D'Dräierkoalitioun vun DP, LSAP an déi gréng kann no de Chamberwahlen 2018 viru regéieren: dat war fir déi meescht Observateuren eng grouss Iwwerraschung. D'CSV koum - anescht wéi allgemeng erwaart - net zeréck un de Pouvoir. D'Partei, déi zanter 2013 an der Oppositioun ass, huet de leschte 14. Oktober zwee Sëtz verluer. Fir d'LSAP war et bei de Chamberwahlen souguer e Minus vun dräi Sëtz a fir d'DP e Minus vun engem Sëtz. Haaptgewënner waren déi gréng, mat engem Plus vun dräi Sëtz. Nei an der Chamber ass d'Piratepartei mat zwee Sëtz. D'ADR konnt sech vun dräi op véier Deputéierten an der Chamber verbesseren. De Serge Kesseler kuckt zeréck op d'Chamberwahlen 2018.

Dossier vum Dag

Réckbléck: Chamberwahlen 2018

An dëse leschten Deeg vum Joer 2018 gelt et nach eng Kéier zeréckzekucken op d'Evenementer, déi déi lescht 365 Deeg gepräägt hunn. Iwwer kee Land gouf wuel esou vill geschriwwen, wéi iwwer d'USA an och eise Washington-Korrespondent Philip Crowther hat all Hänn voll ze di fir eis iwwer d'Trump-Regierung ze informéieren.

Esou war d'Joer 2018 an den USA

An dësem Jores-Réckbléck kucke mir op d'Wiederkonditiounen zeréck, déi zu Lëtzebuerg virun allem tëschent dem Juni an dem August fir vill Chaos a Schued gesuergt hunn. Nieft den Iwwerschwemmungen am Mëllerdall a weideren Deeler vum Land, hunn och déi héich Temperaturen am Summer fir aussergewéinlech Wiederkonditioune gesuergt. De Maurice Antony huet zeréckgekuckt.

Wiederkapriolen 2018 - Ee Réckbléck

"Merde alors!" Déi Ausso vum Ausseminister Jean Asselborn op engem Treffen am Summer vun den EU-Aussen- an Immigratiounsminister ass wuel deene meeschten nach an Erënnerung. Viséiert war d'Flüchtlingspolitik vum italieneschen Inneminister Matteo Salvini. D'Thema Migratioun war awer net just op europäeschem, mee och op nationalem Plang dëst Joer erëm op der Dagesuerdnung. Ee Réckbléck vum Françoise Keller.

Migratioun 2018 - ee Réckbléck

Wat war EU-méisseg lass? Mir kucken zeréck op d'Woch an Europa - wou de Brexit natierlech weider ganz uewe stoung - awer net nëmmen - et ass ee sech och no laange Verhandlungen eens doriwer ginn, verschidde Plastiks-Saachen ze verbidden. Doriwwer schwätze mir mat eiser EU-Korrepsondentin Danièle Weber.  

Wocheréckbléck: Wat war lass an Europa?

2018 war en turbulent Joer fir de Lëtzebuerger Bistum wéinst dem neie Kierchefong an dem Ofschafe vun de Kierchefabricken.  

Kierchefong: Ee Réckbléck

Et hunn nach ni souvill Leit vun der Hëllef vun ONGe profitéiert, wéi am Joer 2018. Dat seet de Frédéric Haupert, deen zanter 2008 Direkter vun de Hëllefsorganisatioun CARE Lëtzebuerg ass. Duerch déi sëllechen humanitär Krise weltwäit wier d'Aarbecht vun den ONGen ëmmer méi wichteg, géif duerch politesch Entscheedungen awer och dacks behënnert oder ageschränkt ginn, esou den Direkter vu CARE. De Maurice Antony huet sech mam Frédéric Haupert ënnerhalen.

Humanitär Krisen 2018

Um Sommet Enn där leschter Woch hunn d'EU-Staats- a Regierungcheffen der britescher Premierministerin Theresa May verschidde schrëftlech Assurancë mat heem ginn. Ob dës Declaratiounen awer duerginn, fir datt am Januar effektiv eng Majoritéit zu London fir de Brexit-Accord stëmmt, ass ongewëss. An der Tëschenzäit lafen ëmmer méi konkret Preparatioune fir en No-Deal - fir de Fall also datt Groussbritannien ouni Accord aus der EU erausgeet. D'Kommissioun wëllt dës Woch ee roude Fuedem fir esou e Zeenario presentéieren. En Dossier vum Danièle Weber.

