Sigurður Guðmundsson, myndlistarmaður, verður gestur Víðsjár í dag en á listahátðinni Sequences sem nú stendur yfir mun Sigurður koma aftur að fyrirlestri sínum um tímann sem hann flutti upphaflega árið 1969. Við ræðum við Sigurð um tímann. Víðsjá heimsækir líka Hörpu þar sem æfingar standa yfir á Aion eftir Önnu Þorvaldsdóttur og Ernu Ómarsdóttur en verkið verður frumflutt á Íslandi annað kvöld og er samstarfstarfsverkefni Sinfóníuhljómsveitar Íslands, Gautaborgarhljómsveitarinnar og Íslenska dansflokksins. Og Tónlistarútgáfan TOW Records hefur um nokkurt skeið gefið út íslenska tónlist í Bandaríkjunum, þar á meðal efni hljómsveitanna Kimono og Milkywhale. Maðurinn bak við útgáfuna heitir Bryan Riebeek og er búsettur rétt fyrir utan Boston. Hann kemur hingað til lands að minnsta kosti einu sinni á ári, hefur sótt Iceland airwaves hátíðina á hverju ári frá 2008 og er einmitt staddur hér á landi núna. Hann kíkti hingað í Víðsjá ásamt Kristjönu Stefánsdóttur en það nýasta af nálini hjá TOW Records er fjögurra laga vínyl plötu sem nefnist RVK-NYC þar sem Svavar Knútur, Kristjana Stefáns og hin bandaríska Emily Hope Price leggja saman krafta sína. Rætt verður við þau Bryan Riebeek og Kristjönu Stefáns í Víðsjá í dag. Umsjón: Guðni Tómasson og Halla Harðardóttir.

Víðsjá

Aion, Sigurður Guðmundsson og RVK-NYC

Víðsjá 19. október 2021: Í Víðsjá í dag verður hugað að óperunni Góðan daginn, frú forseti sem frumsýnd verður í Grafarvogskrikju á laugardagskvöld. Eins og nafn verksins gefur til kynna þá fjallar óperan um Frú Vigdísi Finnbogadóttur fyrrverandi forseta. Höfundur verksins, söngkonan Alexandra Chernyshova verður gestur Víðsjár í dag. Snorri Rafn Hallsson, dagskrárgerðarmaður og textasmiður í Vín heldur áfram pistlaröð sinni um möguleika og ómöguleika tækninnar. Í þetta skiptið skoðar hann sjálfvirk ráðningarferli og hvernig tækni sem átti að auðvelda fyrirtækjum að fá til sín hæft starfsfólk flækist nú fyrir okkur. Og loks kveður nýr bókmenntagagnrýnandi Víðsjár sér hljóðs í þættinum en það er Gréta Sigríður Einarsdóttir sem segir hlustendum skoðun sína á lestri skáldsögunnar Kynslóð eftir Hörpu Rún Kristjánsdóttur. Og Víðsjá gluggar líka í ljóðabækur skáldkvennanna Undínu og Maríu Bjarnadóttur í Tófu-innslagi dagsins þegar hún brá sér aftur í heimsókn til Magneu Þuríðar Ingvarsdóttur sem heldur úti Facebook síðunni Tófan, ljóða- og fræðasetur, þar sem ljóð skáldkvenna eru dregin fram í dagsljósið. Umsjón: Guðni Tómasson

Ópera um Vigdísi, Tófan, Kynslóð og tæknin

Víðjsjá 18. 10.2021 1. Heimsókn á Skuggabaldur og í Hús Máls og menningar en tónleikahald þar er nú komið í fullan gang. Snorri Helgason og Kamila Gnarr eru tekin tali, en þau sjá um viðburði í þessum nýlegu tónleikahúsum. 2. Snæbjörn Brynjarsson fjallar um óperuna Ástardrykkinn sem nú er sýnd í Þjóðleikhúskjallara, það gerir sviðslistahópurinn Óður. 3. Þorgerður Ása Aðalsteinsdóttir ræðir við Carl Boutard myndlistarmann um sýningu hans, Gróður jarðar, í Ásmundarsafni. 4. Ágústa Kristófersdóttir hjá Þjóðminjasafni Íslands segir frá Mannamyndasafninu sem nú er til sýninga í safninu. Umsjón: Guðni Tómasson

