Jón Atli Benediktsson, rektor Háskóla Íslands, og Vilborg Einarsdóttir, meðstofandi Mentors og framkvæmdastjóri Bravo Earth, ræddu um strákana í skólakerfinu. Tveir af hverjum þremur nemendum Háskóla Íslands eru stelpur og Jón Atli segir mikilvægt að rétta hlutfallið af. Vilborg segir vandamálið ekki vera fjölda stúlkna í háskólum heldur hversu fáir drengir fara í háskólanám. Því í háskólum er brotthvarf kynjanna svipað á meðan yfir 30% drengja hættir í námi á framhaldsskólastigi. Vilborg segir að það sé áhyggjuefni hversu hátt hlutfall drengja getur ekki lesið sér til gagns og spurning um hvort laga þurfi skólakerfið betur að drengjum en nú er. Pétur Ottesen sat á þingi í 42 ár og 250 daga. Farið var yfir þingkosningarnar 1916 þegar Pétur var kjörinn fyrst á þing og eins mál sem hann fór fyrir á Alþingi. Viðtal Stefáns Jónssonar útvarpsmanns við Pétur frá 1. desember 1968, þegar hálf öld var liðin síðan Íslendingar öðluðust fullveldi, var leikið í þætti dagsins. Pétur lést skömmu síðar, eða 16. desember, áttræður að aldri. Einar Sveinbjörnsson veðurfræðingur kom í þáttinn og rætt um árstíðarskiptin, fyrsti vetrardagur er á laugardaginn en síðasti sumardagur var í gær. Nú eru því veturnætur í tvo sólarhringa. Sumarið var hlýtt og það rigndi mikið í september. Á næstunni má búast við því að það verði ágætt veður og lægðirnar færri en oft áður. Einar ræddi loftslagsmálin en í byrjun nóvember fer fram loftslagsráðstefna Sameinuðu þjóðanna í Skotlandi. Ísland fer stefnulaust þangað og það veldur ekki bara Einari vonbrigðum heldur einnig Halldóri Þorgeirssyni formanni Loftslagsráðs. Rætt var við Halldór í Speglinum í gærkvöldi. Tónlist: Ófeigur með Geirfuglunum Umsjón: Björn Þór Sigbjörnsson og Guðrún Hálfdánardóttir.

Morgunvaktin

Strákar í skólakerfinu, þingmaður lengst allra og veðurfar

Erlingur Jóhannsson, prófessor í íþrótta- og heilsufræðum við menntavísindasvið Háskóla Íslands, segir að ungmenni sofi og hreyfi sig of lítið en þetta sýna rannsóknir sem gerðar hafa verið á heilsuhegðun ungra Íslendinga. Töluverð breyting, til hins verra, verður á milli skólastiga og hafa vísindamenn við háskólann rætt við skólayfirvöld um hvað sé til ráða. Svo sem að seinka skóladeginum til klukkan 9. Til þess að ná til ungs fólks hefur menntavísindasviðið komið hlaðvarpi á laggirnar, heilsuhegðun ungra Íslendinga. Erlingur segir að hlaðvarpið hafi fengið góðar viðtökur enda sé hlaðvarp miðill sem ungt fólk nýtir sér og því góð leið til að miðla þekkingu til þeirra. Tími boða og banna sé liðinn þegar kemur að forvörnum, nær sé að fræða og upplýsa. Vera Illugadóttir fjallaði um hérað í Moldóvu, Transnistríu, sem kannski fáir þekkja en knattspyrnulið héraðsins, Sheriff Tiraspol, hefur staðið sig vel í Meistaradeild Evrópu í knattspyrnu í ár. Vera greindi hlustendum frá sögu þessa héraðs og þar á meðal einni af helstu atvinnugrein þess - smygli. Eins fyrirtækjasamsteypu sem er allt í öllu og á þar á meðal samnefnt knattspyrnufélag, Sheriff Tiraspol. Eigendur þess hafa rekið matvöruverslanir, eiga fjarskiptafyrirtæki, bílasölur, fjölmiðla og svo mætti lengi telja. Eigendurnir eru fyrrverandi leyniþjónustumenn en þeir störfuðu fyrir KGB á sínum tíma. Óðinn Svan Óðinsson ræddi við Jón Hjaltason sagnfræðing um þrjá hörmulega eldsvoða á Akureyri á síðustu öld en 18. október voru 115 ár liðin frá miklum eldsvoða á Akureyri; Oddeyrarbrunanum, svokallaða. Fimm árum fyrr, árið 1901, brunnu fimm hús á Akureyri og eins brunnu nokkur hús á Akureyri árið 1911. Tónlist: Fyrir þig með Hjálmum og Er hann birtist með Hjálmum og Mr. Silla. I Say A Little Prayer með Dionne Warwick. Lokalag þáttarins var Kvæðið um litlu hjónin í flutningi Tríós Guðmundar Ingólfssonar. Umsjón: Björn Þór Sigbjörnsson og Guðrún Hálfdánardóttir.

