Umhverfisráðherra vísar á bug að Ísland leggi ekki fram framtíðarsýn á loftslagsráðstefnu Sameinuðu þjóðanna í Glasgow. Framtíðarsýninni verði skilað áður en ráðstefnan hefst í næstu viku. Tíma taki að vinna sviðsmyndir um hvernig Ísland eigi að ná markmiðum sínum í loftslagsmálum. Lögreglustjórinn á Vesturlandi leitaði ráða hjá embætti ríkissaksóknara í tengslum við rannsókn embættisins á brotum yfirkjörstjórnar Norðvesturkjördæmis á kosningalögum. Á annað hundrað þúsund heimili eru án rafmagns í Frakklandi eftir að óveðurslægðin Áróra fór þar yfir í nótt. Áætlunarferðir járnbrautarlesta fóru úr skorðum í óveðrinu. Um 50-60 hafa smitast af Covid-19 að jafnaði á dag í þessum mánuði. Sviðsstjóri Skóla- og frístundasviðs Reykjavíkurborgar segir skólakerfið á flóknasta staðnum í faraldrinum til þessa. Það eina sem virðist ljóst ef stjórnarflokkarnir ná saman um nýja stjórnarsáttmála er að Katrín Jakobsdóttir verður áfram forsætisráðherra. Leiðtogar flokkanna halda spilunum þétt að sér. Þyngsta og erfiðasta málið sem þeir ræða eru líklega loftslag- og orkumál. Um helgina verða liðnar fjórar vikur frá því að formennirnir settust niður til að freista þess að ná samkomulagi um áframhaldandi stjórnarsamstarf. Arnar Páll Hauksson segir frá. 75% landsmanna eru fullbólusett við COVID-19 og af tólf ára og eldri er hlutfallið farið að nálgast 90%. Um 560 þúsund skömmtum af bóluefnum hefur verið sprautað í landsmenn þegar allt leggst saman, efnum frá Pfizer, Moderna, AstraZeneca og Janssen. Fljótt á litið var samið um kaup á um tólfhundruð og fimmtíu þúsund skömmtum af bóluefnum fyrir grunnbólusetning og þeir skammtar duga til að bólusetja rúmlega sex hundruð þúsund manns. Nú er unnið að því í heilbrigðisráðuneytinu að koma umfram skömmtum þangað sem þeirra er þörf. Anna Kristín Jónsdóttir ræddi við Bjarna Sigurðsson lyfjafræðing. Rafmagn hefur verið dýrara í Noregi í haust en nokkru sinni áður í sögunni. Talað er um allt að tíföldun á verði frá í fyrra. Og verðið sveiflast svo mikið að venjulegt fólk sundlar að sögn við að horfa á rafmagnsmælana. Gísli Kristjánsson útskýrir hvað er að gerast hjá frændum okkar austan Atlantsála.

Spegillinn

Framtíðarsýn skilað í tæka tíð

Starfsfólk Hótels Borgarness sagði í vitnaskýrslu hjá lögreglu að það hefði aldrei átt við kjörgögn úr alþingiskosningunum í Norðvesturkjördæmi. Eini umgangurinn sem sést við talningarsalinn eftir að yfirkjörstjórn er farin eru starfsmenn hótelsins að ganga frá. Karl Gauti Hjaltason, sem kærði endurtalningu atkvæða í Norðvesturkjördæmi til lögreglu, segir að ákvörðun um að sekta yfirkjörstjórnina staðfesti að fyrsta talningin eigi að gilda. Allt starfsfólk New York borgar verður að láta bólusetja sig að fullu gegn kórónuveirunni á næstu dögum. Ella verður það sent heim án launa. Miðstjórn ASÍ varar við sölu á Mílu og krefst þess að stjórnvöld grípi til aðgerða til að tryggja almannahagsmuni. Jón Hjartarson hlaut í dag Bókmenntaverðlaun Tómasar Guðmundssonar fyrir ljóðabókina Troðningar. --- Karl Gauti Hjaltason, sem kærði endurtalningu atkvæða í Norðvesturkjördæmi, segir að ákvörðun lögreglustjórans á Vesturlandi að bjóða kjörstjórnarmönnum að greiða sekt staðfesti að fyrri talningin eigi að standa. Frambjóðandi Pírata sem ekki náði kjöri segir að staðan í málinu kalli á að uppkosning fari fram í kjördæminu. Svo virðist sem kjörstjórnarmenn ætli ekki að þiggja boð um að greiða sekt. Það gæti varðað 12 daga fangelsi. Arnar Páll Hauksson talar við Karl Gauta Hjaltason og Davíð Norðdhal. Öllum þjóðum var boðið að skila og kynna sína framtíðarsýn í loftslagsmálum fyrir loftslagsráðstefnuna í Glasgow. Íslensk stjórnvöld hafa ekki gert það og skila því auðu, sem eru mikil vonbrigði að sögn Halldórs Þorgeirssonar formanns Loftslagsráðs. Ragnhildur Thorlacius talaði við Halldór. Eftir að vera í fararbroddi í að bólusetja gegn Covid-19 hafa Bretar nú tapað þeirri forystu. Ensk heilbrigðisyfirvöld felldu niður varnir í sumar, aðrir landshlutar hafa farið sér hægar. Vonir um að víðtæk bólusetning myndi ein og sér ráða niðurlögum veirufaraldursins hafa ekki gengið eftir. Nýjum tilfellum fjölgar mjög, nýtt breskt Delta-afbrigði komið upp. Vetrarhorfurnar eru því heldur kvíðvænlegar þó vísindamenn búist ekki að það verði þörf á lokunum líkt og í fyrravetur. Sigrún Davíðsdóttir sagði frá.