Mannamyndasafn , Carl Boutard, tónlistarstaðir og Ástardrykkurinn

14.10.2021

Í gær bárust þær fréttir að sinfóníuhljómsveitin Concertgebouw frá Amsterdam sé á leið til landsins og muni halda tónleika í Hörpu þann 10. nóvember næstkomandi. Hljómsveitin, sem af mörgum er talin ein allra besta sinfóníuhljómsveit veraldar, flytur á tónleikunum sjöttu sinfóníur rússnesku tónskáldanna Tsjajkovskís og Sjostakovitsj undir stjórn finnans unga Klaus Mäkelä sem er á meðal eftirsótttustu hljómsveitarstjóra samtímans. Í Víðsjá dagsins verður rætt við Helga Jónsson tónlistarfræðing um þessa stórmerku hollensku sveit sem stendur á traustum sögulegum grunni og vekur hrifningu um heim allan. Einnig verður verður rætt við baritón söngvarann Jóhann Kristinsson sem hafið hefur litla og netta tónleikaferð sína um landið með Vetrarferð Schuberts upp á vasann. Jóhann söng lagaflokk tónskáldins á tónleikum á Akranesi í gærkvöldi ásamt píanóleikaranum Ammiel Bushakevitz. Þeir félagar verða svo á Ísafirði á fimmtudag og í Salnum í Kópavogi á sunnudag kl. 15. Snæbjörn Brynjarsson, leiklistarrýnir Víðsjár, segir hlustendum skoðun sína á sýningunni Rómeo og Júlía hjá Íslenska dansflokknum. Og loks tekur ný rödd til máls í Víðsjá. Þorgerður Ása Aðalsteinsdóttir fer á stjá og ræðir við Magneu Þuríði Ingvarsdóttir heldur úti Facebook síðu Tófan ljóða- og fræðasetur sem er tileinkuð skáldkonum. Þar birtir hún nánast daglega færslur um einstaka skáldkonur þar sem ljóð þeirra eru dregin fram. Yfirleitt eru skáldin sem um ræðir fædd í kringum þar síðustu aldamót og gjarnan eru nöfn þeirra með öllu óþekkt í dag. Þorgerður Ása Aðalsteinsdóttir kíkti í heimsókn til Magneu og fékk að grafast fyrir um tildrög Tófunnar og grúska með henni í ljóðabókunum. Umsjón: Guðni Tómasson og Halla Harðardóttir

Concertgebouw, Rómeo og Júlía, Tófan og Vetrarferðin

Ólafur Gunnar Gunnlaugsson höfundur nýrrar verðlaunabókar verður gestur þáttarins, hann hlaut í dag íslensku barnabókaverðlaunin fyrir bókina Ljósbera sem kemur einmitt út í dag. Snorri Rafn Hallsson, dagskrárgerðarmaður og textasmiður heldur áfram pistlaröð sinni um möguleika og ómöguleika tækninnar. Í þetta skiptið flakkar hann á milli Kaupmannahafnar og Vínar og veltir því fyrir sér hvernig borg internetið sé eiginlega. Við hugum einnig að þjóðsögum í þætti dagsins. Benjamin B. Olshin gestakennari í heimspeki við Háskóla Íslands mætir í hljóðstofu og segir okkur frá rannsókn sinni á týndri visku. Visku sem hugsanlega má finna leyfar af í þjóðsögum og ævintýrum. Og loks fjallar Ólöf Gerður Sigfúsdóttir um sýninguna Vísitasíur í Listasafninu á Akureyri í sjónrýni pistli sínum. Umsjón: Guðni Tómasson