D'EU preparéiert sech op en No-Deal

Héich Wunnkäschte sinn zu Lëtzebuerg e vill diskutéiert Thema. Mee net nëmmen hei am Land: vill Groussstied an Europa si mat klammende Wunnkäschten confrontéiert. D'Léisungsusätz si politesch ganz verschidden. Déi éisträichesch Haaptstad Wien gëllt als e Beispill fir eng gelongen Wunnengsbaupolitik. Mee och hei huet ee mat klammenden Terrainspräisser ze kämpfen. Dofir huet déi rout-gréng Stadregierung zu Wien elo eng déifgräifend Mesure ergraff, déi Spekulatioun op klammend Terrainspräisser entgéinttrieden a Loyeren, déi ee sech leeschte kann, garantéiere soll. Eng Korrespondenz vu Wien vum Stephan Polet.

Wéi d'Stad Wien fir bezuelbare Wunnraum suerge well

Jean Asselborn ass enttäuscht datt eng Partie Länner sech géint den UN-Migratiounspakt ausgeschwat hunn. Niewent der Migratioun reagéiert de Lëtzebuerger Ausseminister am Interview mam Maxi Pesch op déi neiste Brexit-Evolutioun an op d'Attentat gëschter Owend zu Stroossbuerg um Chrëschtmaart.

Jean Asselborn

Dëst Joer feiert déi universell Deklaratioun vun de Mënscherechter hire 70. Anniversaire. Grond genuch fir haut - um internationalen Dag vum Mënscherecht - de Bléck op d'Aarbecht vun enger Mënscherechtsorganisatioun ze riichten. De Maurice Antony huet mam Stan Brabant, Direkter vun Amnesty International Lëtzebuerg, iwwer d'Aarbecht an den Impakt vun der Organisatioun am Grand-Duché geschwat.

Amnesty International Lëtzebuerg

D'Regierung steet, d'CSV ass am Gaange sech ze erneieren an d'Chamber ass nees komplett: Dës Woch ass vill geschitt an der Politik. Wéi si verschidden Entwécklungen ze deiten? Eng Analys mam 100,7-Chefredakter Jean-Claude Franck.

Politesche Wocheréckbléck

Den Ament kënnt et zu punktuelle Problemer bei der Ausstellung vu Bréiwer. D'Post-Direktioun erkläert dëst mat de kuerzfristegen Ausfäll beim Personal, déi duerch Congéen oder Krankschreiwungen zustane kommen. D'Bréifdréieschgewerkschaft hëlt méi wäit aus a weist op strukturell Dysfonctionnementer hin, déi duerch eng besser Personalpolitik an Aarbechtskonditioune kéinte gereegelt ginn. De Maurice Antony huet mat de verschiddenen Acteuren geschwat.

Problemer bei der Postzoustellung

De Koalitiounsaccord gesäit vir, datt den Zougang zu Informatioune fir Journaliste soll reforméiert ginn. Eng Mesure, déi d'Journalistegewerkschaft ALJP besonnesch begréisst. Am Interview mam Maxi Pesch reagéiert de President Luc Caregari op den Inhalt vum Koalitiounsaccord, dorënner eng eventuell ëffentlech-rechtlech Tëlee oder nach d'Reform vun der Pressehëllef.

D'Medien am Koalitiounsaccord

Déi nei blo-rout-gréng Regierung misst op d'mannst déi Inklusiounspolitik weiderféieren, déi déi viregt ugefaangen huet. Dat fuerdert de President vun Info Handicap, Olivier Grüneisen, haut um Weltdag vu Mënsche mat enger Behënnerung.

Weltdag vu Mënsche mat enger Behënnerung

Vu méindes bis freides en aktuelle Sujet am Detail: Politik, Soziales, Wirtschaft, Gesellschaft, Kultur

hubhopper

Dossier vum Dag

hubhopper