Heilsuhegðun ungmenna, Transnistría og eldsvoðar

Þórður Snær Júlíusson, ritstjóri Kjarnans, fór yfir hraðan vöxt eigna lífeyrissjóðanna í spjalli um efnahag og samfélag. Fjárfestingar lífeyrissjóðanna eru einkum í skráðum félögum og eins í sjóðum. Mest er fjárfest á Íslandi en einnig í útlöndum. Leigumarkaðurinn var einnig til umræðu og eins atvinnuleysi, ekki síst langtímaatvinnuleysi. Arthúr Björgvin Bollason segir að viðræður um myndun nýrrar ríkisstjórnar í Þýskalandi þokist áfram þrátt fyrir að ýmislegt óvænt hafi komið upp undanfarna daga, svo sem skiptar skoðanir um hvort búið sé að ákveða að mynda nýtt loftslagsráðuneyti. Arthúr Björvin ræddi einnig mRNA tæknina sem mögulega verður nýtt við gerð bóluefna við öðrum veirusýkingum en Covid. Eins hvaða áhrif hækkandi hitastig hefur á framleiðslu hvítvíns í Þýskalandi. Ingileif Jónsdóttir, prófessor í ónæmisfræði, segir mikilvægt að bólusetja sem flesta, bæði fullorðna sem og börn. Nú er verið að meta hjá Lyfjastofnun Evrópu og Matvæla- og lyfjaeftirliti Bandaríkjanna hvort nota megi Pfizer við bólusetningar á yngri börnum en þeir sem helst smitast af Covid eru óbólusett börn og Íslendingar af erlendum uppruna. Að sögn Ingileifar þarf að ná betur til síðastnefnda hópsins sem er ekki nægjanlega upplýstur um rétt sinn til bólusetningar hér á landi. Tónlist: Gard times come again no more og Star of the County Down með The Chieftains. The Coffie Song með Frank Sinatra og Don't Let Me Down með Joy Crookes. Umsjón: Björn Þór Sigbjörnsson og Guðrún Hálfdánardóttir.