Yfirkjörstjórnin sektuð

Þórólfur Guðnason, sóttvarnalæknir segir til skoðunar að slaka á reglum um sóttkví á næstunni, en segist vera eins og hrópandinn í eyðimörkinni boðandi að baráttunni við farsóttina sé ekki lokið Bjarni Benediktsson, fjármálaráðherra segir að ástand á bráðamóttöku Landspítalans tengist ekki COVID-19 - hann sjái ekkert ástand á spítalanum sjálfum. Hómfríður Dagný Friðjónsdóttir ræddi við Bjarna. Markús Þórhallsson tók saman. Fundi undirbúningsnefndar fyrir rannsókn kjörbréfa í Borgarnesi var að ljúka. Í morgun fylgdust nefndarmenn með þegar ónotaðir kjörseðlar voru taldir á lögreglustöðinni og stemmdi sú talning við kjörgögn. Elsa María Guðlaugs- Drífudóttir fréttamaður hefur fylgst með fundinum. Stjórnvöld í Rússlandi leggja til að landsmenn verði sendir í átta daga frí til að draga úr fjölda kórónuveirusmita. Yfir eitt þúsund Rússar létust í gær af völdum COVID-19. Ásgeir Tómasson sagði frá. Samkomulag sem utanríkisráðherra gerði við bresk stjórnvöld í sumar eykur möguleika íslenskra námsmanna á að fá styrki til náms þar í landi. Markús Þórhallsson sagði frá. Heiðdís Austfjörð hárgreiðslumeistari fagnar því að grímuskyldan verði afnumin með breyttum sóttvarnareglum. Óðinn Svan Óðinsson talaði við hana. ---- Hafið er kapphlaup á milli þjóða um hverjir verða fremstir í lágkolefnis- og kolefnishlutlausu hagkerfi framtíðarinnar: Það er eina hagkerfið sem er í boði, segir Halldór Þorgeirsson, formaður Loftslagsráðs. Loftslagsráðstefna Sameinuðu þjóðanna hefst um mánaðamótin í Skotlandi. Ragnhildur Thorlacius ræddi við hann. Vaxandi ógn frá Rússlandi hefur leitt til stóraukinna útgjalda til varnarmála í Noregi og Svíþjóð. Rússnesk herskip héldu sig innan tvöhundruð mílna markanna við Ísland um níu daga skeið í sumar. Ingólfur Bjarni Sigfússon tók saman ræddi við Guðlaug Þór Þórðarson, utanríkisráðherra og Katarzynu Zysk sérfræðing í alþjoðamálum. Margt bendir til þess að falskt öryggi felist í því að taka símtal í gegnum handfrjálsan búnað eða hljóðkerfi bílsins á meðan setið er undir stýri. Einbeitingin við aksturinn er jafnfjarri og ef símtæki er haldið upp að eyranu segir Gunnar Geir Gunnarsson deildarstjóri hjá samgöngustofu við Kristján Sigurjónsson. Umsjónarmaður: Anna Kristín Jónsdóttir. Tæknimaður: Jón Þór Helgason. Stjórn útsendingar frétttahluta: Ingibjörg Sara Guðmundsdóttir.

19. október 2021 Sóttkvíarreglur endurskoðaðar

Ef færa þarf Landspítalann af óvissustigi yfir á hættustig verður að draga úr starfsemi og valkvæðum aðgerðum. Tilkynnt var í dag um fjölgun rýma á Landakoti til að létta undir með Landspítalanum. Kristín Sigurðardóttir sagði frá og ræddi við Þórólf Guðnason, sóttvarnalækni. Um og yfir 30 prósent þeirra sem sinna grunnskólakennslu á Vestfjörðum, Austurlandi og Suðurnesjum eru án kennsluréttinda. segir Þorgerður Laufey Diðriksdóttir, formaður Félags grunnskólakennara. Tölvuþrjótar réðust á póstþjón Háskólans í Reykjavík?í síðustu viku og dulkóðuðu skrár. Ragnhildur Helgadóttir rektor segir ekki koma til greina að verða við kröfum lausnargjald fyrir gögn. Undirbúningsnefnd fyrir rannsókn kjörbréfa fer í vettvangsferð til Borgarness á morgun, segir Birgir Ármannsson formaður nefndarinnar sem segir að síðar í vikunni verði rætt við kærendur. Þingmenn á breska þinginu minntust í dag félaga síns Davids Amess, sem var stunginn til bana fyrir helgi. Ásgeir Tómasson sagði frá. ------------ Það er kennaraskortur í grunnskólum landsins, en mismikill eftir landshlutum. Ástæðurnar eru margþættar segir Þorgerður Laufey Diðriksdóttir formaður Félags grunnskólakennara. Kristján Sigurjónsson ræddi við hana. Kórónuveiran verður hér áfram og faraldurinn gufar ekki upp á meðan fáir eru bólusettir á stórum svæðum. Þó standa vonir til þess að sýkingarmáttur veirunnar dvíni svo hún verði bara ein af þeim veirum sem valda öndunarfærasýkingum segir Magnús Gottfreðsson, prófessor í smitsjúkdómum. Anna Kristín Jónsdóttir ræddi við hann. Morðið á breska þingmanninum David Amess leiðir athyglina að hörkunni í pólitískri umræðu. Það sést ekki úti í samfélaginu að vináttubönd stjórnmálamanna ganga iðulega þvert á flokkslínurnar. En svívirðingar og gífuryrði á samfélagsmiðlunum vekja ugg. SIgrún Davíðsdóttir tók saman. Umsjón: Anna Kristín Jónsdóttir. Tæknimaður: Magnús Þorsteinn Magnúson. Stjórn útsendingar fréttahluta: Ingibjörg Sara Guðmundsdóttir

