Umsjón: Rúnar Róbertsson og Gígja Hólmgeirsdóttir Íslensku kjötsúpunni verður gert hátt undir höfði með árlegum Kjötsúpudegi fyrsta vetrardag, þar sem kjötsúpur í mismunandi búningi verða í boði fyrir gesti og gangandi á Skólavörðustígnum í Reykjavík. Flestir Íslendingar elska kjötsúpu, enda eiga margar íslenskar fjölskyldur sína uppáhalds uppskrift af kjötsúpunni sinni. Kjötsúpudagurinn er haldinn af veitinga- og verslunarmönnum á Skólavörðustíg með stuðningi bænda. Til okkar kom Hafliði Halldórsson verkefnastjóri á markaðssviði Bændasamtakana til að segja okkur nánar frá viðburðinum. Marta Goðadóttir, kynningarstýra hjá UN Women á Íslandi, kom til okkar og kynnti fyrir okkur sölu á glænýjum Fokk ofbeldi bol frá samtökunumi en salan hefst í dag. Lögfræðingurinn Magnús Davíð Norðdahl bauð sig fram fyrir Pírata í Norðvesturkjördæmi en náði ekki kjöri. Hann hefur kært talninguna til kjörbréfanefndar. Hann vill að kosningin verði endurtekin í kjördæminu í ljósi ákvörðunar lögreglustjórans á Vesturlandi um sektir á yfirkjörstjórn og vegna upplýsinga um að starfsfólks hótelsins þar sem kjörgögn voru geymd óinnsigluð hafi ítrekað farið inn í salinn. Magnús kom til okkar til að ræða þetta fordæmalausa mál. Við höldum áfram umfjöllun okkar um Loftslagsráðstefnu Sameinuðu þjóðanna sem hefst nú í lok október í Glasgow. Að þessu sinni er ætlunin að rýna í skipulagið á ráðstefnunni, velta fyrir okkur andrúmsloftinu og því sem gerist bak við tjöldin. Til að segja okkur allt um þetta kom hingað Halldór Þorgeirsson, formaður Loftslagsráðs, en hann hefur persónulega reynslu af því hvernig hlutirnir virka bak við tjöldin á svona viðburði. Baldur Þórhallsson, prófessor í stjórnmálafræði, gaf nýverið út bók um alþjóðasamskipti Íslands frá landnámi til stofnunar lýðveldisins. Baldur mætti í morgunkaffi og sagði nánar frá efni bókarinnar og setur í samhengi við nýjustu fréttir um aukin umsvif Rússa í grennd við Ísland og á Norðurslóðum. Tónlist: Ellen Kristjánsdóttir og John Grant - Veldu stjörnu The Beatles - Something Íslensk kjötsúpa - Íslensk kjötsúpa Friðrik Dór - Segðu mér Bubbi Morthens ásamt Bríeti - Ástrós Snorri Helgason - Ingileif Duran Duran - Anniversary Tal Bachman - She's so high

Morgunútvarpið

21 okt - Súpa, FO ofbeldi, uppkosning, loftlagsmál og alþjóðasamskipti

Míuverðlaunin eru verðlaun sem heiðra þau sem koma að þjónustu langveikra barna á einn eða annan hátt. Hægt er að tilnefna heilbrigðisstarfsmann í hvaða starfstétt sem er, hvar á landinu sem er. Þær Þórunn Eva G. Pálsdóttir og Fríða Björk Arnardóttir komu til okkar í morgunkaffi til að segja okkur meira, en þær vita allt um málið. Talið er að um 10 milljónir efna bætist við á hverju ári í hóp efna sem skaðleg eru fólki og rannsóknir taka sinn tíma, svo niðurstöður liggja ekki alltaf strax fyrir. Það leiðir til þess að stjórnvöld ná ekki að setja reglur til að takmarka eða banna framleiðslu og notkun þeirra nógu tímalega. Í hádeginu í dag er opinn fyrirlestur um skaðleg efni á heimilinu á vegum Umhverfisstofnunar og við fengum Bergdísi Björk Bæringsdóttur, sérfræðing á sviði efna, eftirlits og veiðistjórnunar til að segja okkur aðeins af þessu. Við veltum fyrir okkur aldurstakmörkunum á kvikmyndum, en athygli vekur að íslenska kvikmyndin Leynilögga sem frumsýnd er í þessari viku, er í boði annars vegar fyrir 12 ára og eldri og hins vegar 16 ára og eldri. Í hverju liggur munurinn og hverjar eru reglurnar? Er regluverkið hér það sama og erlendis eða annað? Hallgrímur Kristinsson formaður Félags rétthafa í sjónvarps- og kvikmyndaiðnaði kom til okkar og fræddi okkur um þetta. Í sjónvarpþættinum Kveik í gærkvöldi á RÚV kom fram að nærri 60 prósent stelpna í 10. bekk hafa verið beðnar um að senda af sér nektarmynd eða ögrandi mynd og rúm 30 prósent hafa þegar gert það. Í þættinum var talað við tvær grunnskólastúlkur sem seldu af sér kynferðislegar myndir og notaðar nærbuxur í fyrrasumar, þá 13 ára. Mörgum er brugðið eftir umfjöllunina og foreldar vilja vita hvernig bregðast á við og fræða börn sín, af öllum kynjum. Foreldrar hafa verndarskyldu gagnvart börnum, en vankunnátta og skortur á þekkingu kemur oft í veg fyrir að hún skili sér. Til að ræða þessi mál kom til okkar Margrét K. Magnúsdóttir forstöðumaður Barnahúss. Ragnhildur Þórðardóttir, sálfræðingur og einkaþjálfari, einnig þekkt sem Ragga Nagli, er einn þekktasti heilsu ráðgjafi landsins. Hún er þó ekki búsett á Íslandi, heldur í Danmörku, en er stödd á landinu um þessar mundir og við gripum því tækifærið og fengum hana í heimsókn í smá heilsuspjall að hausti. Tónlist: Geiri Sæm og Hunangstunglið - Er ást í tunglinu? GDRN - Næsta líf. Lorde - Mood ring. Adele - Easy on me. Gugusar - Röddin í klettunum. U2 - Pride in the name of love. Dua Lipa - Love again. Herbert Guðmundsson - Með stjörnunum. Lenny Kravitz - Let love rule. Lón - Earthquake.