Ljósberi, internetborgin, þjóðsögur og Visitasíur

Víðsjá 11. október 2021 Fyrsti sendiherra á Íslandi 1919-1924 er heiti nýrrar bókar eftir Jakob Þór Kristjánsson alþjóðastjórnmálafræðing en þar er fjallað um sendiherratíð hins danska Johannesar Erhardts Böggild á Íslandi en hann kom hingað skömmu eftir að Ísland varð fullvalda og tók þátt í breytingum á samskiptum Íslands og Danmerkur í kjölfar þeirra atburða. Jakob Þór verður tekinn tali um bókina í Víðsjá dagsins. Berglind María Tómasdóttir gaf út plötuna Ethereality nú á dögunum og af því tilefni mætir hún í tónlistarhornið Heyrandi nær hjá Arnljóti Sigurðssyni með plötuna í farteskinu og leysir frá skjóðunni um útgáfuna auk þess sem hlustendur fá nasaþef af væntanlegum tónlistarævintýrum hennar. Víðsjá forvitnast líka um listamannarekin myndlistarrými og stöðu þeirra í myndlistarlífi landsmanna en í síðustu viku voru stofnuð samtök aðila sem standa í að halda úti slíkri starfsemi. Gestir Víðsjár verða tvær konur sem þekkja vel til slíkrar starfsemi, Ingibjörg SIgurjónsdóttir og Sunna Ástþórsdóttir. Umsjón: Guðni Tómasson.

Fyrsti sendiherrann, Berglind María og Sjálfstæða myndlistarsenan

Víðsjá 7. október 2021 Sænska akademían tilkynnti í morgun að Abdulrazak Gurnah fái Nóbelsverðlaunin í bókmenntum. Í rökstuðningi akademíunnar segir að Gurnah fái verðlaunin fyrir að fjalla um áhrif nýlendustefnunnar á óvæginn og skarpskyggnan hátt í skáldverkum sínum, fyrir að fjalla um örlög flóttamanns sem staddur er í gjá milli menninga og heimsálfa. Víðsjá heyrir af ánægju Tansaníumanna með veitingu verðlaunanna. Og nýlendustefnan kemur einnig fyrir þegar Víðsjá kynnir sér tveggja alda gamla deilu á milli Bretlands og Grikklands. Deilan um Parthenon verkin hefur staðið allt frá því að Elgin lávarður tók þau af Akrópólisarhæð árið 1801 og seldi þau síðar breska ríkinu. UNESCO hefur reynt að miðla málum í deilunni undanfarna áratugi en án árangurs. Það dró þó til tiðinda í vikunni þegar UNESCO tók í fyrsta sinn afdráttarlausa afstöðu með endurheimt þessara merku menningarminja og biðlaði til Breta um að skila verkunum heim til Grikklands. Rætt verður við Guðrúnu Dröfn Whitehead, lektor í safnafræði, um málið. Tvær tónlistarkonur heimsækja Víðsjá, þær Þórdís Gerður Jónsdóttir sellóleikari og Sigrún Harðardóttir fiðluleikari, en þær leika ásamt víóluleikaranum Þóru Margréti Sveinsdóttur á nýlegri plötu tónlistarhópsins Cauda Collective þar sem unnið er með fornan tónarf þorlákstíða. Þær þrjár semja og spinna tónlist út frá þessum forna arfi á forvitnilegan hátt. Og Dagur Hjartarsson flytur hlustendum pistil eins og hann gerir hér í Víðsjá aðra hverja víku. Dagur er sem fyrr með hugann við listþörfina og ímyndunaraflið. Umsjón: Guðni Tómasson og Halla Harðardóttir.