18. október 2021 Staða Landspítala viðkvæm

Spegillinn 15.okt 2021 Umsjón: Kristján Sigurjónsson Tæknimaður: Jón Þór Helgason Þingmaður breska Íhaldsflokksins var stunginn til bana á stjórnmálafundi í Essex á Englandi í dag. Forsætisráðherra Breta og fyrsti ráðherra skosku heimastjórnarinnar segja að tryggja þurfi betur öryggi þingmanna. Flokkarnir þrír sem ræða myndun nýrrar sambandsstjórnar í Þýskalandi hafa komist að bráðabirgðasamkomulagi um stjórnarmyndun. Norska lögreglan rannskar hvers vegna lögreglan í Kongsberg missti ódæðismanninn sem myrti fimm manns á miðvikudagskvöld úr höndum sér áður en hann lét til skarar skíða. Mjög vel hefur gengið að stýra langflestum ferðamönnum sem lagt hafa leið sína á gosstöðvarnar á Reykjanesskaga frá því gos hófst. Svokallaðir eldfjalladólgar hafa þó gert björgunarsveitarmönnum og lögreglu lífið leitt. Formaður VR segir stjórnvöld eiga að setja reglur um að leiguverð taki mið af ráðstöfunartekjum. Ekki hafi verið staðið við mikilvæg atriði í lífskjarasamningnum. Búist er við mikilli úrkomu á Austurlandi í byrjun næstu viku. Uppsöfnuð úrkoma gæti orðið allt að 120 millimetrar og að mati Almannavarna gæti þurft að rýma hús nærri stóra skriðusárinu ofan byggðarinnar á Seyðisfirði. Flóttamannastofnun Sameinuðu þjóðanna, UNHCR, vill að Norðurlöndin hraði og einfaldi málsmeðferð í málum afganskra flóttamanna sem þegar hafa fengið vernd og vilja fá fjölskyldumeðlimi til sín. Nýjasti landneminn í lífríki Íslands er hnífskel sem nefnist sindraskel. Skelin er flugbeitt og ílöng og talið er að hún hafi borist hingað til lands með kjölvatni skipa. Lengri umfjöllun: Hryðjuverk eða óstjórnlegt æði? Skipulagði Espen Andersen Braaten hryðjuverk í nafni islam eða rann á hann morðæði á miðvikudagskvöldið. Fimm létu þá lífið á Kóngsbergi í Noregi? Af hverju missti lögregan hann úr höndum sér áður en morðin voru framin. Gísli Kristjánsson í Ósló hefur fylgst með framvindunni. Stýring ferðamanna að eldgosinu á Reykjanesskaga hefur gengið vel segir Jónas Guðmundsson verkefnastjóri í slysavörnum hjá Slysavarnafélaginu Landsbjörg. Hann ræddi í dag árangurinn af stýringunni á ráðstefu Landsbjargar - Slysavarnir 2021 - sem nú stendur yfir í Reykjavík. Talið er að á milli 350 til 400 þúsund manns hafi gengið að gosinu frá því að það hófst þann 19. mars - fyrir tæpum sjö mánuðum. Kristján Sigurjónsson talar við Jónas. Jöfnun aðstöðumunar milli og innan landshluta er stóra loforð Borisar Johnsons forsætisráðherra Breta. Vandinn er bæði að aðstöðumunurinn er mikill og verður ekki jafnaður á einu kjörtímabili. En líka að það er mjö

Spegillinn 15.okt 2021

Norska öryggislögreglan segist hafa þekkt til mannsins sem varð fimm að bana í bænum Kóngsbergi í gær. Hann hafði áður komist í kast við lögin. Forsætisráðherra lagði áherslu á mikilvægi alþjóðasamvinnu í baráttunni gegn loftslagsbreytingum og neikvæð áhrif þeirra á norðurslóðir í ávarpi við opnun þings Hringborðs norðurslóða. Aspir sem gróðursettar voru á framræstu landi reyndust binda svo mikið af gróðurhúsalofttegundum að þær bundu meira en skurðir í landinu losuðu. Strandabyggð hefur hækkað álagningarprósentur og undirbýr nú frekari aðgerðir til að rétta bága fjárhagsstöðu sína. Sveitarfélagið fékk þrjátíu milljónir aukalega úr jöfnunarsjóði í ár og býst oddviti við að þörf verði á öðru eins á því næsta. Norðmenn eru hrami slegnir eftir morðin í Kongsberg í gær. Fjórar konur og einn karlmaður voru myrt. Þau voru á aldrinum 50 til 70 ára. Tveir eru særðir. Skotið var að þeim með bogapílum. Þetta gerist á sam tíma og ríkistsjórnarskipti fara fram. Arnar Páll Hauksson talar við Gísla Kristjánsson í Noregi. Jólavertíðin gæti orðið lin hjá mörgum verslunarmönnum segir Margrét Kristmannsdóttir framkvæmdastjóri Pfaff og stjórnarmaður í Viðskiptaráði. Vöruverð hjá erlendum birgjum hækkar, kostaður við fraktflutninga rýkur upp og hjá mörgum bætist við aukinn birgðakostnaður. Því mega neytendur búast við hækkandi vöruverði. Ragnhildur Thorlacius sagði frá og talaði við Margréti. Brexit er aftur á dagskrá í Bretlandi. Ófrágengni Brexit kaflinn er sérstök bókun um Norður-Írland í útgöngusamningi Breta við Evrópusambandið. Nauðsynlegur liður til að útganga Breta úr ESB yrði að veruleika í fyrra. Málalyktir, sem Boris Johnson forsætisráðherra þakkaði sér, því hann hefði afrekað, það sem forvera hans Theresu May misheppnaðist. Sigrún Davíðsdóttir sagði frá.