20. okt. - Míuverðlaun, efni, aldurstakmörk, nektarmyndir og Naglinn

Umsjón: Rúnar Róbertsson og Gígja Hólmgeirsdóttir Sjávarútvegsdagurinn er haldinn í Hörpu í dag. Yfirskrift dagsins í ár er: Vel í stakk búinn og vísar til þess að sjávarútvegur og fiskeldi komust nokkuð klakklaust í gegnum erfitt ár í fyrra og eru þess albúin að takast á við framtíðina. Meðal ræðumanna er Herra Guðni Th. Jóhannesson forseti Íslands. Við hringdum í Jónas Gest Jónasson meðeiganda Deloitte, sem er einn þeirra sem heldur ræðu, til að fá að vita það helsta og hvað á að ræða. Það styttist í 26. loftslagsráðstefnu Sameinuðu þjóðanna sem hefst nú í lok október í Glasgow, Skotlandi. Sagt hefur verið að ráðstefnan verði úrslitastund fyrir heiminn og nauðsynlegt sé að árangur náist. Við hér í Morgun- og Síðdegisútvarpinu á Rás 2 ætlum því að nota tímann fram að ráðstefnunni til að draga fram hinar ýmsu hliðar á loftslagsumræðunni. Við byrjuðum á að fá til okkar Rafn Helgason, sérfræðing á sviði loftslagsmála hjá Umhverfisstofnun, og Árna Finnsson, formaður Náttúruverndarsamtaka Íslands en Árni er reynslubolti þegar kemur að Loftslagsráðstefnum en Rafn er að fara í fyrsta skiptið. Kynfræðingurinn Sigga Dögg hefur undanfarin ár opnað umræðuna um kynlíf upp á gátt en hún setur unað, jafnrétti, húmor og jákvæðni í aðalhlutverk þegar kemur að kynlífi. Sigga Dögg kom til okkar og fór yfir þessi mál eins og henni einni er lagið. Ert þú með geðveikan mannauð, spyr Silja Björk Björnsdóttir í grein sem birtist bæði á Vísi og kaffið.is. Þar veltir hún því fyrir sér hvort starfsmaður með geðveikindi eigi ekki að fá sömu meðferð og t.d. starfsmaður með sykursýki eða frjókornaofnæmi. Hún segir sig ekki vera verri starfskraft þó hún sé þunglynd. Við fengum Silju Björk til okkar í hljóðverið fyrir norðan til þess að segja okkur betur frá þessu. Og Sævar Helgi Bragason kom til okkar í Vísindahornið í lok þáttar. Tónlist: Ásgeir Trausti - Leyndarmál The Eagles - Tequila sunrise Thin Jim & the Castaways - Confession Friðrik Dór - Hvílíkur dagur Land og synir - Von mín er sú A-ha - Crying in the rain Bjartmar og Bergrisarnir - Velkomin á bísann The Beatles - Lucy in the sky with diamonds Big country - Chance