Nóbellinn, Parthenon, Cauda Collective og listþörfin

Í Víðsjá dagsins verður rætt við Ernu Ómarsdóttur og Höllu Ólafsdóttur, höfunda og listræna stjórnendur uppsetningar Íslenska dansflokksins á Rómeó og Júlíu. Sýningin var fyrst sett upp í Þýskalandi 2018 þar sem hún var meðal annars tilnefnd til hinna virtu Faust verðlauna. Næstsíðasta sýningin hér á landi fer fram í Borgarleikhúsinu í kvöld, og þangað héldum við í morgun. Snæbjörn Brynjarsson, leiklistargagnrýnandi Víðsjár, segir hlustendum skoðun sína á sketsasýningunni Kanarí sem nú er til sýninga í kjallara Þjóðleikhússins. Og nú stendur yfir bókmenntaverðlaunatímabil mikið, nóbelsverðlaunin í bókmenntum verða til að mynda afhent á morgun og búið er að birta stutta listann fyrir Booker verðlaunin. Kristján B. Jónasson bókaútgefandi verður tekinn tali um þýsku bókmenntaverðlaunin sem afhent verða um miðjan nóvember í tengslum við bókamessuna í Frankfurt en Kristján hefur legið í bókunum sem tilnefndar eru undanfarna daga og vikur. Að endingu segir Gauti Kristmannsson, bókmenntarýnir Víðsjár, skoðun sína á skáldsögunni Dauðinn er barningur eftir sýrlenska höfundinn Khaled Khalifa en bókaútgáfan Angústúra gaf bókina nýverið út í þýðingu Elísu Bjargar Þorsteinsdóttur. Umsjón: Guðni Tómasson og Halla Harðardóttir.

Rómeo og Júlía, Kanarí, bókmenntaverðlaun og Dauðinn er barningur

Í Víðsjá í dag verður rætt um hönnun, sjálfbærni, framtíðina, stjórnkerfið og langtímahugsun. Tilefnið er greinaflokkur sem finna má á heimasíðu Hönnunarmiðstöðvar og birtist í prentmiðlum fyrir kosningar. Gestir Víðsjár verða Kristján Örn Kjartansson arkitekt hjá Krads arkitektum og formaður miðstöðvar hönnunar og arkitektúrs og Hrund Gunnsteinsdóttir framkvæmdastjóri Festu - miðstöðvar um samfélagsábyrgð og sjálfbærni, en þau tóku bæði til máls í þessari umræðu á dögunum. Þann 14. október næstkomandi verður gamanóperan Ástardrykkurinn úr smiðju ítalska tónskáldsins Geatano Donizetti sett á svið í Þjóðleikhúskjallaranum af sviðslistahópnum Óði. En samkvæmt viðburðarlýsingu neitar sviðslistahópurinn Óður að geyma óperur í glerkössum og vilja þau miklu frekar taka þær upp, hrista af þeim rykið og leika sér að þeim, pota í óskrifaðar reglur, skemmta sér og öðrum. Við ræðum við þrjá meðlimi hópsins í þætti dagsins. Snæbjörn Brynjarsson leiklistargagnrýnandi segir skoðun sína á sýningunni Kjarval á litla sviði Borgarleikhússins sem er barnasýning sem fjallar um drenginn, manninn og listmálarann Kjarval. Og nýr pistlahöfundur, Snorri Rafn Hallsson tekur til máls en Snorri Rafn bendir á að stórsagan um tæknina segi til um að tæknin skapi manninum nýja möguleika, ný tækifæri, að tæknin sé hér fyrir okkur. Þó er raunin oft önnur þegar tæknin reisir nýja múra, flækir hlutina og er fyrir okkur. Í pistlaröðinni sinni ætlar Snorri að fjalla um sex lík og ólík fyrirbæri sem með einum eða öðrum hætti snerta á þessari klemmu og varpa skugga á stórsöguna. Umsjón Guðni Tómasson

Ástardrykkurinn, Tækni og framfarir, hönnun og framtíð og Kjarval

Víðsjá 4.10.2021 Rætt við Maríu Kjartansdóttur ljósmyndara sem heldur fyrirlestur um mannamyndir, ljósmyndun og myndlist í Þjóðminjasafni Íslands á morgun. Arnljótur Sigurðsson býður Sóleyju Stefánsdóttur í tónlistarhornið Heyrandi nær Og haldið á Kjarrvalsstaði til að ræða við Guðnýju Rósu Ingimarsdóttur myndlistarkonu um sýningu hennar Opus-oups. Umsjón: Guðni Tómasson