Lögreglan þekkti til morðingjans

Yfirlæknir Barnaspítala Hringsins býst við skæðum inflúensum og RS veiru veikindum í vetur. Hann er ánægður með að ekki hafi fleiri börn en raun ber vitni lagst inn á spítala af völdum covid. Bensínverð hefur hækkað um 40 krónur frá áramótum. Formaður FÍB hvetur stjórnvöld til að bregðast við með tímabundinni lækkun olíuverðs. Íslenskum skipum verður heimilt að veiða rúmlega 660 þúsund tonn af loðnu. Áætlað aflaverð er um fimmtíu milljarðar króna. Sameinuðu þjóðirnar segja hættu á að viðkvæm börn og eldri borgarar svelti til bana vegna matarskorts í Norður-Kóreu. Hjá Náttúruhamfaratryggingu Íslands sjást ekki greinileg merki um að áhætta af veðurfarstengdum atburðum hafi aukist. En aurskriður vekja upp spurningar um veðurfarsbreytingar sem þarf að taka mjög alvarlega, segir sviðsstjóri vátryggingasviðs. Ragnhildur Thorlacius talar við Jón Örvar Bjarnason. Í viðræðum ríkisstjórnarflokkanna þriggja gæti reynst erfitt að komast að sameiginlegri niðurstöðu um stofnun hálendisþjóðgarðs. Málið strandaði í þinginu og var sent aftur í umhverfisráðuneytið. Í stjórnarsáttmálanum er kveðið á um Miðhálendisþjóðgarð. Þar segir: Stofnaður verður þjóðgarður á miðhálendinu í samráði þverpólitískrar þingmannanefndar, umhverfis- og auðlindaráðuneytisins, sveitarfélaga, náttúruverndar- og útivistarsamtaka og annarra hagsmunaaðila. Skoðaðir verða möguleikar á þjóðgörðum á öðrum svæðum. Arnar Páll Segir frá. Heyrist í Guðna A. Jóhannessyni, Herði Arnarsyni, Hildigunni Thorteinsson og Páli Erland. Það virðist ekki vera neitt lát á bókaútgáfu þrátt fyrir öfluga samkeppni frá öðrum miðlum, streymisveitum og samfélagsmiðlum. Bókaútgefendur þurftu að skila inn skráningu í Bókatíðindi í þessari viku og jólabókaflóðið verður á sínum stað þrátt fyrir að bókaútgáfan hafi dreifst meira yfir árið á síðustu árum. Kristján Sigurjónsson ræddi við Pétur Má Ólafsson útgefanda og stjórnarmann í Félagi íslenskra bókaútgefenda og spurði fyrst hvers kyns bækur væru gefnar út á þessu ári. Umsjón Arnar Páll Hauksson Tæknimaður Magnús Þorsteinn Magnússon

Býst við skæðum inflúensum

Spegillinn 12. október 2021 Umsjón: Kristján Sigurjónsson Tæknimaður: Jón Þór Helgason Horfur eru á að halli af rekstri Landspítala um áramót verði um milljarður króna. Stjórnendur spítalans segjast leita allra leiða til að leysa bráðavandann en fjármagn og mannafla þurfi einnig til að dæmið gangi upp. Hættustig almannavarna hefur verið fært niður á óvissustig á Seyðisfirði. Ákveðið hefur verið að aflétta allri rýmingu í húsum í bænum. Gömul kirkja hrundi að hluta til og skriður féllu á vegi þegar jarðskjálfti af stærðinni 6,3 reið yfir á grísku eyjunni Krít í dag. Birgir Þórarinsson segist hafa fengið góðar móttökur á fyrsta þingflokksfundi Sjálfstæðismanna í dag. Heimamenn í Árneshreppi á Ströndum hafa í allan dag aðstoðað áhöfnina á varðskipinu Þór við að fjarlægja yfir fimmtíu grindhvalahræ úr fjöru í hreppnum. Bóluefni Moderna við COVID-19 verður áfram notað í örvunarbólusetningu fólks sem er 60 ára og eldra. Þórólfur Guðnason sóttvarnalæknir tilkynnti þetta síðdegis. Íbúar á dvalarheimilinu Hlíð á Akureyri lentu í 2. sæti í alþjóðlegri hjólreiðakeppni sem haldin var í september. Vistmenn voru mjög metnaðarfullir og sumir hjóluðu oft á dag. Lengri umfjöllun: Áhugavert verður að fylgjast með því í vetur hvernig áherslur þingmannsins Birgis Þórarinssonar sem er nýgenginn í Sjálfstæðisflokkinn úr Miðflokknum ríma við stefnu Sjálfstæðisflokksins, segir Birgir Guðmundsson stjórnmálafræðingur. Hann telur að brotthvarf Birgis mögulegan fyrirboða upplausnar Miðflokksins. Anna Kristín Jónsdóttir ræðir við Birgi. 175 manns hafa lokið eða ljúka brátt endurhæfingu vegna langvarandi einkenna COVID 19. 50 manns bíða endurhæfingar. 12.287 manns hafa smitast af COVID-19 á Íslandi, svo að staðfest sé, samkvæmt tölfræði á covid.is Það hefur tekið marga langan tíma að ná sér að fullu, fá aftur lyktar- og bragðskyn hafi það horfið, eða fullt þrek svo að dæmi séu tekin. Blessunarlega hefur þó aðeins lítið brot þurft á endurhæfingu að halda. Endurhæfing við langvarandi einkennum COVID 19 hefur farið fram á þremur stöðum, á Kristnesspítala í Eyjafirði, Heilsustofnun í Hveragerði og á Reykjalundi. Ragnhildur Thorlacius ræðir við Stefán Yngvason framkvæmdastjóra lækninga á Reykjalundi

