier ass; wéivill Amerikaner, non-jicl’en oder soll ee besser soen « Proffien » sollen kënnen am Lëtzebuerger Basketball um Terrain stoen? 5, 3, 2 oder awer just 1, wéi et nach virun e puer Joer de Fall war? An wat kann een géint dat villt Austauschen vun den Amerikaner am Laf vun der Saison maachen? Inviteeën beim Franky Hippert sinn de Frank Arendt President vun der Sparta Bartreng, de Frank Muller Spiller vum T71 Diddeleng, den Erny Gruskovnjak laang Joren Dammentrainer bei de Musel Pikes an lo Cadettrainer bei der Amicale Steesel, an den RTL Basketballexpert Guy Seyler.

Am Gespréich iwwer Sport: Table-ronde iwwer, wéivill Proffien pro Equipe am Lëtzebuerger Basketball?, 06/03/2020 12:10

Capitani, Superjhemp, Péitruss - oder Ivanov, Dom Juan, The Pillowman, den Acteur Jules Werner fillt sech virun der Kamera an op der Bün gläich wuel. Den Ament ass en als Ivanov op der Bün vum Groussen Theater ze gesinn an enger Mise en scène vum Myriam Muller. Ïwwer déi vill verschidde Rollen huet de Jules Werner de Mëtteg geschwat an huet och verroden, wéi ee sech dann esou no enger Virstellung fillt. Ob een do séier nees erof kënnt aus senger ganzer Spannung. 

Jules Werner, 05/03/2020 19:45

Capitani, Superjhemp, Péitruss - oder Ivanov, Dom Juan, The Pillowman, den Acteur Jules Werner fillt sech virun der Kamera an op der Bün gläich wuel. Net ëmmer sinn et déi sympatheschst Rollen, déi e verkierpert, mä sécher si grad dat déi Intressantst. Den Ament wiesselt e vrun allem vun enger Büneroll an déi aner, vun enger Sprooch an déi aner, vun engem Theater an deen aneren. Wou en iwwerall ze gesinn ass zu Lëtzebuerg an am Ausland, doriwwer geet Rieds de Mëtteg am Gespréich mam Jules Werner. 

Jules Werner, 05/03/2020 12:10

Den Autogenen Training huet eng Geschicht. An déi feiert dëst Joer hiren 100ten Anniversaire.    

Marie-Anne Lux iwwer Autogenen Training, 04/03/2020 12:10

D'Faaschtenzäit ass am Gaangen a vill Leit si motivéiert fir e puer Kilo ofzehuelen. Dofir ass d'Faaschten awer net alleng do: wann een et serieux mécht, soll de Kierper Gëftstoffer ausstoussen, déi en deels schonn iwwer Joren agelagert huet (zum Beispill am Daarm, an der Liewer an an de Longen).  

Am Gespréich: Marianne Kollmesch, 03/03/2020 12:10

Mam Sekretär vun der ASBL "Orang Utan Help Lëtzebuerg" hu mer iwwert de Misär vun de Mënschenafen duerch d'Palmueleg-Industrie geschwat. Am Fong si mir alleguerte mat dru Schold well deen Ueleg a ville vun eise Liewensmëttelen ze fannen ass, och wa mer eis dees net bewosst sinn. A Malaysia an Indonesien ginn all Joer Hektare Reebësch ofgeholzt oder verbrannt fir Palmueleg-Plantagen unzeleeën. Net nëmmen d'Orang-Utanen si vum Verloscht vun deem Liewensraum betraff, mä nach e ganze Koup aner Déieren ewéi de Java-Leopard an de Sumatra-Tiger. An der Mëttesstonn gouft Dir gewuer wéi "Orang Utan Help Lëtzebuerg" hëlleft a wéi eng Projeten genee se ënnerstëtzen. 

Am Gespréich: Claude Schiltz, 02/03/2020 12:10

An eiser Emissioun am Gespréich iwwer Sport, hat de Franky Hippert dës Woch en Duell virum Duell! HC Bierchem géint Handball Esch, Raphaël Guden géint Sacha Pulli, grousst Réiserbänner Talent aus dem Sportlycée géint Routinier aus der Minettmetropol dee Geschichtsproff ass. E Samschdeg den Owend ass am Gymnase vun der Coque jo déi grouss Final an der Coupe de Luxembourg mat dem uewegenannte Klassiker. Gëtt et déi 11. Coupe fir Bierchem, oder déi 8. fir Esch? Mir hunn d’Analyse gemaach.

Am Gespréich: mam Sacha Pulli vum HB Esch an mam Raphaël Guden vum HC Bierchem, 28/02/2020 12:10

58 Mol war hien de Kommissar Mario Kopper am "Tatort Ludwigshafen" an huet nieft der Ulrike Volkerts als Lena Odenthal ermëttelt. Virun 2 Joer war den Schauspiller Andreas Hoppe eng leschte Kéier an där Roll am Asaz. De Berliner Acteur huet sech awer zënterhier op aner Terraine gewot: als Acteur, awer och als Auteur an als Natur- an Ëmweltschützer. An deene leschten zwou Funktiounen ass hien haut fir eng Liesung zu Lëtzebuerg mat sengem Buch "Die Hoffnung und der Wolf". An de Mëtteg war den Andreas Hoppe bei eis am Gespréich an huet natierlech iwwer de Kopper an iwwer de Wollef geschwat.

hubhopper

RTL - Am Gespréich

hubhopper