Guðný Rósa, Sóley í Heyrandi nær, María Kjartansdóttir og mannamyndin

Víðsjá 30. september Víðsjá heldur í dag í heimsókn í Listasafn Íslands þar sem sýning á verkum myndlistarmannsins Muggs, Guðmundar Thorsteinssonar, verður opnuð á laugardag. Sýningarstjórinn Kristín Guðnadóttir hefur safnað saman verkum listamannsins og ritað glæsilega sýningarskrá um Mugg. Víðsjá hittir Kristínu í safninu að þessu tilefni. Föstudaginn 1. október verður haldin gjörningaveislan Festival for spontaneous Arts í Mengi á Óðinsgötu. Það er Next festival og Rask listamannakollektíf sem standa fyrir viðburðinum og er hann uppskera listamannadvalar listamanna frá Íslandi, Noregi og Slóvakíu hér á landi. Sóley Sigurjónsdóttir og Snæi Jack kíkja til okkar og ræða um viðburðin og Rask listamannakollektíf. Anna María Bogadóttir arkitekt verður tekin tali um heimildamynd hennar sem heitir Jarðsetning. Myndin, sem er hluti af kvikmyndahátíðinni Riff sem hefst í dag, fjallar um gamla Iðnaðarbankahúsið í Lækjargötu og niðurrif þess. Og Sigurlín Bjarney Gísladóttir heldur áfram að huga að gráti og tárum í Víðsjá og í þriðja pistli sínum um það efni beinir Sigurlín Bjarney sjónum að tárunum sem flæða um trúarbrögð, goðsögur og bókmenntatexta.

Muggur, Rask, Jarðsetning og tár og grátur

Í Víðsjá verður hugað að endur-frumsýningu á kvikmyndinni Sögu borgarættarinnar eftir samnefndri skáldsögu Gunnars Gunnarssonar sem tekin var upp á Íslandi árið 1919 og frumsýnd í Kaupmannahöfn ári eftir. Nú stendur til að frumsýna myndina að nýju með nýrri tónlist Þórðar Magnússonar tónskálds en frumsýningin fer samtímis fram í Reykjavík, á Akureyri og Seyðisfirði og er sýningin hluti af dagskrá kvikmyndahátíðarinnar RIFF sem hefst á morgun. Skúli Björn Gunnarsson, forstöðumaður Skriðuklausturs, verður tekinn tali um þetta forvitnilega verkefni. Listahátíðin Sequences fer fram í tíunda sinn dagana 15-24. október næstkomandi. Hátíðin er sjónlistatvíæringur sem hefur verið haldin frá árinu 2006 með sérstaka áherslu á rauntímalistaverk. Yfirskrift sýningarinnar í ár er: Kominn tími til, og í brennidepli verða samtöl listamanna við umhverfi sitt, sögu eða við aðra listamenn. Samtöl sem fléttast meðvitað og o?meðvitað inn i? ti?ðaranda og ri?kjandi hugmyndir i? samfe?laginu. Við heyrum í sýningarstjórum Sequences í þætti dagsins þeim Þórönnu Dögg Björnsdóttur og Þráni Hjálmarssyni. Snæbjörn Brynjarsson, leiklistargagnrýnandi þáttarins, verður með okkur í dag. Hann skellti sér á sýninguna Þétting Hryggðar eftir uppistandarann, rithöfundinn, víninnflytjandann og áhugaboxarann Halldór Laxness Halldórsson einnig þekktur sem Dóri DNA. Gauti Kristmannsson bókmenntagagnrýnandi Víðsjár segir frá bókinni Stóra bókin um sjálfsvorkunn eftir Ingólf Eiríksson sem kom út nú á dögunum hjá Forlaginu og segir frá Hallgrími sem hrökklast heim úr leiklistarnámi í erlendri stórborg til að fara á geðdeild. Umsjón: Guðni Tómasson og Tómas Ævar Ólafsson