Spegillinn 12. október 2021

Spegillinn 11.október 2021 Umsjón: Kristján Sigurjónsson Tæknimaður: Mark Eldred Rýmingu hefur verið aflétt að hluta vegna skriðuhættu á Seyðisfirði. Hættustig er þó enn í gildi og íbúar fimm húsa mega ekki snúa aftur heim. Formaður Sjálfstæðisflokksins segir hafa komið sér á óvart að Birgir Þórarinsson sem kosinn var á þing fyrir Miðflokkinn hafi boðið þingflokki sjálfstæðismanna krafta sína. Skipt verður um forystusveit Kristilegra demókrata í Þýskalandi á næstu vikum. Flaggað er í hálfa stöng í Borgartúni í Reykjavík í dag til að vekja athygli á að miklu fleiri karlar en konur stýra fyrirtækjum. Um 320 þúsund manns hafa nú gengið að gosstöðvunum frá því að gos hófst 19. mars. Kvikmyndin Dýrið er orðin tekjuhæsta íslenska myndin sem sýnd hefur verið í bandarískum kvikmyndahúsum. Tekjur af miðasölu í Bandaríkjunum um helgina námu yfir milljón Bandaríkjadala. Ekki er lengur talin þörf á að takmarka æskulýðs-, íþrótta- og félagsstarf barna og unglinga á grunnskólaaldri á Akureyri. Erfitt hefur reynst undanfarið að halda hita á sundlaug, heitum pottum, gufubaði og sturtum í sundlaug Hvergerðinga í Laugaskarði. Íslenska karlalandsliðið í knattspyrnu mætir Liechtenstein á Laugardalsvelli í kvöld í undankeppni heimsmeistaramótsins Lengri umfjöllun: Um 320 þúsund manns hafa nú gengið að gosstöðvunum á Reykjanesskaga frá því að teljarar voru settir upp við gönguleiðir skömmu eftir að gos hófst 19. mars. Heimamenn settu sig þá strax í stellingar. Þuríði Aradóttur forstöðukona Markaðsskrifstofu Reykjaness var í viðtali í Speglinum á fjórða degi í gosi og lýsti sinni sýn á hvernig bregðast skyldi við væntanlegum áhuga íslendinga og erlendra ferðamanna á gosinu. Nú eru tæpir sjö mánuðir frá því gosið hófst. Hvernig hefur til tekist? Kristján Sigurjónsson ræðir við Þuríði. Þegar Bretar gengu úr Evrópusambandinu í ársbyrjun í fyrra var gerð sérstök bókun um Norður-Írland til að tryggja opin landamæri milli Írlands og Norður-Írlands í anda friðarsamningsins frá 1998. En blekið var varla þornað á gjörningnum þegar breska stjórnin fór að kvarta yfir að það væri ekki hægt að framfylgja bókuninni. Brexit er því ekki búið og nú er að hefjast ein atrennan til að leysa Norður-Írlandsvandann. Sigrún Davíðsdóttir segir frá. Gríðarlegt úrhelli sem veldur flóðum, hækkandi sjávarmál og hverskyns veðuröfgar. Þessara afleiðinga loftslagsbreytinga er þegar farið að gæta víða um heim. Í Svíþjóð ber sveitarfélögum skylda til að undirbúa varnir gagnvart komandi hamförum. En það er afar misjafnt hve vel það gengur. Kári Gy