Eignir lífeyrissjóðanna, ríkisstjórnarviðræður og bóluefni

Andrés Magnússon, framkvæmdastjóri Samtaka verslunar og þjónustu, segir heiminn standa á fordæmalausum tímum þar sem vöruskortur er staðreynd. Þetta er afleiðing Covid-faraldursins en vegna hans lá starfsemi verksmiðja víða niðri. Skipafélögin mörg hver brugðust kolrangt við með því að setja fjölda flutningaskipa í brotajárn með þeim afleiðingum að tafir urðu á afhendingu á vöru. Hann á ekki von á því að vöruskortur verði áberandi í verslunum en sennilega þurfi almenningur að sætta sig við að bíða lengur eftir vörunni en áður. Þetta sé ástand sem muni væntanlega vara fram á næsta ár með tilheyrandi verðbólguþrýstingi. Sigrún Davíðsdóttir fjallaði um morðið á breska þingmanninninum David Amess og viðbrögðum annarra þingmanna. Bókmenntir og tónlist bar einnig á góma í Lundúnaspjalli dagsins. Baldur Þórhallsson prófessor í stjórnmálafræði við Háskóla Íslands, sendi nýverið frá sér bók um alþjóðasamskipti Íslands frá landnámi til stofnunar lýðveldis en samkvæmt rannsóknum Baldurs er ávinningurinn ótvíræður þegar kemur að samfélagslegum málefnum, svo sem varðandi menntun Íslendinga erlendis, trúmálum og fleiri atriðum. Ísland var ekki einangrað þrátt fyrir sjálfsþurftarbúskap um tíma og var hluti af alþjóðlegu markaðssvæði miklu fyrr en flesta grunar. Tónlist: The fool on the hill og Let it be með Bítlunum. Dirty paws með Of monsters and men. Umsjón: Björn Þór Sigbjörnsson og Guðrún Hálfdánardóttir.

Fordæmalausir tímar, morð á þingmanni og alþjóðasamskipti

Sigríður Gunnarsdóttir, framkvæmdastjóri hjúkrunar á Landspítalanum, segir eðlilegt að horfa til Landspítalans þegar kemur að tilslökunum á sóttvarnareglum. Hver geta samfélagsins er að takast á við faraldur eins og Covid. Hún tekur undir neyðaróp hjúkrunarfræðinga og annarra starfsmanna vegna ástandsins á Landspítalanum en þar leikur mannekla og skortur á úrræðum fyrir aldraða lykilhlutverk. Kristján Sigurjónsson, ritstjóri Túrista, fór yfir fjölgun ítalskra ferðamanna á haustdögum og gistimöguleika bæði hér og í Kaupmannahöfn. Það kostar yfir 100 þúsund að gista á hótelum í miðborg Reykjavíkur um næstu helgi. Nýtt hótel hóf starfsemi í vikunni en það er staðsett við Hörpu og er fyrsta fimm stjörnu hótelið í Reykjavík. Lilja Ósk Snorradóttir, kvikmyndaframleiðandi og framkvæmdastjóri Pegasus, tekur vel í hugmyndir Sigurðar Inga Jóhannssonar, formanns Framsóknarflokksins um að fjölga störfum í kvikmyndageiranum á næstu tíu árum. Nú starfa um 2.600 við kvikmyndagerð á Íslandi en Sigurður Ingi vill fjölga þeim í 10 þúsund á tíu árum. Veltan í kvikmyndageiranum nam um 18 milljörðum í fyrra. Lilja framleiðir kvikmyndina Leynilögga sem verður frumsýnd í kvikmyndahúsum 22. október. Tónlist: Stefið úr Bleika pardusnum, Önnur sjónarmið með Eddu Heiðrúnu Backman, Stella í Orlofi með Diddú og Hjálpaðu mér upp með Ný danskri. Umsjón: Björn Þór Sigbjörnsson og Guðrún Hálfdánardóttir.

Alvarleg staða Landspítalans, ferðamenn og kvikmyndir

Norsk málefni voru ofarlega á baugi á Morgunvaktinni í dag. Bæði vegna voðaverkanna í bænum Kongsberg en þar voru fimm drepin í gær og myndun nýrrar ríkisstjórnar. Ríkisstjórn Jonas Gahr Støre tekur við völdum í dag. Herdís Sigurgrímsdóttir stjórnmálafræðingur býr í Noregi og var gestur þáttarins eftir morgunfréttir klukkan átta. Málefni smábátasjómanna voru einnig rædd en þeir Arthúr Bogason formaður Landssambands smábátaeigenda og Örn Pálsson framkvæmdastjóri sambandsins, fjölluðu um aðalfund smábátasjómanna sem hefst í dag. Þar verður meðal annars rætt um strandveiðar en síðasta sumar voru 674 bátar sem tóku þátt í þeim. Dóra Björt Guðjónsdóttir, borgarfulltrúi Pírata, fór yfir hverfiskosningar sem nú standa yfir og lýkur á hádegi sem og lýðræðisstefnu Reykjavíkur. Hún er umfjöllunarefni fundar borgarráðs í dag. Tónlist: Der er ingenting í verden sa stille som sne og Sakner dej nu með Sissel, Aldrei fór ég suður með Bubba Morthens og Ein farfar í livet með Odd Nordstoga. Umsjón: Björn Þór Sigbjörnsson og Guðrún Hálfdánardóttir.