Saga borgarættarinnar, Sequences, Þétting hryggðar og Sjálfsvorkun

Víðsjá 28. september 2021 Í dag kemur út bókin Út að drepa túrista eftir rithöfundinn, myndskreytirinn og leiðsögumanninn Þórarinn Leifsson. Bókin er glæpasaga sem gerist innan íslenskrar ferðaþjónustu um það leyti sem kórónuveiran lamaði öll ferðalög um ísland og heimsbyggðina, vorið 2020. Við ræðum við höfundinn í þætti dagsins. Árni Heimir Ingólfsson tónlistarfræðingur verður tekin tali um útvarpsþættina Kventónskáld í karlaveldi sem hefjast á Rás 1 á laugardagsmorgun en þar greinir Árni frá ævi og tónlist fjölmargra merkra kventónskálda á nítjándu öld sem margar hverjar hafa fengið stærri sess í sögunni á allra síðustu árum. Og loks mun Ólöf Gerður Sigfúsdóttir flytja pistil um samsýninguna Iðavöll sem hefur staðið yfir í Hafnarhúsi Listasafns Reykjavíkur á síðustu vikum. Umsjón: Guðni Tómasson og Tómas Ævar Ólafsson.

Iðavöllur, Út að drepa túrista og Kventónskáld í karlaveldi

Sagnfræðingurinn Davíð Ólafsson gaf nú á dögunum út bókina Frá degi til dags: Dagbækur, almanök og veðurbækur 1720-1920. Í bókinni skoðar Davíð eðli og umfang dagbókaritunar á Íslandi um tveggja alda skeið og byggir þá rannsókn á safni dagbóka sem varðveittar eru í Handritasafni Landsbókasafns Íslands. Færslurnar sem hann skoðar eru allt frá örfáum orðum um veðurfar til langra tilfinningaþrunginna hugleiðinga. Við hittum Davíð uppi í Aðalbyggingu Háskóla Íslands í þætti dagsins. Ólöf Kristín Sigurðardóttir, safnstjóri Listasafns Reykjavíkur, verður tekin tali um nýja rannsóknarstöðu sem safnið er að koma á laggirnar og snýr að rannsóknum á stöðu íslenskra kvenna í myndlistarlífi og myndlistarsögu landsmanna. Við höldum áfram að huga að göldrum í Víðsjá. Í síðustu viku skoðuðum við skrifaða dóma og skjöl í galdramálum 17. aldar en í þætti dagsins ætlum við að heyra í Helga Þór Ingasyni, véla- og iðnaðarverkfræðingi, en hann er höfundur söngleikjarins Galdur sem sýndur verður um næstu helgi, nánar tiltekið laugardaginn 2. október klukkan 16 í Langholtskirkju. Og við heyrum af forvitnilegri samkeppni um list í almannarýminu en í janúar stendur til að myndlistin taki yfir 350 auglýsingaskilti í Reykjavík, í svartasta skamdeginu, eftir jól og fyrir útsölur. Sigurður Atli Sigurðsson hjá Y-gallerí segir okkur frá samkeppninni sem galleríið stendur einmitt fyrir í samstari við Listasafn Reykjavíkur. Umsjón: Tómas Ævar Ólafsson og Guðni Tómasson

Dagbækur, auglýsingaskilti, konur í íslenskri myndlist og Galdur

Þáttur fyrir áhugafólk um listir og menningu. Ljósi varpað á það sem efst er á baugi hverju sinni, menningin nær og fjær skoðuð frá ólíkum sjónarhornum og skapandi miðlar settir undir smásjána. Umsjón: Eiríkur Guðmundsson og Guðni Tómasson.

hubhopper

Víðsjá

hubhopper