Spegillinn 11. október 2021

Íbúar á Seyðisfirði sem þurftu að rýma hús sín í vikunni fá ekki að fara heim til sín um helgina. Hreyfing í hrygg við Búðará nemur 7 sentimetrum. Sóttvarnalæknir hefur ákveðið að stöðva notkun á bóluefni Moderna hér á landi vegna aukinnar tíðni hjartabólgu og gollurshússbólgu eftir bólusetningu. Freyr Gígja Gunnarsson sagði frá. Stéttarfélög skora á Icelandair að draga uppsögn trúnaðarmanns á Reykjavíkurflugvelli til baka. Hildur Margrét Jóhannsdótitr tók saman. Á sjöunda hundrað hælisleitendur voru handteknir í Mexíkó í gærkvöld þegar þeir hugðust komast yfir landamærin til Bandaríkjanna. Fjöldi barna var í hópnum, mörg ein síns liðs. Ásgeir Tómasson sagði frá. Innan skamms verður í fyrsta skipti hægt að nálgast á einum stað upplýsingar um hversu mikið af íbúðarhúsnæði er í byggingu hverju sinni. Hermann Jónasson, forstjóri Húsnæðis- og mannvirkjastofnunar segir þetta byltingu sem koma muni jafnvægi á markaðinn. Magnús Geir Eyjólfsson ræddi við hann. Pepp Ísland, grasrót fólks í fátækt, missir húsnæði sitt í Mjódd í Reykjavík í nóvember segir Ásta Þórdís Skjalddal, samhæfingarstjóri Pepps. Hlátrasköllin ómuðu um alla ganga hjúkrunarheimilisins Hlíðar á Akureyri í gærkvöld þegar fyrsta kráarkvöldið var haldið eftir faraldurinn. Eðalveigar flæddu á meðan heimilisfólkið söng og dansaði. Óðinn Svan Óðinsson talaði við Ástu Júlíu Aðalsteinsdóttur viðburðastjóra í Hlíð. ------------------------------------------------ Húsnæðismál eiga að snúast um að fólk komist í öruggt skjól en ekki þjóna fjármálaöflunum að mati Drífu Snædal forseta Alþýðusambands Íslands. Anna Kristín Jónsdóttir ræddi við Drífu. Við gerð hættumats á ofanflóðasvæðum í þéttbýli var að mestu litið til snjóflóða, og ástæða er til að endurskoða matið á ýmsum stöðum þar sem er skriðuhætta, að mati Magna Hreins Jónssonar, hópstjóra ofanflóðahættumats á Veðurstofu Íslands. Ragnhildur Thorlacius ræddi við hann. Fjölmiðlafólk frá Rússlandi og Filippseyjum fékk friðarverðlaun Nóbels í dag. Gísli Kristjánsson sagði frá. Umsjón: Anna Kristín Jónsdóttir. Tæknimaður: Mark Eldred

8. október 2021 Enn mælist hreyfing ofan Seyðisfjarðar

Enn er hættustig á Seyðisfirði og í Kaldakinn í Þingeyjarsveit og búist við aukinni úrkomu á þessum svæðum í kvöld. Ekki voru allir íbúar skráðir í þeim húsum sem þurfti að rýma á Seyðisfirði. Kvensjúkdómalæknir sem stóð að rannsókn um tilkynntar aukaverkanir í tengslum við bólusetningu gegn Covid-19 óttast mest að umræðan um tengsl við bólusetningar komi í veg fyrir að konur fari til læknis. Erlendum ferðamönnum verður heimilt að koma til Indlands að nýju frá miðjum október. Landamærin hafa að mestu verið lokuð í hálft annað ár. Sýslumaðurinn á Norðurlandi eystra hefur kallað eftir kröfum um sanngirnisbætur fyrir misgjörðir á opinberum stofnunum fyrir fötluð börn. ---- Samkvæmt nýrri eldsneytisspá er ljóst að stjórnvöld þurfa að bretta upp ermar til að ná markmiðum sínum í loftslagsmálum. Í viðræðum stjórnarflokkanna, sem nú standa yfir, er ljóst að tekist er á um hvað leiðir á að fara á næstu árum. Kjörtímabili næstu ríkisstjórnar lýkur 2025 þegar langt verður liðið á tímabilið sem Parísarsamningurinn kveður á um. Landvernd, Náttúrverndarsamtök Íslands og Ungir umhverfissinnar segja í yfirlýsingu að ekkert bendi til þess að Ísland muni standa við skuldbindingar sínar gagnvart Parísarsamkomulaginu. Samtökin krefjast þess að ný ríkisstjórn girði sig í brók og leggi fram skýr tímasett og mælanleg markmið. Arnar Páll Haukson talar við Auði Önnu Magnúsardóttur og Árna Finnsson. Flokksþingi Íhaldsflokksins lauk í gær með hlátrasköllum undir hressilegri ræðu Borisar Johnsons forsætisráðherra og flokksleiðtoga. En forsætisráðherra nefndi hvorki vanda eins og vöru- og eldsneytisskort, né að einmitt í gær voru félagslegarbætur skertar. Bæði innan flokksins og utan velta menn fyrir sér hvort kjósendur meðtaki bjartsýnistal forsætisráðherra. Sigrún Davíðsdóttir segir frá.