Noregur, smábátasjómenn og hverfið mitt

Henry Alexander Henrysson heimspekingur segir að ekki megi gera lítið úr tilfinningum Birgis Þórarinssonar þingmanns en eins og fram hefur komið þá fór Birgir úr Miðflokknum á föstudag og gekk til liðs við Sjálfstæðisflokkinn. Birgi var þar vel tekið en ýmsir hafa undrast þessi vistaskipti svo stuttu eftir kosningar. Birgir lýsti einelti og vanlíðan vegna Klaustursmálsins sem kom upp fyrir þremur árum síðan þegar hann útskýrði ákvörðun sína. Henry velti fyrir sér hvort réttara sé að ef þingmenn treysti sér ekki til þess að starfa með þeim flokki sem þeir eru kjörnir fyrir þá segi þeir af sér í stað þess að ganga til liðs við annan stjórnmálaflokk. Borgþór Arngrímsson fór yfir dönsk málefni á Morgunvaktinni. Þar á meðal komu Friðriks krónprins til Íslands, stóra minkamálið, slæma stöðu dansks sjávarútvegs og mögulega nýja byggð í Kristjaníu. Sveinn Margeirsson, sveitarstjóri Skútustaðahrepps, sagði Ágústi Ólafssyni, fréttamanni RÚV á Akureyri, frá miklum uppgangi í Mývatnssveit. Meðal annars nýrri og fjölbreyttri starfsemi í gamla grunnskólanum að Skútustöðum. Tónlist: Mrs. Robinson og 50 ways to leave your lover, með Paul Simon. The sounds of silence með Simon og Garfunkel. Kære lille mormor með Richard Ragnvald og að lokum You can call með afmælisbarni dagsins, Paul Simon, en hann er áttræður í dag. Umsjón: Björn Þór Sigbjörnsson og Guðrún Hálfdánardóttir.

Vanlíðan þingmanns, Danmörk og Mývatnssveit

Þórður Snær Júlíusson, ritstjóri Kjarnans, fór yfir stöðu Facebook eftir að Frances Haugen, fyrrverandi starfsmaður Facebook, bar vitni fyrir þingnefnd bandaríska þingsins nýverið. Þar sagði hún samfélagsmiðilinn ala á sundrungu, skaða börn, veikja lýðræðið og að mikilvægt væri að setja reglur yfir hann. Daginn áður hafði tæknilegt vandamál valdið því að samskiptamiðillinn var lokaður í tæpar sjö klukkustundir og eins aðrir miðlar í eigu Facebook, það er Instagram og Whatspp. Hlutabréf Facebook lækkuðu töluvert í verði á Wall Street í kjölfarið en verð þeirra hafði hækkað mikið undanfarna mánuði. Þórður Snær fjallaði einnig um áhrif kórónuveirunnar á fjármál sveitarfélaga í landinu og hversu lítið ríkið hefði komið þar að ólíkt því sem var annarsstaðar á Norðurlöndunum. Undir lok spjallsins um efnahag og samfélag var farið yfir nýleg kaup Sádí-Araba á enska knattspyrnufélaginu Newcastle. Arthúr Björgvin Bollason fjallaði um stjórnarmyndun í Þýskalandi og erfiðleika Kristilega demókrata. Armin Laschet hefur tilkynnt um að hann ætli að láta af störfum sem forystumaður flokksins. Þess í stað ætlar hann að leggja af stað í ferðalag um landið og hlera hvað grasrót Kristilegra demókrata hafi til málana að leggja. Öldungaráð sem kemur saman alla morgna á kaffihúsi sem Arthúr Björgvin sækir í Rínarlöndum hefur sínar skoðanir á öllum mögulegum og ómögulegum málefnum í þýsku samfélagi, ekki síst stjórnmálum. Sigrún Helgadóttir líffræðingur hefur skrifað bók um ævi og störf Sigurðar Þórarinssonar jarðfræðings. Bókin er í tveimur bindum og heitir Mynd af manni. Sigrún sagði frá Sigurði; störfum hans og meðal annars barst talið að textagerð og dagbókarskrifum vísindamannsins. Tónlist: Vestast í Vesturbænum með Nútímabörnum og Spánarljóð með Jónasi Jónassyni ásamt Hljómsveit Svavars Gests. Umsjón: Björn Þór Sigbjörnsson og Guðrún Hálfdánardóttir.