19. okt - Sjávarútvegur, COP26, Kynlíf, geðveikur mannauður og Vísindi

Opnað hefur verið fyrir umsóknir í viðskiptahraðalinn Til sjávar og sveita, en hann hefur verið keyrður undanfarin tvö ár af Icelandic Startups. Óskað er eftir fyrirtækjum sem eru langt komin í vöruþróun, tilbúin með vöru á markað eða hafa hafið markaðssókn og aðeins fimm fyrirtæki verða tekin inn í hraðalinn. Freyr Friðfinnsson verkefnastjóri kom til okkar og sagði okkur meira af þessu. Við slógum svo á þráðinn til Kanarí og heyrðum í Kristínu Magneu Sigurjónsdóttur sem er þar búsett í helli ásamt manni sínum Gunnar Smára Helgasyni. Þau hellisbúarnir una sér vel þar ytra og sinna fjölbreyttum verkefnum, m.a. því að reka siglfirskan vefmiðil og útvarp og hlúa að heimilislausum köttum. Þorkell Máni Pétursson, Máni, er þekktur sem útvarpsmaður, fyrrum knattspyrnuþjálfari, álitsgjafi í knattspyrnulýsingum, umboðsmaður tónlistarfólks og nú rithöfundur. Máni kom til okkar og sagði okkur frá fyrstu bókinni sem hann skrifar en hún ber heitið Þú þarft ekki að vera svona mikill aumingi. Þetta er sjálfshjálparbók fyrir karlmenn sem vita að sjálfshjálparbækur eru bara fyrir aumingja. Hækkanir á ýmis konar vöru og þjónustu hafa verið áberandi í umræðunni síðustu daga. Bensínverð hefur rokið upp, húsnæðisverð helst hátt og vart hefur orðið við margs konar verðhækkanir á almennri þjónustu. Þá hefur vöruskortur líka áhrif á verð, en ýmis vandamál varðandi aðföng og flutninga á tímum heimsfaraldurs hafa komið upp. Björn Berg Gunnarsson deildarstjóri greiningar- og fræðslu hjá Íslandsbanka rýndi í þessi mál með okkur. Svo voru það íþróttir helgarinnar þar sem Þorkell Gunnar Sigurbjörnsson íþróttafréttamaður leit við og fór yfir það helsta með okkur. Tónlist: Bubbi Morthens - Kossar án vara. Paul McCartney og Wings - Silly love songs. Freya Ridings - Castles. Coldplay og BTS - My universe. Hipsumhaps - Meikaða. The Smiths - There is a light that never goes out. Una Stef - Rock and roll dancer. Ed Sheeran - Shivers. Sting - If its love.

18. okt - Hraðall, hellisbúar, Máni, hækkanir og íþróttir

Morgunútvarpið 15.10.21 Umsjón: Rúnar Róbertsson og Gígja Hólmgeirsdóttir Undanfarna daga hefur skapast töluverð umræða um framboð á fjarnámi hjá íslenskum háskólum. Í gær kom til okkar aðstoðarrektor Háskóla Íslands og svaraði þeirri gagnrýni um að HÍ sé ekki í takt við tímann þegar kemur að fjarnámi. Í dag slógum við á þráðinn til Eyjólfs Guðmundssonar, rektors Háskólans á Akureyri, og fengum hans viðbrögð við umræðunni. Sóttvarnarlæknir hefur lagt áherslu á að ekki yrði opið fram á nótt á skemmtistöðum ef slakað verður á samkomutakmörkunum. Sagði hann ljóst að þær bylgjur sem mest vandræði hafi skapað hafi tengst skemmtanalífinu. Þetta væri hægt að sjá í raðgreiningargögnum. Kolbrún Garðarsdóttir lögmaður segir að þetta sé brot á stjórnarskrárvörðum rétti til eignaréttar og atvinnufrelsis. Við heyrðum í Kolbrúnu. Um síðustu helgi fjallaði Morgunblaðið um að óvenju mörg mál hefðu borist í haust til Barnaverndar Hafnarfjarðar, þar sem hópur barna hefur beitt annað barn ofbeldi. En þýðir þetta að ofbeldi meðal barna sé almennt að aukast? Til þess að svara þessu fengum við til okkar Mörtu Kristínu Hreiðarsdóttur, deildarstjóra Áætlana- og upplýsingadeildar hjá Lögreglunni á höfuðborgarsvæðinu, en hún hefur lengi fylgst með þróun ofbeldishegðunar meðal íslenskra barna og ungmenna. Fréttir vikunnar voru á sínum stað eins og vanalega hér á föstudögum. Í þetta skiptið kom til okkar Karítas Ríkharðsdóttir, blaðamaður á Morgunblaðinu. Og fréttamaðurinn knái, Freyr Gígja Gunnarsson, kom til okkar í Hégómavísindahornið í lok þáttar. Hann sagði okkur fréttir af Coldplay, Stones og Cher. Tónlist: Júníus Meyvant - Color decay Moses hightower - Lífsgleði Abba - Don't shut me down U2 - Sweetest thing GDRN - Næsta líf Flott - Mér er drull Madness - It must be love Tómas Welding - Here they come The Rolling stones - Under my thumb Adele - Easy on me