Enn hættustig í Kinninni

Fjórir af þeim fimm frambjóðendum sem leit út fyrir að kæmust á þing, áður en atkvæði í Norðvesturkjördæmi voru talin aftur, hafa kært kosninguna. Frambjóðandi Pírata skilaði inn kæru síðdegis í dag. Mikil uppgræðsla bíður ábúenda á bænum Björgum í Köldukinn eftir skriðuföllin þar fyrr í vikunni. Þar hefur mestöll hlíðin ofan við bæinn hlaupið fram. Rafskútuakstur og áfengis- og vímuefnaneysla fara ekki saman. Þetta segir yfirlæknir á bráðamóttöku Landspítalans. Fjöldi rafskútuslysa hefur hátt í tvöfaldast á milli sumra. Flestir hinna slösuðu eru fullorðnir. Náttúruvársérfræðingur á Veðurstofu Íslands segir að gervihnattamyndir sem bárust í dag sýni enga aflögun á Keilissvæðinu. Leiðtogar Evrópusambandsríkja höfnuðu í dag að ákveða hvenær löndin á vestanverðum Balkanskaga fá aðild að sambandinu. ------------------------------------------------------------------------------------------------------------------------------------------------------------------------------------ Forystumenn ríkisstjórnarflokkanna sitja nú á rökstólum og freista þess að koma saman nýjum stjórnarsáttmála. Ljóst er að loftlagsmálin eru eitt af því sem rætt er við stjórnarmyndunarborðið. Ef Ísland ætlar að standa við skuldbindingar sínar í Parísarsamningnum verður að bretta hressilega upp ermar. Arnar Páll segir frá og það heyist í oddvitum flokkanna sem buðu fram í Suðvesturkjördæmi. Óvissan um afdrif kínverska fasteignafélagsins Evergrande undanfarnar tvær vikur hefur valdið talsverðum titringi í efnahagskerfi Kína, sem er það næst stærsta í heiminum. Og ekki aðeins sjást áhrifin á efnahag Kínverja, heldur allrar heimsbyggðarinnar. Kristján Sigurjónsson talar við Snæfríði Grímsdóttur. Í könnun sem gerð var meðal félagsmanna í Sameyki kom í ljós að innan við helmingur svarenda eða um 40% vann heima í faraldrinum og af þeim sem það gerðu hafði meirihlutinn eða rúm 60% ekkert val. Anna Kristín Jónsdóttir talar við Þórarinn Eyfjörð.

Fjórir hafa skilað kæru til kjörnefndar

Rýmingu vegna skriðuhættu hefur verið aflétt í Kinn í Suður-ÞIngeyjarsýslu utan tveggja bæja í Útkinn. Íbúar í 9 húsum sem voru rýmd á Seyðisfirði fá ekki að fara heim fyrr en eftir helgi. Bændur eru ósammála þeirri skoðun fyrrverandi yfirdýralæknis að skera þurfi allt fé í Húna- og Skagahólfi til að uppræta riðu á svæðinu. Unnsteinn Snorri Unnsteinsson verkefnastjóri hjá Bændasamtökunum segir að menn þurfi að meta umfang smitsins áður en gripið sé til aðgerða. Bjarni Rúnarsson ræddi við hann. Offita barna er samfélagsleg áskorun og krefst markvissra aðgerða segir Ása Sjöfn Lórensdóttir, fagstjóri heilsuverndar skólabarna. BRynja Þorgeirsdóttir ræddi við hana og fjallað er um málið í fréttaþættinum Kveik. ARnar Framkvæmdastjóri nokkurra skemmtistaða í miðbæ Reykjavíkur skilur ekki hvers vegna opnunartími veitinga- og skemmtistaða var ekki lengdur í nýjum sóttvarnareglum. Margar krár stefni í þrot. Karl Frímannsson, fræðslustjóri Akureyrarbæjar segir rakningarteymið ganga lengra á Akureyri en reglur um sóttkví segja til um. 80 eru í einangrun og nærri þúsund í sóttkví í bænum. Óðinn Svan Óðinsson ræddi við Karl. Yfirvöld í Danmörku hafa gert yfir fimm hundruð bíla upptæka síðastliðna sex mánuði, þar sem ökumenn þeirra gerðust sekir um háskalegan akstur. Ásgeir Tómasson sagði frá. -------- Það er Alþingis að kveða uppúr um niðurstöður kosninga og gildi kjörbréfa en það hefur ýmsa kosti, segir Hafsteinn Þór Hauksson dósent í lögum og stjórnskipunarrétti við Háskóla Íslands. Ákvörðun um kjörbréf í Norðvesturkjördæmi er ekki endilega eins augljós og margir vilja vera láta. Anna Kristín Jónsdóttir ræddi við hann. Margar viðvörunarbjöllur klingja vegna aukinnar hættu á skriðuföllum að mati Þorsteins Sæmundssonar jarðfræðings. Hann segir að það þurfi sárlega að mennta fleira fólk til að til að meta hættuna og auka rannsóknir og vöktun á fjallshlíðum. Ragnhildur Thorlacius ræddi við hann. Umsjón: Anna Kristín Jónsdóttir. Tæknimaður: Markús Hjaltason. Stjórn útsendingar fréttahluta: Ingibjörg Sara Guðmundsdóttir.