Facebook, pólitík og Mynd af manni

Sonja Ýr Þorbergsdóttir, formaður BSRB, fór yfir stöðu mála nú þegar farið er að sjá fyrir endann á kórónuveirufaraldrinum. Hún segir mikilvægt að ekki verið skorið niður á sama hátt og gert var í kjölfar efnahagshrunsins árið 2008. Sonja Ýr telur mikilvægt að koma í veg fyrir einkavæðingu þegar kemur að heilbrigðisþjónustu og minnir á að stórir hópar Íslendinga eigi erfitt með að láta enda ná saman. Sigrún Davíðsdóttir fór yfir flokksþing stóru stjórnmálaflokkana í Bretlandi, Pandóru-skjölin og söluna á Newcastle knattspyrnufélaginu. Helsti eigandi þess er krónprins Sádí-Arabíu og kom kaupsýslukonan Amanda Staveley að viðskiptunum. Einar Már Guðmundsson rithöfundur er með nýja bók, Skáldleg afbrotafræði nefnist hún. Bókin kemur út á sama tíma á Íslandi og Danmörku og fjallar um glæpaöldina í byrjun nítjándu aldar. Bókin er væntanleg í verslanir á næstu dögum. Tónlist: Woman með John Lennon. Umsjón: Björn Þór Sigbjörnsson og Guðrún Hálfdánardóttir.

Kjör að loknum faraldri, Newcastle og Skáldleg afbrotafræði

Hafdís Hanna Ægisdóttir, forstöðumaður Stofnunar Sæmundar fróða og Pia Hansson forstöðumaður Alþjóðamálastofnunar eru meðal þeirra sem koma að undirbúningi friðarráðstefnu Höfða sem haldin verður í dag. Þar er fjallað um frið út frá mörgum ólíkum sjónarhornum, þar á meðal með tilliti til loftslagsmála. Rætt var um stríð og frið. Kristján Sigurjónsson, ritstjóri Túrista, fjallaði um ferðalög í heiminum og mikilvægi þess að vera með bólusetningarvottorð í farteskinu. Að öðrum kosti gæti fólk lent í vandræðum með að komast leiðar sinnar með almenningssamgöngum, njóta menningar og setjast að snæðingi. Ný spá Isavia varðandi fjölda farþega um flugstöð Leifs Eiríkssonar næstu árin bar einnig á góma. Ásgrímur Sverrisson kvikmyndagerðarmaður kom í þáttinn en í dag verður nýja James Bond myndin, No time to die, frumsýnd á Íslandi. Hún verður sýnd í velflestum kvikmyndahúsum landsins og bara í dag verða sýningarnar 44 talsins. Hvaða James Bond mynd er Ásgrímur hrifnastur að og hver er sú lélegasta að hans mati? Tónlist: James Bond theme, Diamonds are forever með Shirley Bassey, We have all the time in the world með Louis Armstrong og If there was a man með Crissie Hynde. Umsjón: Björn Þór Sigbjörnsson og Guðrún Hálfdánardóttir.