14. okt - HA, lögbrot, ofbeldi barna, fréttir vikunnar og hégómi

Veitingastaðurinn Hornið hefur verið starfræktur í Reykjavík frá árinu 1979 og var sá fyrsti sinnar tegundar hér á landi, þ.e. veitingastaður með ítölsku ívafi þar sem áherslan er á pizzur. Staðurinn hefur verið rekinn á sömu kennitölu frá upphafi og rekinn af sömu fjölskyldunni. Jakob H. Magnússon veitingamaður og sonur hans Hlynur Jakobsson komu til okkar í morgunkaffi og sögðu okkur frá áratugum í veitingarekstri og nýrri bók sem nú kemur út um sögu Hornsins. Fjölmargir Íslendingar eiga fasteignir á Spáni og eru ýmist alfluttir þangað eða hafa þar vetursetu. En hvað þarf að hafa í huga varðandi fasteignakaup í erlendu landi? Hvaða ber að varast? Dæmi eru um að Íslendingar hafi tapað þúsundum og jafnvel hundruð þúsunda evra vegna þess að samningagerð var áfátt. Við hringdum til Spánar og heyrðum í Burkna Aðalsteinssyni sem er framkvæmdarstjóri Spánarhúsa og þekkir þessi mál vel. Mjög afgerandi stuðningur við Katrínu Jakobsdóttur kemur fram í nýrri könnun Maskínu þar sem fólk var spurt hvern það vildi helst sjá sem forsætisráðherra í næstu ríkisstjórn. Þar fær Katrín rúm 57 prósent, sem er töluverð aukning frá fyrri könnunum, á meðan næsti maður á blaði, Sigurður Ingi Jóhannson, er rétt undir tíu prósentum. Hvað þýðir þetta og hefur það eitthvert gildi inn í stjórnarmyndunarviðræður sem nú standa yfir? Við slógum á þráðinn til Stefaníu Óskarsdóttur dósents í stjórnmálafræði og spáum í spilin. Háskóli Íslands hefur verið gagnrýndur undanfarið fyrir lítið framboð á fjarnámi. Þar hefur verið spurt hvort Háskólinn sé eingöngu háskóli höfuðborgarbúa og bent á að takmörkun fjarnáms sé ekki í takt við tímann. Steinunn Gestsdóttir aðstoðarrektor HÍ kom til okkar og gerði grein fyrir stöðu mála þeirra megin. Margir muna eftir sjónvarpsþáttunum um Hringfarann, Kristján Gíslason, sem tók sig til og ferðaðist í kringum heiminn á mótorhjóli og lenti í alls kyns ævintýrum. Hann var hvergi nærri hættur að þeim leiðangri loknum og hjólaði víða um heim með konu sinni, en lagði svo einn upp í leiðangur um Afríku 2019. Það ævintýri hefur hann skrásett í bókinni Andlit Afríku, sem er full af mannlífsmyndum og sögum af enn einni ævintýraförinni. Kristján kom til okkar í spjall og sagði okkur af leiðöngrum sínum og við spurðum hann að sjálfsögðu í leiðinni hvert förinni er heitið næst. Tónlist: Ásgeir Trausti - Heimförin. Eddie Vedder - Long way. Nýdönsk - Apaspil. Coldplay og BTS - My universe. Björk - Kata rokkar. E.L.O. - All over the world. Hipsumhaps - Meikaða. Toto - Africa.

14. okt. - Hornið, Spánarhús, ráðherra, fjarnám og Hringfarinn

13.10.2021

Flestir tengja útilegur við sumarið hér á landi, en þó finnst fólk sem stundar útilegur á veturna líka. Þeirra á meðal eru fjallastelpurnar Hafdís Huld Björnsdóttir og Valgerður Húnbogadóttir sem hafa gist úti a.m.k. eina nótt í mánuði undanfarið eitt og hálft ár. Þær kíktu til okkar í útileguspjall. Óánægja ríkir meðal talmeinafræðinga vegna ákvæðis í samningum um tveggja ára starfsreynslu hjá ríki eða sveitarfélögum til að geta komist á samning hjá Sjúkratryggingum Íslands. Séu slík störf ekki í boði lenda nýútskrifaðir talmeinafræðingar milli skips og bryggju og þurfa þess vegna mörg að starfa utan samnings, sem þýðir að skjólstæðingar þeirra verða að borga fullt gjald fyrir þjónustuna hverju sinni, því ekki kemur til niðurgreiðsla frá ríkinu. Talmeinafræðingarnir Eyrún Svava Ingvadóttir og Brynja Dögg Hermannsdóttir fóru yfir þetta mál með okkur. Í neyslusamfélagi vestrænna ríkja fer gríðarlega mikið af fatnaði í ruslið, endurvinnslu eða til gjafa og mikið af þessum flíkum enda í Afríku. Nú er svo komið að fatasóun Vesturlandabúa myndar fatafjöll í Afríku og mikið af fötunum er af svo litlum gæðum að þau nýtast ekki, líkt og við sáum í sjónvarpsfréttum um helgina. Katrín María Káradóttir frá Listaháskóla Íslands og Guðbjörg Rut Pálmadóttir frá Rauða krossinum komu til okkar og ræddu þessa stöðu. Birgir Þórarinsson er sennilega umtalaðasti maður Íslands þessa dagana, en óvænt skipti hans úr Miðflokknum yfir í Sjálfstæðisflokkinn, fljótlega að kosningum loknum, hafa vakið sterk viðbrögð. Sumir tala um svik við kjósendur og flokkinn, en þingflokkur Sjálfstæðisflokksins hefur boðið Birgi velkominn. Varaþingmaður hans hefur nú lýst því yfir að hún muni ekki fylgja Birgi, en hún hafði áður sagt honum að hún myndi styðja hann. Birgir var gestur okkar í Morgunútvarpinu. Tæknihornið var svo á sínum stað þar sem Guðmundur Jóhannsson fræddi okkur um sitthvað áhugavert úr heimi tækninnar. Tónlist: Mugison - Little trip to heaven. Bubbi Morthens - Er nauðsynlegt að skjóta þá? Kacey Musgraves - Justified. Albatrosss - Ég sé sólina. Bríet - Sólblóm. Sting - If its love. Olivia Rodrigo - Drivers license.