Spegillinn 5. október 2021

Spegillinn 4. október 2021 Umsjón: Kristján Sigurjónsson Tæknimaður: Magnús Þorsteinn Magnússon Ríkislögreglustóri hefur í samráði við lögreglustjórann á Austurlandi ákveðið að lýsa yfir hættustigi almannavarna á Seyðisfirði vegna hættu á skriðuföllum. Níu hús verða rýmd á Seyðisfirði að minnsta kosti fram yfir helgi og fjöldahjálparmiðstöð opnuð. Nú stendur yfir fundur Almannavarna um stöðu mála í Suður-Þingeyjarsýslu eftir aurskriðurnar þar. Þar er rætt um hvenær hægt verði að hleypa íbúum inn á svæðið Ástæða er til þess að óttast að öfgar í veðri, líkt og rigningarnar fyrir norðan um helgina, verði algengari í framtíðinni vegna loftslagsbreytinga og hlýrra veðurfars á jörðinni. Þetta segir Elín Björk Jónasdóttir veðurfræðingur, Stríðsglæpir og glæpir gegn mannkyni hafa verið framdir í Líbíu árið frá árinu 2016 að sögn rannsóknarnefndar á vegum mannréttindaráðs Sameinuðu þjóðanna. Fjórir af þeim fimm jöfnunarþingmönnum sem duttu út af þingi eftir endurtalningu í Norðvesturkjördæmi hafa kært niðurstöðuna; Leiðsögumenn með hreindýraveiðum gagnrýna það sem þeir kalla misskilda manngæsku sem felist í veiðibanni í griðlandi sunnan Snæfells. Í sumar hafi mörg dýr haldið sig þar og það hafi aukið mjög veiðiálag á aðrar hjarðir. Lengri umfjöllun: Vísindamenn sem rannsaka áhrif hlýnunar á loftslag eru varkárir í svörum þegar spurt er hvort einstaka hamfaraatburðir séu afleiðing loftslagsbreytinga. Óvenjulegt veðurfar hefur hins vegar orðið tíðara síðastliðin 10 til 20 ár og hamafarir því samhliða. Þurrkarnir og hlýindin á Norðaustur- og austurlandi í sumar, úrkoman og skriðuföllin í Seyðisfirði í desember og svo núna úrhellið á Tröllaskaga og Kinnarfjöllum fyrir norðan - er þetta afleiðing loftslagsbreytinga á jörðinni? Kristján Sigurjónsson ræðir við Elínu Björk Jónasdóttur veðurfræðing um þetta efni, en einning eru rifjuð upp orð Halldórs Björnssonar loftslagsfræðings í samtali við Ragnhildi Thorlacius í Speglinum í síðustu viku. Pandóruskjölin eru stærsti gagnaleki úr fjármálaheiminum hingað til, koma frá fjórtán aflandsþjónustufyrirtækjum. Alþjóðleg samtök rannsóknarblaðamanna, International Consortium of Investigative Journalists, stýra og skipuleggja úrvinnsluna, líkt og áður með Panamaskjölin. Í fyrstu fréttahrinunni virðist ekkert tengjast Íslandi, annað með Bretland. Sigrún Davíðsdóttir segir frá. Seðlabanki Íslands setti nýlega reglur um hámark greiðslubyrðar af fasteignalánum miðað við tekjur lántaka. Ásgeir Jónsson seðlabankastjóri hefur sagt það gert til að tryggja jarðsamband fasteignamarkaða

Spegillinn 4. október 2021

Landskjörstjórn hefur úthlutað þingsætum og gefið út kjörbréf 63 þingmanna miðað við niðurstöðu endurtalningar í Norðvesturkjördæmi á sunnudag. Hún segir utan valdsviðs síns að taka afstöðu til hugsanlegra ágalla á framkvæmd kosninga. Það sé hlutverk Alþingis. Bjarni Rúnarsson sagði frá. Willum Þór Þórsson, forseti Alþingis segir að nú taki við skipan undirbúningskjörbréfanefndar og að bera kjörbréfin undir það. Hann býst við að nýtt þing komi saman á mánudag. Kristín Sigurðardóttir ræddi við hann. Fólki er ráðlagt að vera ekki á ferðinni í nágrenni við Keili og eins er mælst til að fólk hugi að forvörnum gegn jarðskjálftum á heimilum sínum. Enn sjást engin merki um að kvika sé að brjóta sér leið upp á yfirborðið við Keili. Magnús Geir Eyjólfsson rædd við Björn Oddsson jarðeðlisfræðing hjá Almannavörnum. Það mjakast í áttina hjá formönnum ríkisstjórnarflokkanna sem hittust í dag. Þeir ætla að halda áfram að ræða um stjórnarsamstarf á mánudaginn. María Sigrún Hilmarsdóttir ræddi við formennina Bjarna Benediktsson, (D), Katrínu Jakobsdóttur (V) og SIgurð Inga Jóhannsson (B). Drífa Snædal, forseti ASÍ segir starfsfólk flugfélagsins Play leita til sambandsins vegna kjara og aðbúnaðar. Birgir Jónsson, forstjóri Play segir ASÍ fara með órökstuddar dylgjur. Hildur Margrét Jóhannsdóttir ræddi við þau. Fyrsta konunglega brúðkaupið í Rússlandi í 127 ár var haldið í dag. Ásgeir Tómasson sagði frá. ---------- Skjálftahrinan við Keili heldur áfram og svipar til þeirra sem var áður en tók að gjósa í Fagradalsfjalli. Skjáfltarnir eru á töluverðu dýpi en tengjast líklega kvikuhreyfingum þó að hún sé ekki farin að brjótast upp. Ragnhildur Thorlacius talaði við Þorvald Þórðarson eldfjallafræðing um hrinuna. Umræður um nýja ríkissstjórn mjakast áfram en flokkana greinir á í mörgu ekki síst um leiðir. Kristján Sigurjónsson rakti áherslur formannannna þriggja í heilbrigðismálum í umræðum fyrir kosningar. Brot úr forystusætum þar sem talað var við Bjarna Benediktsson, (D), Katrínu Jakobsdóttur (V) og SIgurð Inga Jóhannsson (B). AUKUS samstarfið er Bretum kærkomið en Frökkum líst ekki á blikuna. Sigrún Davíðsdóttir segir frá. Umsjón: Anna Kristín Jónsdóttir. Tæknimaður: Magnús Þorsteinn Magnússon. Stjórn útsendingar fréttahluta: Björg Guðlaugsdóttir.

Spegillinn 1. október 2021

Fréttir og fréttaskýringar í útvarpi þar sem kafað er dýpra í málin, þau sett í stærra samhengi og skýringa leitað.

hubhopper

Spegillinn

hubhopper