Stríð og friður, ferðalög og James Bond

Ásgeir Brynjar Torfason hagfræðingur segir að vaxtahækkun peningastefnunefndar Seðlabanka Íslands í gær hafi komið á óvart og Ísland sé eitt örfárra ríkja sem er byrjað að hækka vexti eftir heimsfaraldur. Ásgeir Brynjar situr í fjármálaráði og er doktor í fjármálum. Hann segir peningastefnunefndina fara eftir kenningum í hagfræði varðandi verðbólgu og verðbólguvæntingar sem ekki eigi við þegar efnahagsmálin eru eins og þau eru nú í heiminum. Annað sé uppi á teningnum hjá öðrum seðlabönkum, svo sem þeim evrópska og bandaríska. Bogi Ágústsson sat við heimsgluggann og fór yfir Nóbelsverðlaunin og þá sem mögulega eru taldir hljóta bókmenntaverðlaun Nóbels en tilkynnt verður um handhafa þeirra klukkan 11 að íslenskum tíma í dag. Lykt árið 1765 bar einnig á góma sem og möguleikinn á að allir forsætisráðherrar Norðurlanda verði konur í nóvember. Ef af yrði þá er það í fyrsta skipti. Ásmundur G. Vilhjálmsson, lögmaður og sérfræðingur í skattarétti, fór yfir aflandsfélög og lögmæti þeirra. Tilefnið eru Pandóru-skjölin en þau eru samansafn gagna um fjármálagjörninga bæði þjóðarleiðtoga og annarra þar sem eignum er komið fyrir í skattaskjólum. Tónlist: Celeste með bræðrunum Brian og Roger Eno, Chelsea Morning og California með Joni Mitchell. Umsjón: Björn Þór Sigbjörnsson og Guðrún Hálfdánardóttir.

Vaxtahækkun sem kom á óvart, Nóbel og Pandóru-skjölin

Njörður Sigurðsson, sviðsstjóri skjala- og upplýsingasviðs Þjóðskjalasafns, fór yfir skjalageymslu en í nýlegri skýrslu Þjóðskjalasafns Íslands um skjalageymslur ríkisins kemur fram að umfang pappírsskjala hjá ríkinu hefur aukist gífurlega á undanförnum árum og að ríkisstofnanir noti um 17.000 fermetra til að geyma pappírsskjöl. Þörf er á því að ríkisstofnanir taki upp rafræna skjalavörslu svo hægt sé að stöðva þessa þróun en pappírsskjölin eru oft útprent af stafrænu efni. Að öðrum kosti er óvíst hversu mikið þarf af skjalageymslum til að rúma allt þetta magn skjala. Vera Illugadóttir fjallaði um olíuskipið F.S.O. Safer sem liggur úti fyrir ströndu hins stríðshrjáða Jemens með fullar lestar af olíu. Skipið er tifandi tímasprengja og eftir því sem dagarnir líða eykst hættan á að það sökkvi og olían leki út í Rauðahaf eða það hreinlega spryngi með skelfilegum afleiðingum fyrir lífríki sjávar. Það myndi jafnframt þýða að þessi fjölfarna siglingaleið myndi lokast í talsverðan tíma.. Arna Björg Bjarnadóttir nýr verkefnastjóri Glæðum Grímsey var gestur Önnu Þorbjargar Jónasdóttur í hljóðstofu RÚV á Akureyri. Glæðum Grímsey er hluti af áætluninni Brothættar byggðir og hefur verkefniuð verið framlengt til loka næsta árs. Ekkert skólastarf er í Grímsey og segir Arna Björg að hugsa verði málið upp á nýtt og ýmsar hugmyndir uppi um hvernig hægt verður að taka á þessu og auka líkur á að ungt fólk setjist að í Grímsey. Verið er að opna fyrir umsóknir í frumkvæðissjóð og geta allir sótt um fyrir framtíðarverkefni í Grímsey. Tónlist: Dagný í flutningi Sinfóníuhljómsveitar Íslands, Syneta með Bubbi Morthens og Autumn Leaves með hljómsveit Ingimars Eydals. Umsjón: Björn Þór Sigbjörnsson og Guðrún Hálfdánardóttir.