12. okt. - Vetrarútilegur, talmeinafræðingar, fatasóun, Birgir, tækni

Í fyrra gekk ljómandi vel að safna birkifræi í þjóðarátaki þar um og nú freista Landgræðslan og Skógræktin þess að safna meiru. Mismikið virðist vera af fræi eftir landshlutum þetta árið og er biðlað til fólks sérstaklega á Norður- og Austurlandi að fara út að tína. Kristinn H. Þorsteinsson veit allt um málið og við hringdum í hann og tókum stöðuna. Nú styttist í jólabókaflóðið og við erum farin að glugga í hinar ýmsu bækur. Á dögunum kom út forvitnileg fuglabók, sem við fyrstu sýn gæti verið barnabók, en er miklu meira en það. Við fórum nánar yfir það og fleira tengt bókaútgáfunni með Kristjáni Frey Halldórssyni, verkefnastjóra hjá bókaútgáfunni Sögum. Þessa dagana taka hundruð skólabarna þátt í Skólablakinu, nýju verkefni á vegum ÍSÍ, UMFÍ og fleiri blakfélaga. Fyrsta mótið fór fram í síðustu viku og gleðin heldur áfram út mánuðinn. Elsa Gunnarsdóttir verkefnastjóri hjá Blaksambandinu er ein þeirra sem leiðir verkefnið og hún var á línunni frá Ísafirði og sagði okkur meira af blakgleðinni. Nokkuð stirt er þessa dagana á milli pólskra stjórnvalda og Evrópusambandsins, enda úrskurðaði dómstóll í Póllandi á dögunum að stjórnarskráin gangi framar lögum Evrópusambandsins. En hvað þýðir þetta í hinu stóra samhengi? Við rýndum í Evrópumálin með hjálp Auðar Ingu Rúnarsdóttur, Evrópufræðingi og stundakennara við stjórnmálafræðideild Háskóla Íslands. Svo voru það íþróttir helgarinnar, alltaf nóg um að vera í sportinu og okkar kona Helga Margrét Höskuldsdóttir mætti af íþróttadeildinni og fór yfir það helsta. Tónlist: Magnús Þór - Álfar. Eagles - Best of my love. The Cardigans - Sick and tired. Harry Styles - Golden. The Housemartins - Five get over excited - Fun fun fun. Sigríður Thorlacius - Gilligill. Paul Simon - Graceland. Biig Piig - Feels right. Sigrid - Mirror. Snorri Helgason - Ingileif.

11. okt. - Birkifræ, bókaútgáfa, blak, Pólland og ESB, íþróttir

Í mars hófu Sigurhæðir starfsemi sína á Selfossi, en Sigurhæðir er fyrsta samhæfða þjónustan við þolendur kynbundins ofbeldis í sunnlensku nærsamfélagi. Við slógum á þráðinn til Hildar Jónsdóttur, verkefnastjóra Sigurhæða, og forvitnuðumst um starfsemina og hvernig hefur gengið þessa fyrstu mánuði. Bláa Lónið var í vikunni útnefnt Umhverfisfyrirtæki ársins af Samtökum atvinnulífsins. Sjálfbærni, kolefnisjöfnun, umhverfisstefna og rannsóknir eru m.a. þess sem stendur að baki viðurkenningunni. Við fengum Fannar Jónsson gæðastjóra Bláa lónsins til okkar til að fara svolítið yfir það hvernig stórt og vaxandi fyrirtæki tekur umhverfismálin föstum tökum og hverju það skilar. Í kjölfar Kveiksþáttarins á þriðjudagskvöld hefur skapast töluverð umræða um offitu og þau samfélagslegu vandamál því fylgja. Meðal þeirra sem hafa tjáð sig er Tara Margrét Vilhjálmsdóttir, formaður Samtaka um líkamsvirðingu, en samtökin hafa það að markmiði að stuðla að virðingu fyrir fjölbreytileika holdafars auk þess að vinna gegn útlitsdýrkun og fitufordómum í samfélaginu. Tara Margrét kom til okkar og fór yfir umræðuna síðustu daga. Fréttir vikunnar voru á sínum stað eins og vanalega á föstudögum. Að þessu sinni komu til okkar þau Eyþór Arnalds, borgarfulltrúi Sjálfstæðisflokksins, og Þórhildur Sunna Ævarsdóttir, þingmaður Pírata, og ræddu hvað bar hæst í vikunni. Í lok þáttar fengum við til okkar góðan föstudagsgest, Braga Valdimar Skúlason, sem nú er á fullu að undirbúa langþráða jólatónleika Baggalúts. En það er ekki það eina, því hann er líka að gefa út ljóðabók sem ber titilinn Jóðl. Bragi Valdimar kom og sagði okkur frá ljóðum og jóðli og jólavertíðinni framundan. Tónlist: Baggalútur - Ég á það skilið. Teitur Magnússon og Bjarni Daníel - Sloppurinn. Bubbi Morthens og Bríet - Ástrós. Coldplay og BTS - My universe. Egill Ólafsson - Ekkert þras. Sigurður Guðmundsson og Memfismafían - Síðasti móhítóinn. Kacey Musgraves - Justified. Daði og Gagnamagnið - 10 years.

8. okt. - Sigurhæðir, umhverfismál, líkamsvirðing, fréttaspjall, Bragi

Þessa dagana stendur yfir Ullarvika á Suðurlandi þar sem sjónum er beint að íslenskri ull sem býr yfir ótal mögnuðum eiginleikum. Fjöldi viðburða af ýmsum toga, gleði og fróðleikur einkenna vikuna og við heyrðum í Margréti Jónsdóttur sem er ein þeirra sem standa að baki Ullarvikunni og fengum að vita meira. Hinn árlegi Mannauðsdagur er á föstudaginn, en þá fagnar fólk sem starfar við mannauðsstjórnun deginum með ráðstefnu í Hörpu. Mikið hefur mætt á mannauðsfólki í heimsfaraldrinum og ekki síður nú þegar við siglum út úr honum og koma þarf vinnustöðum, starfsfólki og vinnustaðamenningu aftur á góðan stað eftir krefjandi tíma. Þau Ásdís Eir Símonardóttir formaður Mannauðs, félags mannauðsfólks, og Hróar Hugosson stjórnarmaður komu til okkar. Seðlabankinn hækkaði stýrivexti sína í gær en forseti ASÍ hefur lýst aðgerðinni sem ógn við húsnæðisöryggi fólks. Til okkar kom Una Jónsdóttir hagfræðingur hjá Landsbankanum og fór yfir það hvernig stýrivaxtahækkunin hefur áhrif á greiðslubyrði fólks með húsnæðislán, hvaða nafni sem þau heita. Farið var að keyra viðmið og verklag fyrir Heilsueflandi vinnustaði á nokkrum vinnustöðum í tilraunaskyni í fyrra. Nú er þeirri tilraun lokið og viðmiðin verða kynnt og gerð aðgengileg öllum fyrirtækjum og stofnunum landsins í dag. En hvað felur verkefnið í sér, hvað þurfa vinnustaðir til að bera til að geta talist heilsueflandi? Þær Ingibjörg Loftsdóttir hjá VIRK og Inga Berg Gísladóttir hjá Embætti landlæknis sögðu okkur frá. Við forvitnuðumst svo um tattoo festival eða húðflúrs hátíð sem fram fer í Iðnó um helgina. Fjölnir Bragason stendur að baki gleðinni og hann kíkti til okkar og sagði okkur meira af því hvað fram fer á slíkri hátíð. Tónlist: Grafík - Prinsessan. Michael Kiwanuka - Cold little heart. Hjálmar - Yfir hafið. Lón - Earthquake. Emilíana Torrini - Big jumps. Janelle Monae - Make me feel. Una Schram - Crush. Helgi Björnsson - Ég skrifa þér ljóð á kampavínstappa. Elton John - Im still standing. Flott - Mér er drull.

7. okt. - Ullarvika, mannauður, vaxtahækkun, heilsuefling og húðflúr

Í dag fer fram viðamikil ráðstefna við Háskólann á Akureyri undir heitinu Löggæsla og samfélagið. Þemað að þessu sinni eru afbrotavarnir. Við slógum á þráðinn norður og heyrðum í Guðmundi Oddssyni hjá Háskólanum á Akureyri sem vissi meira um ráðstefnuna og það sem þar er til umfjöllunar. Er hægt að verða ástfangin af eldfjalli? Það er spurning sem við bárum undir Björn Steinbekk, en hann hefur myndað eldgosið við Fagradalsfjall nánast frá upphafi og náð ótrúlegum myndum á dróna. Myndatakan, sem hófst sem áhugamál og ástríða, hefur svo orðið kveikjan að fleiri verkefnum og ýmis konar athygli og nú stefnir Björn á að koma eldgosa ástinni á bók. Björn kíkti til okkar í spjall. Eins og hlustendur vita er í gildi hættustig á Seyðisfirði vegna skriðuhættu en aðeins 10 mánuðir eru síðan stór aurskriða fell á bæinn með þeim afleiðingum að fjöldi húsa skemmdust. Það skal því engan undra að íbúar séu óttaslegnir nú en mælingar Veðurstofunnar benda til þess að einhver hreyfing hafi orðið á flekum í fjallinu fyrir ofan bæinn. Við hringdum í Davíð Kristinsson hótelstjóra, slökkviliðsmanns, björgunarsveitarmanns og allt hvað eina sem er búsettur á Seyðisfirði. Á föstudag er von á viðamikilli umfjöllun hjá Stundinni um Pandora skjölin svokölluðu en þau sýna fjármálahreyfingar og auðsöfnun einstaklinga og fyrirtækja um allan heim, þar með talið á Íslandi, sem hingað til voru falin í aflandsfélögum og skattaskjólum. Panamaskjölin voru skellur fyrir íslenskt samfélag, og sérstaklega íslensk stjórnmál, árið 2016 en óvíst er hvaða áhrif Pandora skjölin koma til með að hafa. Við fengum til okkar Bryndísi Kristjánsdóttir skattrannsóknarstjóra og fórum yfir það hvaða lærdómur var dreginn af Panama-skjölunum og hvaða verkfæri skattayfirvöld hafa til að rannsaka það sem fram kemur í gagnalekum á borð við Pandora skjölin. Elías Guðmundsson var nýverið kjörinn formaður Krísuvíkursamtakanna, en samtökin bjóða upp á meðferð gegn fíknisjúkdómi þar sem unnið er með 12 spora kerfið. Meðferðin fer fram á heimili Krýsuvíkursamtakanna og er ásóknin mikil. Við fengum Elías til okkar til að segja okkur af starfsemi samtakanna. Tónlist: Sycamore Tree - One day. Hákon - Barcelona. Kacey Musgraves - Justified. Taylor Swift - Cardigan. Moses Hightower - Lífsgleði. Jóhann Helgason - Shes done it again. Stuðmenn - Íslenskir karlmenn. Eddie Vedder - Long way. Coldplay og BTS - My universe. Baggalútur - Ég á það skilið.