Fullar geymslur af pappír

Þórður Snær Júlíusson, ritstjóri Kjarnans, fjallaði um aðgerðir Seðlabanka Íslands til að draga úr þenslu á húsnæðismarkaði. Verðbólga mælist nú 4,4% og ráðstöfunartekjur heimilanna dragast saman í fyrsta skipti frá árinu 2019. Seðlabankinn hefur einnig ákveðið að endurvekja sveiflujöfnunaraukann. Með því er Seðlabankinn að draga úr útlánagetu viðskiptabankanna en hlutabréf hafa hækkað mikið í verði hér á landi. Fjármál stjórnmálaflokkanna bar einnig á góma því allir stjórnmálaflokkar sem fá 2,5% atkvæða eða meira eiga rétt á framlagi úr ríkissjóði. Arthúr Björgvin Bollason fór yfir stjórnarmyndunarviðræður í Þýskalandi og litlar vinsældir Armin Laschet, kansalaraefni Kristilegra demókrata, en æ fleiri flokksbræður hans og systur gera hann nú ábyrgan fyrir því að flokkurinn hlaut verstu útreið sem hann hefur fengið í kosningum frá upphafi vega. Angela Merkel, kanslari Þýskalands, ávarpaði þjóðina á sunnudag, á sameigingardeginum svonefnda. Þykir hún hafa verið persónulegri í tali en oftast áður. Meðal þess sem hún talaði um voru uppvaxtarárin í Austur-Þýskalandi og áhrif andlýðræðislegra afla á samfélagsmiðlum. Kaþólska kirkjan á í vanda í Þýskalandi líkt og víðar í heiminum. Einkum vegna kynferðisglæpa kirkjunnar þjóna og stöðu kvenna innan kirkjunnar. Ungmennaráð heimsmarkmiða Sameinuðu þjóðanna á Íslandi hefur áhyggjur af stöðu geðheilbrigðismála barna og ungmenna og það vill að þessi málaflokkur rati inn í stjórnarsáttmála komandi ríkisstsjórnar. Þær Ingibjörg Ekla Þrastardóttir, sem situr í ungmennaráðinu og Eva Bjarnadóttir teymisstjóri innanlandsteymi Unicef á Íslandi, fóru yfir geðheilbrigðismál barna og ungmenna á Íslandi. Tónlist: Lag: Over the rainbow og Misty með Gunnari Gunnarssyni og Air með Ellen Andrea Wangþ Umsjón: Björn Þór Sigbjörnsson og Guðrún Hálfdánardóttir