6. okt. - Löggæsla, eldgos, Seyðisfjörður, Pandora skjöl, Krísuvík

Optimistic Food group, eða bjartsýna matarfélagið, er nýsköpunar- og frumkvöðlafyrirtæki í matvælavinnslu þar sem unnið er að gerð vegan matvæla sem komið geta í stað kjöts, en eiga að höfða samt bæði til þeirra sem aðhyllast veganisma og þeirra sem hafa smekk fyrir kjötvörum. Fyrir helgi settu framleiðendurnir bjartsýnu svokallað Happyroni á markað þegar hægt var að panta pizzu með slíku áleggi. Haraldur Hugosson er einn þeirra sem stendur að baki fyrirtækinu og hann kíkti til mín í morgunkaffi og sagði okkur frá möguleikunum á því að fá kjötætur til skipta yfir í t.d. Happyroni í stað Pepperoni. Í Kveik í kvöld verður m.a. fjallað um offitu barna og þróun hennar, en m.a. eru vísbendingar um að offita barna hafi aukist í Covid heimsfaraldrinum. Málið er á margan hátt viðkvæmt, en fagaðilar telja mikilvægt að bregðast við með afgerandi hætti. Tryggvi Helgason barnalæknir þekkir vel til og hann settist í spjall hjá okkur um þessi mál. Frestur til að skila inn lögum í Söngvakeppnina 2022 rennur út á miðnætti annað kvöld. Við fengum Rúnar Frey Gíslason verkefnastjóra hjá RÚV til að líta við og segja okkur frá fyrirkomulaginu og hvernig keppninni verður háttað í vetur. Í dag er Kennaradagurinn og tilnefningar til Íslensku menntaverðlaunanna voru kynntar í beinni útsendingu hér hjá okkur eftir áttafréttirnar. Verðlaunahátíðin sjálf verður svo í beinni útsendingu á RÚV þann 10. nóvember nk. Þar verða veitt verðlaun til framúrskarandi kennara, skóla, þróunarverkefna og hvatningarverðlaun. Gerður Kristný skáld, sem er formaður viðurkenningaráðs verðlaunanna kom til okkar og opinberaði tilnefningarnar. Sævar Helgi Bragason kom svo til okkar í Vísindahornið sitt og sagði okkur sitthvað áhugavert og skemmtilegt úr heimi vísindanna, m.a. af fljúgndi furðuhlut sem margir sáu á himni fyrir skemmstu. Tónlist: Thin Jim and the Castaways - Confessions. Jónas Sig - Milda hjartað. Flott - Þegar ég verð 36. Dua Lipa - Love again. Sigurður Guðmundsson - Orðin mín. Sting - Brand new day. Sálin hans Jóns míns - Getur verið. Emilíana Torrini - Speed of dark. Dimma - Almyrkvi.

5. okt. - Happyroni, offita, Söngvakeppnin, menntaverðlaun og vísindi

Umsjón: Rúnar Róbertsson og Gígja Hólmgeirsdóttir Fréttastofa Stöðvar2 sagði frá þvi um helgina að viðgerð á bílskýli vegna sprungu og leka hafi kostað tugmilljóna króna vegna hönnunargalla og ónógs eftirlits að hálfu verkfræðistofu og viðgerðin er ekki fullkláruð. Stofan hafi fengið verktaka með brotaferil að baki, segir í fréttinni, til að vinna verkið sem hafi algjörlega mislukkast. Þegar hann fór í þrot í miðju verki var samið við hann á ný á nýrri kennitöliu. Við fengum formann Neytendasamtakanna, Breka Karlsson, til okkar til að fara almennt yfir þessi mál. Hvar stendur neytandinn í svona málum og eru þau algeng inná borð Neytendasamtakanna? Í nýrri skýrslu Perform Europe, þar sem styrkjakerfi sviðslista í 41 Evrópulandi er skoðað, kemur í ljós að Ísland raðar sér í neðstu sætin þegar kemur að styrkjum til sýningarferða og samstarfs íslensks sviðslistafólks utan landssteinanna. Við fengum til okkar Friðrik Friðriksson, framkvæmdastjóra Bandalags sjálfsstæðra leikhúsa, til að segja okkur nánar frá niðurstöðum skýrslunnar og fara almennt yfir styrkjaumhverfi íslenska sviðslista. Mikil úrkoma hefur verið á Norðurlandi eystra og hafa aurskriður fallið víða. Ástandið er sérstaklega slæmt í Þingeyjarsveit og í gær var sjötti bærinn rýmdur vegna mikillar úrkomu og skriðuhættu, bærinn Nípá í Útkinn. Við hringdum í Braga Kárason, bónda á Nípá, og athugum hvernig staðan er hjá þeim núna í morgunsárið. Og tókum svo stöðuna hjá Hermanni Karlssyni aðalvarðstjóra í aðgerðarstjórn hjá lögreglustjóranum á Norðurlandi eystra um sama mál. Á föstudaginn 1. október hófst árlegt árvekni- og fjáröflunarátak Krabbameinsfélags Íslands, Bleika slaufan, undir slagorðinu ?VERUM TIL?. Í ár segir Lára okkur sína sögu í auglýsingunum. Saga hennar er persónuleg og einstök. Lára Guðrún Jóhönnudóttir og Halla Þorvaldsdóttir, framkvæmdastjóri Krabbameinsfélagsins, komu til okkar. Og svo við fórum yfir íþróttir helgarinnar með Kristjönu Arnarsdóttur. Tónlist: Friðrik Dór - Segðu mér Kacey Musgraves - Justified Queen - You're my best friend Robbie Williams - Come undone Dikta - Just getting started Of monsters and men - Circles Paul Simon - Graceland Unnsteinn Manúel - Lúser Friðrik Ómar - Hvað ef ég get ekki elskað Jamiroquai - Alright Eddie Vedder - Long way

4. okt - Kennitöluflakk, styrkir, skriður, bleika slaufan og íþróttir

Oddur Ingi Guðmundsson og Hjalti Halldórsson eru kennarar í Langholtsskóla, en halda auk þess úti hlaðvarpinu Ormstungum. Upphaflega settu þeir hlaðvarpið af stað til að miðla efni til nemenda sinna á Covid tímum, en verkefnið hefur síðan undið upp á sig. Þeir félagar kíktu til okkar í morgunkaffi og sögðu okkur frá því hvernig þeir nýta tæknina til að kynna Íslendingasögurnar fyrir nemendum sínum. Tæknistelpur er námskeið fyrir ungar stelpur sem langar að kynnast heimi tækninnar. Á námskeiðinu fá stelpur að kynnast forritun, tölvuleikjahönnun og ýmsu tæknitengdu. Þær læra að forrita en líka er unnið með sjálfsmynd, fyrirmyndir og valdeflingu. Þau Úlfur Atlason og Sara Isabel Sarabia Gunnlaugsdóttir komu til okkar og sögðu okkur nánar frá. Guðrún Ósk Steinbjörnsdóttir, íbúi í Húnaþingi vestra, vakti athygli á slæmu ástandi Vatnsnesvegar á Facebook-síðu sinni á dögunum. Vegurinn hefur oft ratað í fréttir í gegnum tíðina vegna slæms ásigkomulags en nú segir Guðrún að ástandið hafi aldrei verið verra. Við slógum á þráðinn til Guðrúnar. Fréttir vikunnar eru á sínum stað og verða væntanlega litaðar að niðurstöðum kosninganna. Gestir okkar að þessu sinni voru þau Dagbjört Hákonardóttir, lögfræðingur og frambjóðandi Samfylkingarinnar, og Daði Már Kristófersson, hagfræðingur og varaformaður Viðreisnar. Freyr Gígja Gunnarsson leiddi okkur svo inn í heim ríka og fræga fólksins þegar hann opnaði inn í hégómavísindahornið í lok þáttar. Þar komu Britney Spears, James Bond og Gladiator við sögu. Tónlist: Hákon - Barcelona. A-ha - Hunting high and low. Bríet - Sólblóm. Slagarasveitin - Sæludalur. FLOTT - Þegar ég verð 36. Mott the Hoople - All the young dudes.

1. okt.-Ormstungur,Tæknistelpur, Vatnsnesvegur, fréttir, hégómavísindi

Morgunútvarpið vekur hlustendur með glóðvolgum fréttum og snarpri umfjöllun um samfélagsmál. Umsjón: Gunnhildur Arna Gunnarsdóttir, Hulda Geirsdóttir og Sigmar Guðmundsson.

hubhopper

Morgunútvarpið

hubhopper