Seðlabankinn grípur til aðgerða

Vanda Sigurgeirsdóttir er nýr formaður Knattspyrnusambands Íslands en bráðabirgðastjórn tók við sambandinu á laugardag. Stjórninni er ætlað að starfa fram að næsta knattspyrnuþingi sem verður haldið í febrúar. Hún ætlar að bjóða sig fram til endurkjörs þá. Vanda segir að það sé hlutverk landsliðsþjálfara að velja lið, ekki stjórnar. Núverandi stjórn kom ekki að þeirri ákvörðun að Aron Einar Gunnarsson yrði ekki valinn í landsliðið núna en það sé hennar persónulega skoðun að meðan mál einstakra leikmanna séu til skoðunar sé eðlilegt að þeir stígi til hliðar. Sigrún Davíðsdóttir fór yfir ný gögn, svonefnd Pandóruskjöl, sem upplýst var um í fjölmiðlum í gær. Um er að ræða upplýsingar um fjölmarga þjóðarleiðtoga og embættismenn sem og þekkt athafnafólk. Skortur á eldsneyti rataði víða í fjölmiðla í síðustu viku og er nú rætt um að mögulega verði skortur á vörum í Bretlandi næstu vikur. Þingmennirnir Björn Leví Gunnarsson Pírötum og Njáll Trausti Friðbertsson Sjálfstæðisflokki fóru yfir stöðu mála í pólitíkinni í síðasta hluta þáttarins. Þar á meðal undir­búnings­nefnd kjör­bréfa­nefndar Al­þingis sem kemur saman í dag. Hennar verkefni er meðal annars að leysa úr þeirri flækju sem komin er upp í Norðvesturkjördæmi. Eins ræddu þingmennirnir mögulegar ríkisstjórnir og Njáll Trausti telur eðlilegt að hann verði ráðherra ef Sjálfstæðisflokkur fer í ríkisstjórn. Tónlist: Unforgettable með Gunnari Gunnarssyni og Blueberry Hill með Fats Domino. Umsjón: Björn Þór Sigbjörnsson og Guðrún Hálfdánardóttir.

Þjálfarar velja leikmenn ekki stjórn

Baldur Þórhallsson, prófessor í stjórnmálafræði, og Snæfríður Grímsdóttir, aðjúnkt í kínverskum fræðum við Háskóla Íslands, eru höfundar nýrrar skýrslu um samskipti Íslands og Kína frá árinu 1995 til ársins 2021. Í kjölfar hrunsins jukust samskipti ríkjanna eftir að forseti Íslands, að höfðu samráði við forsætisráðherra, skrifaði forseta Kína bréf og óskaði eftir viðræðum um að Kínverjar kæmu Íslendingum til aðstoðar. Mjög dró úr samskiptum ríkjanna í kjölfar valdaskipta í Bandaríkjunum þegar Bandaríkin þrýstu á að áhrif Kína í Evrópu yrðu minnkuð. Þetta kemur meðal annars fram í frumvarpi til laga um fjarskipti á Alþingi. Stjórnmálin virðast hafa áhrif á menningu og menntun en afar fáir nemendur eru að læra kínversk fræði á Íslandi og hið sama gildir um nemendur í íslenskum fræðum í Kína. Ferðaþyrstir Íslendingar streyma nú til Spánar og fleiri áfangastaða og eru golfferðir mjög vinsælar. Verð á flugfargjöldum næstu vikur endurspeglar þessa ferðaþörf landans. Það stefnir í að Íslendingar fjölmenni á skíðasvæði Alpanna eftir áramót eftir að Covid-19 lokaði flestum skíðasvæðum fyrir útlendinga síðasta vetur. Kristján Sigurjónsson, ritstjóri Túrista, ræddi ferðalög norrænna ferðamanna þetta haustið. Kjartan Ragnarsson myndlistarmaður er mikill aðdáandi Muggs en yfirlitssýning á verkum Muggs verður opnuð í Listasafni Íslands á morgun. Kjartan ræddi fjölbreyttan feril þessa listamanns sem dó úr berklum aðeins 32 ára gamall. Verkin eru af ýmsum toga, Muggur málaði og teiknaði. Saumaði og skar úr og svo er hann höfundur þekktustu íslensku barnabókarinnar, Dimmalimm. Tónlist: Lay back in the arms of someone með Smokie, Union City Blue með Blondie og Green green grass of tunnel með Múm. Umsjón: Björn Þór Sigbjörnsson og Guðrún Hálfdánardóttir.

Sveiflur í samskiptum Íslands og Kína

Björn Þór Sigbjörnsson, Þórunn Elísabet Bogadóttir og Vera Illugadóttir fylgja hlustendum inn í daginn, skýra baksvið frétta og ræða við áhugavert fólk um Ísland og umheiminn.

hubhopper

Morgunvaktin

hubhopper